Read Iyojwa'ja Chorote Efesios 1 Bible Online

Efesios 1 - Iyojwa'ja Chorote bible

Efesios 1

¹Asampey, i'lijwas, ya'am Pablok'i'm, Sijwajieti jijliujwanikk'i'm, siunie ti ijiate ti Sinia' jikawo. Ip'isinik atate'ase, ti asam ti Sinia' jilists'ase'm pet, ti jleyejyi jana Éfeso, asam ti je paj ka aleyeyi ti jiwoyeyi ni 'es, ti jikinieyi ki iyo pi Sijwajieti Jesús.

²'Esiji ka Sinia', jla'yi pi Sijwajieti Jesús ti Saka'niona, imp'elisinape, jla'yi ka jikamankiye insa'yi astepe'e.

³Jayunitie ni Jinia' na Sijwajieti Jesús ti Saka'niona. Siuti ani'nopijietayi wita'm ni Sijwajieti, naka'ne ti Sinia' wuj ti kasp'elisijne'n, 'yina iwints'e'm wikie'eyi siuniwa isis tal poliyi.

⁴'Yina ti pajk'i ta'a ti kastajets'i, ti 'nelanjie'e, ti je wakaljli'ijyi 'ni ajnat. Lapakawo ti pak kasts'isisi pi Sijwajieti ti ani'nopijietaja, it'imina ti kasts'isis jitieyi'i, laj sitisayi ilia'm ti jla'am. Kajeyepa ti wuj ti kassemi'n,

⁵'yina ti pajk'i ta'a ti kastajets'i ka ijiatak'iyi ka jilisats'e'm, pak kasts'isisi pi Sijwajieti Jesús siupi iyo pit ti inilayiti. Iyo jla'am ka woyi ni Sinia' 'naka'ne siu'nie.

⁶Naka'ne ti it'imina ti awunitie ni Sinia' ti iwints'e'm siunie 'es, naka ti wuj ti kasp'elisijne'n pakayi ti siupi iyone pi jlas siupa ti wuj ti yimi'n.

⁷Jla'am pi Sijwajieti ti initojmat sitipe'e 'yina ti iyo kajwieye it'imina ti tisa'ni ki ji'woyis, sekyi'i ti initiajnata kiwa sakeyis. ¡Ijiate ti je jlase' ni jikap'ijliuskiye ni Sinia'!

⁸'Yina naka'ne ni siunie ti isiayi sitipe'e iwints'e'm ka kasts'ajajne'n, jla'yi ka kastant'ieje niwa wask'i'nelaja.

⁹Jla'yi ti 'yakajanitts'e'm siunie iyo ti 'yaka ape'e, jlamt'i ijiate ka iyo'ate, siunie ti pajk'i ta'a ti iyo ka iwoyi, 'naka siu'nie:

¹⁰Siuka netiejenie'e janak jloma, Sinia' pajk'i ti yikiajle pi Sijwajieti ti ja nakaye ti janiojokiji wikie'eyi siuniwa yi' poliyi, jla'yi ti sa'am ti awak'i 'ni ajnat, kajeyepa ti ja jlama ti ja kas'ye'en.

¹¹Sinia' pajk'i ti kast'ajets'i ti 'nelanjie'e, ti iyo ka iwo jika kia'lisats'e'm, ka lajak'i siunie awoki ti ani'nopijietaja ni Sijwajieti, 'yina pajk'i ta'a ti iwiakajlanit siunie iyo ka woyi, 'yina naka'ne siunie iyoyi ti 'yakaj. 'Yina ti jla'am ti jilisajna' wikie'eyi siu'niwa wask'i'nelaja po'. Ka injlan wata'a siunie iyo ka woyi ti itiliaja.

¹²Lapakawo ti lajk'ipa kant'emina ti kasnajnat ti isimts'e'm naka ti iyo ka je iliki ni sinijijwiye ka yina'a pi Sijwajieti. Ka iyunitie ni Sinia', ti lajk'ipa ka ijnojliji, ni iyo ni jijweye.

