Read Iyojwa'ja Chorote Gálatas 4 Bible Online

Gálatas 4 - Iyojwa'ja Chorote bible

Gálatas 4

¹Ja'yakajanitk'iyi 'neje: Siunie i'nio' ti 'yalata, ti po' siupuwa jikijmatis ti laja po', je 'wena paka totkinaja, totkinaja pi jlas ti po'. 'Yina siuti mawat kia'leje ka tekiajlaja, siupapo jikawos pi jinia masa pi iyone, 'yina kiak iyo pa kia'le kajeyepa ti je isijlijli'ijyi. Jlam'ne siuniwa ja tiwenaja'm lajk'ipa ka intajlane, 'yina tijniejieta'a jla'am.

²Lapakawo ti po' siunapo i'yena siupuwa ja jikijmatisa' paj ti yiyeyi pa jloma yitijni k'iye jla'am pi jinia masa, ti isijliyetaja.

³Siuti pajk'i sa'am kiak awoki, iyo napok kia'lis ti ajwel'ni, awak kiajwe siunie jijweye iyo pit niwa je 'yaka pini' yiji ni jloma ti iyo jikipijnasats'e'm.

⁴Jlampet ti yiyeyi siukia Sinia' yitijni, sekyi'i ijliu'ne pi jlas, yiji'n ti tajla'm japa i'nioki yits'iji, jla'yi ti iyoyi siupi iyo ka tiwoki pi Moisés jika'neyasajnaye.

⁵Kajeyepa iyo ka kasjwajiete niwa kasla'nitieje, siu'neje ti takat'i'n sitipe'e wikie'eyeyi ti sam ti jikipijnats'e'm nak inka'neyasajnaye. Je nakata siu'neje ti nak it'imina ti Sinia' iyo jilisats'e'm.

⁶Sekyi'i ti Sinia' 'yakajanitiek'iyi ti jla'am ti jilists'ase'm, 'yina ijliuye'ase siojona jlas jikimet ti yijits'i niwa askiojwa'l, ti iyo'ate, “¡Inia', Inia'!”

⁷'Yina je pa inkipinikie'a'm, 'yina jijnieyek'i ti Sinia' jlajts'a'm, jak je iyoyi siuti kia'iyo ti jlajts'a'm ijiut'ia siuniwa yiyi.

⁸Ti pajk'i asa'am je intant'iejayi pi Sinia', puwakata t'ipi jla'am siupuwa jijwela ka diosisa', 'yina je ijiat ka diosisa', ti iyo jikipijnasa'ase'm.

⁹'Nakayi siuti intant'iejayi ni Sinia' - ka iyot'i jla'mate ti Sinia' itiant'ie'ase - ¿'wenat'e ka apilieyi niwak siuniwa injweyejes ti je 'yaka, ti po' ape'e 'ni ajnat, ti laj jijweyeja' jla'yi ti laj lajaye? ¿Yot'iyi'ni ti jlekiajlayeyi'i ti jleye kiajwe niwaka?

¹⁰¡Niwa jlomas, niwa we'lajas, niwa najkapis ti jiwo aslakijnieyeja'!...

¹¹Wuj ti sikiwita ka lajak'iyipa ka insisieyi ka siukia awoyi ti akijme'n aska kiowe'e, ka jla'm inilajni wek'i ape'e.

¹²I'lijwas, wuj ti anip'elisi'niase ka woye 'ate siu'nie aniwone. Ka woye pet 'ate siunie aniwone ti anitewitani asek'i. 'Yina 'najanayi pi jiwonayi ti ijiate ti je lajk'ipe ki awo ti je ts'es ti 'nelanjie'e, it'iminape ti awo yamtikie'ase ti ajwel niwa Sinia' jlamtis.

¹⁴Ka kia'iwo ka 'omaja ijyilia'm siuti si'wenaye ti je ts'es ti kiak anine'ne ti amti'yase'm. 'Yina kiaka'ne ti ajwe'el ti ijnejlita, jla'yi ti je siwonayi 'ate siunie i'nio' jiniliak ti ijio'wase, 'yina siwonayi 'ate ni injlojwanik poli jlele ti Sinia' ijliu', siu'neje ti iyot'e 'ate ti jla'am pa Sijwajieti Jesús.

¹⁵'Ye'en 'nakayi, ¿tepi jiwonayi siojo jiwoyeyipi ti inkasajyi'n? Atankiunk'i siukiwa jlomas ti je t'ekiyi siukia jiwoyeyi ka wojliyeyipi ka 'najanayi paka wonayi ka alanajyits'i niwa astate, ka wenayek'i'm.

¹⁶'Nakayi, ¿astajiejwak'i'm, kajeyepat'e ti amtiyi ask'ioye siunie ijiatk'i?

