Read Iyojwa'ja Chorote 2 Corintios 6 Bible Online

2 Corintios 6 - Iyojwa'ja Chorote bible

2 Corintios 6

¹Ijiatjliyi, siuti sa'am ti anokieje ni Sinia' ni iyo ni jikijmaye, wuj ti anip'elisi'niase, ká akajyina' naka jikap'ijliuskiye iyo ni Sinia', siunie ti yints'e'm.

²'Yina iyo'ate ti yi'i ni ji'wet: “Yit'i'yijpe ti po' siukia inkap'ijliuskiye, ya'am ak'iu'wapi, 'yina po 'neje ki jloma ti i'maninkiye po', kia'iyo anoye'ampe.” ¡'Yejne'n jla'aka siujlie'e jloma! ¡Siunie k'ie pet siunie i'maninkiye, ti jani'manitie!

³'Yina lajk'ipa ka je 'esie ka iyoki ka inianaja ask'ioye, ka neyi ts'ijiye ka 'yakajyina ka ne'yi paka sitienkiujnieyeja. 'Nakayi ti ja lajak'ipa ka iwonts'e 'ate, “Wuj ti je 'es ni iniwonisi.”

⁴Jak je iyoyiji wikie'eyi siuniwa awoki 'yina je anijwekieje ti sa'am ti Sinia' jikawosts'e'm, ti awaki' naka siwet'ia. 'Yina je kasjlak'alk'i wita'm, ni'ne ti lajk'ipa ka'wina, siu'neje ti je 'yakajata paka iyoki,

⁵siu'neje na ti kask'ajakietaja'n, siu'neje ti kasts'otiejatak'i a'laja'm, siu'neje ti ti'yikisanajatats'e, siu'neje ni sikijmaye ti kiojieti, siunie ti ijnieti anilankinaja, naka 'neje ni nel'lia.

⁶Siu'neje ti je anijwekieje ti awoki ni siunie 'es, siu'neje ni ti kastant'ieje niwa Sinia' jlamtis ti ijiate jla'am ti ijiatk'iji'n. Siunie ti anilayitie ilia'm napo i'nio', jla'yi ti ap'elisina, siu'neje ti yi' siwa'm janaka Sinia' jikimet ti 'es, siu'neje ni semijnaye ti ijiatk'i,

⁷siu'neje ti awoki samtikie' niwaka Sinia' jlamtis ti ijiatk'iji'n, siu'neje ti yisajap naka jijweye ni Sinia'. 'Yina siunie tiwoki je niliak, naka'ne ni ti tiwoki inkio' jleliye', 'yina niwaka'ne pet ti akienaja niwaka ti 'ekiyejataja napo sitiejiejwas, siu'neje ti sikio' jlele pet ti awoki ka ini'manitie.

⁸Yi'i ti ti'niejmakts'e, yi'i ti kaslakik. Yi'i ti kiak tiwonats'e ti kasjwela'ate, “Ijiate wat ti 'es siunie iyoyisi.” 'Yina yi'i ti kiak tiwonats'e 'ate, “Je 'es siunie iyoyisi.” Jlam'ne siunie ajwela 'esieta, 'yina tijwela ka je ijiatayi siupa ajwela.

⁹Siunapo i'nio iyonts'e 'ate siunapo ti je itiant'iejesi, jlam'ne ki iyoyetaja ti itiant'iejts'e napo i'nio'. Siyel netian'ni jiwek, 'yina je wek ka ijiatayiji ka kasts'ajle'n. Tajak'ni siwa'm ti tisiejekts'e'm, 'yina je kaslanaja'n jiwek.

¹⁰Sijliak'ali kaslajne'n, 'yina akiniejliyi wek ti kaskask'i wita'm. Kasp'ijliusis, jlam'ne ki iyo ti je pini' napo i'nio' ti akanitieje', ajwel ki iyo niwa jlosikis. 'Yiniye ka ijiatayiji ka lajak'iyi pa ka inets'e, jlam'ne ki iyo ti po' ni yits'e.

¹¹I'lijwas ti Corinto jlele'ase'm, ijiate ti lajk'ipa ka sitienkiujnieyeja' ka ijwikie'ase'm. 'Wanjli wita'm 'ni sosik ti 'ajlinitie ask'ioye, ti kiak awo'nase.

¹²'Yaka pet ti as'wet po' yi'i 'niwa sosikis, 'yina jlampet ti asa'am je woye si'weta yi'i niwa asosikis.

¹³Jak je iyoyiji pet ti anip'elisi'niase, awoye 'ate siunie i'nio' ti inip'elisine napo jilis, ti awo'nase 'ate, “Kiak wonak'i siunie awo'nase pit.”

¹⁴Ká aninajayi siunapo ti je itienkiunisi pa Sijwajieti siunie iyoyisi pit. 'Yina ¿'est'iyiji jiat'eje siunie 'es ka inijlene ni siunie je 'es? Ent'a siunie jloma, ¿'est'iyiji ka inijlene siunie ajnatiok?

¹⁵Ja ke inets'e ka ti'wena pa Sijwajieti ka inteliak'i siunie iyo pit ni imosik. Siunie imosik kia'iyojliyi pit je yimi'n siunie iyo pit ni Sijwajieti. Siunie iyoyi ki inamtik je ti'wena pet ka inteliaja siunie iyoyi pit ni kakiujnieta, je itiliaja siunie iyo pit naka ti iyoyi ki inamtik.

¹⁶¿Ma 'est'iyiji ka injwel ka ijnol wita'm pa ka woyisi niwaka Sinia' ji'wuk siu'neje niwa jitiej iyoma napo i'nio? Iyo niwa Sinia' jlamtis ti iyo'ate ti kasjwel ti sa'am ti ji'wukts'e'm siunie Sinia' ti je paj ka 'na'al: “Jayoyi i'witaje jlamis, sek jayi'i jayikiajli'ni. Ja yama ti ja Jiniayeyisk'i'm, sek jayi'i jayo ika kia'lisa'.”

¹⁷Tempi it'imina pi Saka'niona ti iyoye'eje 'ate, iyo siu'nie: “Tonitiejyiape'n siunapo jitiej iyoma siuniwa iyo jika diosisa', tajla' jikiowe'e. Akio' ká ena'yi pi k'iejliyi ti insot, siuti jawoyeyi 'ni i'lij jasimana aselia'm.

¹⁸Ya'am ti ja Asnayek'i'm, sek jane'yi siuti asa'am ja ilisa'ase'm ti asejniaye'ase'm, siu'neje ti ayijniests'ase'm, iyo ni Saka'niona ti lajk'ipa ka ijnojliji ni jijweye.”