Read Iyojwa'ja Chorote Gálatas 3 Bible Online

Gálatas 3 - Iyojwa'ja Chorote bible

Gálatas 3

¹¡Ijiate wat ti 'ne'liats'ase'm, asa'am ti Galacia jlele'ase'm! Jlam'ne siuti 'eyasanajyi'n, 'yiniye ka ijiatayiji ka astate i'we'en pi Sijwajieti Jesús, sekyi'i ti intant'iejayiji, jla'yi ti 'yiniye ka 'wenayi ti yi'i japa cruz ti tik'iejwata'a. 'Es ti jik'iuyek'i'm, ¡'ye'en, 'nakayi 'yiniye ka poye paka aye'wuye ka 'neyasana', ti it'imina ti ikajyi'n siunie astankiujnieye ti 'es!

²Kiujliek'imna'a siuti ja'yasa aswa'am: ¿yot'iyi'nijpe ti yi'ase janak Sinia' jikimet? ¿Nakat'iyi ti jiwoyeyi niwak iyot'iyipi ni Moisés jika'neyasajnaye, ni'ne ka nakaye jla'am ti jitienkiujnieye ni Sinia' ti je kakiuye niwa jlamtis ti jipe'yaye?

³¿'Ne'liast'e ase'm? Jlam'ne i'nesieyi jana Sinia' jikimet ti 'nelanjie'e, ¡'nakayi jijwelaye'eje ka nakaye ni siunie ti taj'lase ti astankiujnieye ka nakaye ti ja insisieyi!

⁴Jejlikiame kiu' ka astaj enayi 'ateje, jlam'ne je pini' siuniwa wuj ti isis ti Sinia' jikimet iwints'e'm ti kasp'elisinta. ¿Ijiate ti jet'i iniuye'asem'ni niwaka? Ya'am ajwel'ni insisieyi.

⁵Siuti Sinia' iwi'nase'm jana jikimet, 'yina iyoyeyi jla'am ni iyo ti i'winki'n siuniwa je ti'wena ka paja, siunapo i'nio' ti i'winata jlam jnots'inayijits'i jiwek. 'Yina je nak ka intajle siunie ti jiwoyeyi ni Moisés jika'neyasajnaye, 'wenajliyi jla'am ti jiwoyeyi siunie ti je kakiunieyi siunie jipe'yaye.

⁶Tankiuniek'i pa Abraham t'ipi, ti jla'am ijiate ti je 'yakakiu pa Sinia', tempa it'imina ti Sinia' i'ye'en, sekyi'i i'wi'in ti tijnajyi.

⁷Jak je iyoyiji 'esiji ka 'najanayi paka wonayi ti siunapo ijiate jla'am ti Abraham jilis napoka ti je 'yakakiu pa Saka'niona.

⁸Ti pajk'i siuniwa Sinia' jlamtis ti paj ijwi'il ta'a siukia jawoyi ti Sinia' janlesajne'n siupapo je Judíojos ti ja ke inkakiuyis. Ijwilat'ijiampe pi Abraham siuniwa jlamtis ti isis ti iyo'ate, “Ka inlajk'i jant'eminajna'a napo i'nio' yi' ape'e 'ni ajnat ti ja wikie'eyeyi ti Sinia' jamp'elisijne'n.”

⁹Jak je iyoyiji'ni siunapo je takakiuni, Sinia' ijwienayi'i pet pa Abraham, ti kia'iyo je 'yakakiu, ti ip'ilisijne'n.

¹⁰'Yina wikie'eyi siunapo jitiej iyoma siuniwa yiji ni Moisés jika'neyasajnaye, ti ijwil ka 'esie, lajk'ipa ka tiwonaja ti jiwet'ia yi' ape'e. Siuti iyo'ate niwaka inamtis t'ipi, “Je jlase' ni jiwet'ia jawoyi siunie i'nio' ja ke ijiatayi ka woyi siuniwa iyo ka tiwoki ni inka'neyasajnaye.”

¹¹'Yina 'yakajk'i ti siunie i'nio' jitiej iyoma ti iyoyi siunie inka'neyasajnaye iyo ka tiwoki, Sinia' je ilisajne'n naka. Jlam'ne inamtis iyo'neje 'ate, “Siunie i'nio' Sinia' ilisajne'n, lapakawo ti nak it'imina ti je takakiu, nak ja ji'wasankiye japoye jla'am.”

¹²Jlampet siunie Moisés jika'neyasajnaye 'wenayi pet je iyo'ate ni siunie ti je takakiuni, 'yina najata jla'am ti iyo'ate niwa inamtis t'ipi, “Siunie i'nio' ijiate ti 'yakajli ni inka'neyasajnaye, nak ja'wasana.”

¹³'Yina Sijwajieti ijiut ts'iji siunie siliaye ti atajlajaja ni inka'neyasajnaye t'ipi, kajeyepa ti iniwojwa'n jilianikie' ni siunie siwet'ia iyo, ti iyo ka kasjwajiet. Siuti iyo'neje 'ate niwa Sinia' jlamtis, “Sinia' jiwet'ia jane'ne siupi i'nio' ti ja tena'a pijia'm japa a'la'.”

¹⁴Siuti Sijwajieti kiak iniwone, 'ate iyo ni 'najanayi, lapakawo ti iyojonk'iye pet ka neyi siunapo i'nio' ti je Judíojos siunie 'es ti ijwijla'm pa Abraham. Kajeyepa ti ijiate ti je akakiuk pa Jesús ti paka ti injwajieti ti Sinia' ijliu', sekyi'i kaswikie'eyi ti yits'e janak Sinia' jikimet siojopa ijwilt'ipi jla'am pa Sinia'.