¹³'Yina kiak jiwoyeyi pit, ti 'nelanjie'e jipe'yaye niwak inamtis ti ijiatk'i, ti ijwi'lase'm naka asjwajieti, sekyi'i ijiate jik'iuyeyi, kajeyepa ti je kakiunieyi ni Sijwajieti, 'yina sekyi'i jini'nopijietayiji'ne wita'm ti jla'am. Sekyi'i Sinia' yina aswa'm jana jikimet ti 'es siojona ti pajk'i ta'a ti ijwil'ni, ti iyojonk'iye ka 'nakaj ti ijiate ti jla'am ti aska'niona.

¹⁴Siojona jikimet ti 'es janak ti Sinia' iniajnatts'e ta'a k'iye siunie janwents'e'm, 'yaka ti sikimeta siunie ijwi'il. Jlampa ka wakajlana'a siunie jawoyi ti janjwajiete'n napo tijna'yi, napoka ti pajk'i ti it'iajets'i. Sek jane'yi ka inwunitieyisiena'a ni Sinia', ti lajk'ipa ka ijnojli ti jijweye po'.

¹⁵Jak je iyoyi siuti ajieye'ase ti jikinieyi ti ijiate ti jitienkiujnieyi ni Saka'niona Jesús, jla'yi ti asemijnaye jlena'yi wikie'eyi napoka Sinia' jika kia'lis,

¹⁶'yina sek taj'le ti je paj ka iliyi ti inikanitieyi ekiajle pi Sinia' kat'ajayi ti awoyeta 'yejlayeja', sekyi'i ti wujwa'aja ti atankiu'niase'ni.

¹⁷Ti 'esp'an pa Jinia' pa Sijwajieti Jesús ti Saka'niona, Sinia' ti jijweye po', ka ijiatayi ka i'neyasana' ka 'najanajyimpe, jla'yi ka intant'iejayi niwa wask'i'nelaja ni iyo siu'nie awonaja. Sek jane'yi ka ijiatayijijna'a ka intant'iejayi ti jla'am ni Sinia'. 'Nak 'ajleje ni Sinia'.

¹⁸'Esiji ka Sinia' 'nakajanit jitiowiji ni asosik ja 'nakayi ti ja 'najanayi paka wonayi, jla'yi ka wujwa ka intant'iejayi siunie tanets'e naka ni sinijijwiye, siu'neje ki iyo niwa isis ti iwijna'm napo jilis, ti wuj ti ip'ilisi'n,

¹⁹siu'neje ni jijweye ti iwints'e'm, sam ti je akakiuk. Naka ni siunie jijweye 'yaka'm ape'e wikie'eyi niwa wask'i'nelaja. Sekyi'i ti ijiatayi ti je istieyi siunie ti jijweye po' ti jla'am,

²⁰jakayi ti iniujwat kisie'e ni Sijwajieti, ti tajla'm ni a'no' ti yinaja'n 'niji jijweyeje, 'niji poliyi.

²¹Yikiajlayi ka jlama ka inkie' ape'e niwaka jijweye iyot'iyi siupapo yi' poliyi. Siunie ji'wet pet ni i'nio' ti anechiyas wikie'eyi ti tekiajlaja. Je nakata ka jijweye poye ape'e siu'nie ajnat siuniwa jlomas, kia'iyo jijweye po' ape'e siunie ajnat ink'ieye ti jana'am.

²²Wikie'eyi niwa wask'i'nelaja ti Sinia' yin kiajwe ni Sijwajieti, naka ti iyo jletikie' pet napo Sinia' jilis,

²³jla'yi ti napoka ti 'yiniye ka nakaye Sijwajieti t'ajwes pet napoka Sinia' jilis. 'Yina ti Sinia' jilis ijwienjliyik'i ni Sijwajieti, sekyi'i 'yiniye ni i'nio' ti wakal, iyoye'ate ni t'ajwes ni i'nio' ti po' jana jletik. Sekyi'i Sijwajieti yin wita'm ti ijniujlieta'm wikie'eyi niwa wask'i'nelaja.