Read Iyojwa'ja Chorote Gálatas 6 Bible Online

Gálatas 6 - Iyojwa'ja Chorote bible

Gálatas 6

¹I'lijwas, siuti ji'wena' ni akiecha ti iniuyiji'n jayo ti iyoyi siunie je 'es, 'yina asa'am ti int'onieyi pijia'm jana Sinia' jikimet, p'elisina', nejia'n pijia'm. Noyeje 'nakayi ti jaleyi ni siunie je 'es, sekyi'i janapilieyinie'e ni siunie tijnajyi ka woyi. 'Yina joskiye, nilesaniji ja 'nakayeyijna'a ni siunie inkajejlasaye ja ke inkajli pet.

²Ká ajwankite ni akiecha ti po' pi yiyi. Noyeje ja inkiajatajak'i'ni ti kiak jawoyeyi. Siuti kiak jawoyi, ijiate nak jawoyeyi ni jika'neyasajnaye ni Sijwajieti.

³Siuti po' ni askiecha ti ijwil ka ijia jika anechiyasa', 'yina jlam'ne lajk'iyipa ka woyi, jla'm iyoyi. Jlam jla'am ti inik'emijiet.

⁴Ja inkiajatajak'i'ni ti jani'yena siunie jiwoyeyi. 'Yina siuti ja'wena ti 'es, ijiate jlajma ká anitonitieyijna'a wek, 'yina ká a'yena siunie iyo napo a'lejwas.

⁵Jlampet siuniwa jikimet ni i'nio' jlampet ti tijna'yi.

⁶Siunie i'nio' ini'neyasane niwa Sinia' jlamtis, 'esiji ka kia'iwo pit janekiajle ilia'm siuniwa isis kawoyi, ti janoyeje ni siunie jika anechiyas.

⁷Ká anik'emijieta. 'Esiji ka lajk'ipa ka injwel ka ilaki pi Sinia', 'yina je 'eyasanayi siunie ti iyo'ate, “Siuniwa 'yut'isia'm ni i'nio' ti takawijna'n, niwaka janla'ne pet ka inkimtaja pa jlak.”

⁸'Yina kia'iyo'ni pet, siunie ti wuj ti iyoyi siuniwa ti jla'am ti tajle ti itiliaja ka woyi, ijiate yamjliyi pet siunie jiliayeja'. Jlampet siunie iyoyi siunie iyo janak Sinia' jikimet, kiak jawo'ojyi pet jankajliji pet siunie tajla'm janak Sinia' jikimet, janaka ji'wasankiye ti laj jlaja.

⁹Nak it'imina ti kia' awoyi, ti awo'ate ja 'yakatataja ti janaja ni siunie 'es. Kajeyepa ti siuti jwajla'a jayoki, ja akajlajyi siunie 'es ti tajla'm siunie sikijmaye, ka netieje janak jloma.

¹⁰Jak je iyoyiji ti kiak awoyi ti awo'ate, ti akajlaja ti awoki, 'esiji ka iniukieje napo si'lijwas ka winaja'm siunie 'es. Ja kat'ajayipe ti ja 'wina siunapo si'lijwas 'neje ti itienkiuni pi Sijwajieti Jesús ti je 'yakakiuyis.

¹¹¡'Yejne'n ki iyo 'niwa ikajwukis ti wus ti ya'am ti 'otate, i'lijwas!

¹²Siunapo i'nio' ti 'yijie'nase'm ka kiak iwo'nase iyo jlamis, ti t'isie'n jiwa yiwa'aja'n, tepa jawo ka kiak je iwoyisi, kajeyepa ti iyo ka 'esieyi wita'm napo i'nio'. Jla'yi ti 'yijene pi iyone ti, siuti janjwankitis ka nekisi pet ki iyo ni Sijwajieti ti 'ya'al ti yi' ape'e japa cruz, ti janjwelis ape'e 'ni ajnat ti ja titiajlataja.

¹³'Yakajlitieje ti jlamisieta napoka siunapo yamisi pet naka, 'yina je iyoyisi niwaka iyo ka tiwoki ni Moisés jika'neyasajnaye. Siuti kia'iyo ti 'yijienta'ase'm ka kiak awoyeyi iyo jlamis ti t'isie'n jiwa yiwa'aja'n, 'yina naka jla'am ti ijialasis ti iyojonk'iye ka inkanitk'i wita'm napo i'nio', ka tonitieje ka insakana ti kiak inwonayi ti iyoyis ajwukisa'.

¹⁴Jlam pet ti ya'am lajk'ipa ka k'iejliyeyi ka initoniti, 'wenajliyi pet ki iyo jana Saka'niona Jesús ti Sijwajieti jika cruz ti anitoniti. 'Yina lapakawo ti nak it'imina ni iyo ti 'ya'al pa Sijwajieti, siuniwa wask'i'nelaja yi' ape'e 'ni ajnat iyo pet masesie itieyi'i pet ti ya'am, 'yinit'iyi ka its'iejwat'e pijia'm jana cruz niwaka. 'Yina siupet ti ya'am, kiak awoyi masak'i'm pet jitieyi'i yi'i niwaka wask'i'nelaja ti yi' ape'e 'ni ajnat, 'yinit'iyi ka kia'iyo ka sik'iejwataja pijia'm japa cruz.

¹⁵Ijiate ti laj lajayeyi siut'itie ka kiak iwo pa i'nioye ka kiak tiwonaja ka t'isie'n jiwa tejwak'i, ni'ne ka je ineyi naka. 'Yina jla'm ijiate jla'am siunie ka inwo ink'ieye ni i'nio', nak ijiate ti laja po'.

¹⁶Yi'i papo, siupapo ti ilisa'n naka siunie ajwe'el, siu'neje ni iyo napo ti ijiate ti Sinia' jilis, napok 'esiji ka inkamajaspe, jla'yi ka Sinia' imp'elisijnempe.

¹⁷'Nakayi ja lajak'ina'a pa ka intom'ni its'ioye, jla'yi ka siliakiyi. Siuniwa ijio'ni ijyik'i ji'wetis ki tiwonak'iji ti sajak'ni, 'yina niwaka ti 'yakajanit ti ya'am ti jikawok'i'm pi Jesús.

¹⁸'Esiji ka Sinia' jikap'ijliuskiye inejyits'i niwa askiojwa'l. Amén.