¹⁵I'lijwas, siunie jayoyi ti jayamti, jayijnape'ni wek siunie awoki ti i'niolts'e'm: Siuti po' ni iyo'ate, “Kiak awo ka yoyi”, sekyi'i jle' yinajap pi iyo pi jip'esinik ti ilisane. 'Yina yi'i ti yi'i, lajk'ipa ka wo ka inkajyi'n ka netiajnat, jla'yi ti lajk'ipa ka inene ape'e paka ink'ieye ka jlamtisie'.

¹⁶Ijiatjliyi, ti Sinia' iyone'ate pa Abraham, “Jawi'na'm, siu'neje pa jantajla'm papo ales.” 'Yina je iyo'ne 'ate ka impejlanit'i ape'e, ka ne'yi niwa Sinia' jlamtis, “ales siunapo ti jantaj'l awa'm”, 'yina ijwil ti ijwienkit, “siu'neje pa jantajla'm papo ales”, paka pi Sijwajieti ti ijwi'il.

¹⁷Siunie ajwel'ni sek ijio'weyi, ti Sinia' yikiajle pi ji'lij ti jlam pak je iyone wek ilisaniji, sekatajak'i kajeyepa ti 'yakajk'i. 'Yina sektaj'leyi paj ti cuatrocientos tréintaja (430) kiwa najkapis kiwa tijwajyi jiwekie'eja t'ipi ti po' ki Moisés jika'neyasajnaye, 'yina kapakayet'iyijpe ka into'm ape'e ka inetiajnat siunie Sinia' iyont'iyijipi pa Abraham ti ijwijla'm, ka 'nakayeyi pet ka 'wina ka laja lajaye.

¹⁸Siut'itie ka nak intajle ni Moisés jika'neyasajnaye iyo ka tiwoki siunie Sinia' iyo ka wents'e'm, je kiak iyotaja'ni pet ka poye niwak jlamtis pi Sinia' ti iyo'ate, “Jawi'na'm”. 'Yina lapakawo ti Sinia' pajk'i ta'a ti iwijna'm pi ji'lij pa Abraham ti ijiate ti ilisaniji, ti kiak iyone ti ijwijla'm ti iyone'ate, “Jawi'na'm”, it'imina'ne ti jla'm iwinayija'm jiwek.

¹⁹'Yina ¿tempa tejeye nak Moisés jika'neyasajnaye? 'Yaka ti je jla'am ka na'an ka poye, jlam t'opijietaja wek siunie ijiate ti inia'an, ka 'nakajanit pet ape'e ni siunie inke'. 'Yina jijweye po', jak je iyoyiji paj ti yiyeyi siojona jloma ti 'nesa pet ni siunie tajla'm pi Abraham jika kia'lis, jla'am ti tijna'yi siupa Sinia' ijwil t'ipi. Pak inka'neyasajnaye t'ipi papok tijna'yi pet papo injlojwajnas poli jlele ti ijwijla'm pa Moisés, sekyi'i Moisés ijwilayi pit papo i'nio'.

²⁰Jla'am pet ti jla'am pi Sinia', siupi iyone pa Abraham ti ijwijla'm, nak je iyo wosa' ka injwe'el. Inijnajiet'e jla'am, jla'm pa Sinia' siupi iyoyi.

²¹¿Mi ajwe'el ni Moisés jika'neyasajnaye ka inta'yi ilia'm siunie Sinia' ijwil pet? ¡Je'e! Jla'm ijiatayi ka siunie inka'neyasajnaye ji'wasankiye iwejna'm pa i'nio', nak ijiatayi'ne pet ka Sinia' inlesajne'n ni i'nio' 'yina ti iyoye siunie inka'neyasajnaye 'yijie'ne ka woyi.

²²Sinia' jlamtis ijwi'il ti iyo'ate wikie'eyi napo i'nio' ti siunie inke' jikipijnas, 'yina jlam je iyo. Jak je iyoyi siunapo ti je 'yakakiu pi Sijwajieti Jesús, napoka ti Sinia' janwejna'm siunie ti pajk'i ti ijwi'il.

²³Siuti sakakiujnieye pojliyi'ijyi pi Sijwajieti Jesús siunie inka'neyasajnaye iyo jikipijnasats'e'm paj ti yiyeyi siojona jloma ti 'yakaja siunie já akakiunieje.

²⁴Siunie inka'neyasajnaye i'yents'e'm paj ti yiyeyi siojokia jloma ti 'nes pi Sijwajieti, jak je iyoyi ti Sinia' kaslesajne'n 'yina ti je akakiuk pi Jesús.

²⁵'Nakayi, ti je akakiunieje, sekyi'i je awak'ne kiajwe naka inka'neyasajnaye. Iliyeyi ti i'yents'e'm siunie awoki.

²⁶Ijiatjliyi, siuti je kakiuye pi Sijwajieti ti jini'nopijietayiji, sek jitiajla'yiyi ti inwikie'eyeyi ti jilists'ase'm pi Sinia'.

²⁷'Naka 'neje jla'am siunie ti inajiejnasts'ase'm, sekyi'i ti injwanjliyeyik'i pi Sijwajieti, jiwoyeyi as'wuye ti jla'am.

²⁸'Yina je a'yena ka Judío pa, ni'ne ka nakaye ni je Judío. Je a'yena ka inkipinikie' pa, ni'ne ka jeye, siu'neje ka ayinieja' pa, ni'ne ka asejniaye japa. Kajeyepa siuti jini'nopijietayi ni Sijwajieti sekyi'i ti ijiatayi ti injwanjliyeyik'i.

²⁹Jak je iyoyiji, siuti nak jitiajlayi ni Sijwajieti, je kast'ayiji'n pet ti asa'am ti jitiajlajia'm siupapo Abraham jilis t'ipi, asa'am ti tijna'yase'm siunie Sinia' ijwi'il.