Read Iyojwa'ja Chorote Gálatas 1 Bible Online

Gálatas 1 - Iyojwa'ja Chorote bible

Gálatas 1

¹Asampey, japo i'lijwas. Ya'am Pablok'i'm, ti Sinia' jikawok'i'm, ip'isinik siu'nie ti atajiet'ase. Je napoka i'nio' ka siwojwa'n injlojwanikiek'i'm, jla'yi ka sijliu', 'yina paka pi Sijwajieti Jesús, siu'neje pi Sinia', paka ti iniujwa'n kisie'e ti itiajlajni pi a'no'.

²Ya'am, wikie'eyi siu'napo si'lijwas yi' ijiap, atejwila'ase, asa'am ti jleyejyi janak ajnat Galacia, ti Sinia' jilists'ase'm.

³'Esiji ka Sinia', jla'yi pi Saka'niona Jesús ti Sijwajieti, ka imp'elisinape, jla'yi ka inwe'nase'm ni askamankiye.

⁴Sijwajieti Jesús jlam ti iniwe'en ti ijioyi jana 'najlati sakeyis it'imina, kajeyepa ti iyo ka kas'maniti ki iyo ni ajnat ti wuj ti je 'es. Lapakawo ti jitienkiujnieye jla'am pi Sinia' ka kiak inwonts'e.

⁵¡'Esiji ka jlam kiajatajak'i'ni niwa jlomas ka kiak tiwonaja ti tena'a ni ijnonitieyi! Amén.

⁶Jlam sots'iniji ti ajieye'ase ti jiliyeyi pi Sinia', ti jlam ti ta'nase pakayi ti Sijwajieti imp'elisina'. Jlam'ne je itiotie'eje ti jiwoyeyi niwa jlamtis, siu'neje jikiniek'i siunie inamtik ti 'wenayi.

⁷Ijiatataja ti ijwienjli siu'nie inamtik Sinia' tajle, siunie ti awoki samtikie'asepi, siunie it'imina ti kiak jiwoyeyi. 'Nakayi jlam ti po' siunapo ti je inena'yi 'ate, ti tom'ni ask'ioye, ti iyo ka 'noti siuniwa iyone niwa jitienkiujnieyejes, siunie itiliak'i ka woyisi kajlejnate siunie inka'niye ti ijwil pa Sijwajieti.

⁸'Wanjliyi ka yama, ni'ne ka napokaye napo injlojwajnas ti tal poliyi, siuti kiak jayoki ja 'wenayeyi siupi inka'niye ti jajwila iyo kia ti ajwe'lase'm ti 'nelanjie'e, Sinia' je ijlie'en ti jawoyi jitisa' naka.

⁹Pajatak'ipe ti ajwe'lase'm, 'yina ja yikiajle'eje 'nakayi ti jayo'ate: siuti po' ni i'nio' ti jawoyi jlamtikie'ase siunie ti je ijliene ni iyo niwa Sinia' jlamtis iyo ti pajk'i ti yi'ase, ¡Sinia' je ijlie'en ti jawo jitisayi naka!

¹⁰Ji'we'en ti je nak ka iyojyi'n ka sonit papo i'nio' ti 'es ni isijmaye iyo, najata jla'am siunie awojyin'ni ka jlama jla'am pa Sinia' ka soniti ni isijmaye awone ka 'esie. ¡Yot'iyi'ni ka kiak je iwo ti, siuti jayojyi'n naka, ka sonit napo i'nio'! ¿Jot'e ka 'nok'i'm ti yam ti Sijwajieti jikawok'i'm?

¹¹I'lijwas, awotajank'iye ka 'najanayi siu'nie: siunie ti awoyipe yamtikie'ase, je ka intajle ni i'nio'.

¹²Je atajleje paka ne'yi paka i'nioye ka ts'eyasane, 'yina Sijwajieti Jesús jla'am ti tajle it'imina ti sitiant'ieje.

¹³'Yina asa'am 'najanayi pi jiwonak'i ti ya'am Judíok'i'm, jla'yi ti jijieyek'i siukia awoyi ti je aleyi ti akk'i siunie iyo pit napo Judíojos ni yamisi, ti wuj ti ani'net ti ata'yi ilia'm napo Sinia' jilis, ti awotaja ka nitiajnat siunie yamisi pet, paj ti awoyeta ka itij'we ka iliajne'n.

¹⁴'Yina ti je kaspini' siojopo ijniujliejwaspe ti ijiate ti akinieje siukia iyo pit napoka Judíojos, 'yina jwamjla'a ya'am ti 'an pijia'm ti ajyi japo ya'yispe, kajeyepa ti ya'm ijiate ya'am ti je sikiwaliyi'i kiwa jikeyis kiapo 'yaka kijilas mases.

¹⁵Jlamp'a'nepe Sinia' pajk'i pi iyonk'iji ti siwakajlanit ti je ajliyi'n kiu', lapakawo ti wuj ti sip'elisi'n it'imina ti tank'i. 'Yina ti jla'am ti tajle ka kiak iyoyi,

¹⁶sekyi'i naka'ne ti iyo ti sitiant'ieje jla'yi ti i'winkink'i'm pi jlas, sekyi'i ka yoyi pet yamtikieyi siunapo je Judíojos ka ijwi'il pi jlas. Sek taj'leyi siunie awoyi ti je ajoyi paka i'nioye ka 'yaseje'n siupi jayoyi iyo ni awoyi.

¹⁷Ka jakayeyi ka ijio Jerusalenne ka ts'iuyi siojopo inia'an ti injlojwajnas, ya'am ti je awojli'ijyi injlojwanikie'. 'Wenajliyi siukia awoyi jla'm awonayi'ni 'ate ti ajo 'niji Arábiaja, sekyi'i ti apilie'eje 'niji Damáscojo.

¹⁸Najape kiwa najkapis ajwajyi jiwekie'eja ti ajo 'niji Jerusalenne, ti ajoyi ja Pedro. Inkijmayejes times kiwa atej'wisia'm ti sek si'wanjle'e.

¹⁹'Yina je a'we'en siojopo injlojwajnas ijia ka sek ne'yi, ijwienjli jla'am ja Santiago ti a'we'en, Saka'niona ji'niayi ijwienjliyi.

²⁰Ijiate siu'nie iyo 'ni ip'isinik, jlam je awoyi jitieyi'i pa Sinia'.

²¹Sekyi'i ti ataye'eje 'niji siojowa ajnatis jle' iyo'ate Siria, siu'neje jlaja Cilicia.

²²Siukiwa jlomas ajwel'ni japo i'nio' yiji jlaja Judea jakayi ti je itiant'iejejliyisk'i kiu'.

²³'Najata jla'am ti t'ijieyisk'i ti sijwelis ti iyo'ate, “Siunie i'nio' ti tejepe selia'm kiwak siukiwa jlomas yam'niji, 'nakayi yamtiyeyi pit siu'nie 'es ti iyo'otiejepi ka inetiajnate'n, 'naka intankiujnieye ti 'es.”

²⁴Sekyi'i wuj ti iyunitis pa Sinia' ti i'winayis siukia awoyi.