¹⁷Napoka, siunapo i'nio' ijwi'il ka ijiatayiji ka iwojon ask'ioye, jlam'ne 'wenayi siunie iyo ti ijliak'alisi ti iyo ka ine'nase'm siunie je 'es. Naka jla'am ti ilisanis'ni asap ka aleyi ijyik'i ti ya'am, sekjane'yi ja'we'en ti kiak jawo ti jansakana, ijiatjliyi ka kinieyets'inie'e siunie iyoyisi.

¹⁸Ijiate, je ajwel ka je 'esie siuti kiak iyo pa ti itiliaja ka k'iejliyeyi paka iwone papo ijia, 'yina awo'ate siuti 'es pi iyone. 'Yina 'esiji ka je ileyi siupi iyoyi. Je 'esiji ti ijwi'il ka woyi, siuti i'winayeta ijyilia'm ti jiwekie'eja'aja ti ijwil ka injlak'ajlap'ni. Naka'ne ti ajwel ti wuj ti je 'es.

¹⁹Ilis, yikiajlayi'iji siu'nie awoyi ti wuj ti alate ni itienkiujnieye, ti a'tiek'i astepe'e. Awoye 'ate siojona i'nioki ti k'iejli jlas yokie, ti ijliak'al'ni 'yina jajiok'i'ni siunie ti janilayiti, ijiatjliyijna'a ka wakajla pi Sijwajieti aswa'am.

²⁰¡Ka yojliyi paka yi'ase ta'a, ka poye'eje paka yamtiyi ask'ioye siunie jiwoyeyi ka jwi'lase'm, kajeyepa ti wuj ti awoyi ijliak'aliye siunie jiwoyeyi siu'niwa jlomas!

²¹Siuti asa'am ti jiwoyeyi ka aye kiajwe naka Moisés jika'neyasajnaye, yot'iyi'ni, ¿jet'i jipe'yaye siunie iyo ni inka'neyasajnaye?

²²Siupa Abraham timesjimpe papo jilis. Ijwienjli siupa tajleje siojopa jikawoki t'ipi, 'yina siupa jikiecha pak tajleje siojopa jik'iemjlayi.

²³Siupa jlas ti tajleje japa jikawoki, nak tajle pet siunie iyo ni i'nio' ti yiyeje'n. Jlampet siupa jikiecha tajleje pet siupi iyot'iyipi pi Sinia' ti jla'm je iyo siupa ijwijla'm pa Abraham, ti pak siupa tajleje pet siojopa jik'iemjlayi.

²⁴'Yina po' siuniwa ijwi'il ti 'yakajanit ts'ijiye. Siupapo times asejnia times pet siuniwa 'yakajanit ti ijwi'il siunie Sinia' jawoyi. Siojopa tikijnaki Sinaí japak ti'yenajap pet japa Agar ti jla'am ti jilis siupapo inkipijnas.

²⁵Agar iyo'ate siojopa tikijnaki yi' Arábiaja. Arabia iyoye pet 'ate japa Jerusalén 'nakayi, kajeyepa siupapo yiji japak isi' iyoye 'ate pet papoka Agar jilis t'ipi, ti inkipijnas.

²⁶'Yina siojopa Jerusalén ti yi' poliyi je inkipinkiye'ne, 'yina sa'am ti jilists'e'm.

²⁷Kajeyepa ti iyo'ate niwa inamtis t'ipi: “¡I'nioki a'am ti je inkiu'ujnie'n, a'm ti je paj ka ales poye, nikanit'ni! ¡Kets'ijiap ti jinikanit'ni! A'm ti ataj je 'wanjle'e siunie iyo niwa jlajlas iyo, japa ti kia'iyo ti jlas yiji'n. Jlampet siojona tiliki'ni jilis ja 'lojwa pet, 'yina ja inka'm ape'e napo jilis pet siojona asejnia ti jik'iemjla po'.”

²⁸I'lijwas, asa'am siunapo jilis pa Abraham ti Sinia' ijwijla'm, jiwoye 'ate iyo pa Isaac t'ipi.

²⁹'Esiji ka ataj enayi 'ate siu'nie: iyo'ate siupuwa jlomas ti siupa kia'le ti tajle pit siunie i'nio' ti ne'waja'm siunie jikiecha ti tajle pit siojona Sinia' jikimet ti 'es, 'yina ka 'wena iwo wata'a 'nakayi.

³⁰'Yina Sinia' jlamtis ti yi'i ni ji'wet iyo'ate, “Jwane'e ni jlas siojona inkipinki ti jajlo', 'yina ti je jla'am ka ijna'yi niwaka jikijmatis siunie jlas jana je inkipinki.”

³¹Ijiatjliyi, napo i'lijwas, ijiate siu'nie awoki ti je set janaka inkipinki, 'wenajliyi jla'am siojona ti je inkipinki, janaka ti jilists'e'm.