Read Iyojwa'ja Chorote Efesios 2 Bible Online

Efesios 2 - Iyojwa'ja Chorote bible

Efesios 2

¹Ti mawat lajk'iyi paka woyeyi ti jleyejyi ni askakiujnieye, jla'yi ti jleyejyi ni aske', jiwoye masesie',

²kajeyepa ti jiniuyek'i siunie iyo pet ni je 'es. Jikinieyi ni jikijmaye iyo ni ajnat, jiwoyeyi siunie 'yijie'nase'm ka woyeyi ni iyo ni i'nio' imosik, ti jla'am ti iniwojwa'n anechiyasa', siu'nie 'neje ti yiji na jloma, 'yina naka ti iniajne'n k'iye siunapo i'nio' je iyo kank'iuye niwa Sinia' jlamtis.

³Siuti sa'am, sam pet ti Judíojosts'e'm, kiak awoki yits'epi pet kiwaka, akinieje siunie kasteliaja kayoki, awoki siunie 'yijients'e'm ni ts'isie'n kayoki, siu'neje ni iyo ni sikiowe. 'Yina ti jla'am kiak awoki ta'a ti je kasts'isis, jak je iyoyiji ti je kasjla'an pet siunie Sinia' jiwak ti yints'e'm, awok'iate papo ijia i'nio' ni yits'e.

⁴Ijiate pa Sinia' ti wuj ti takap'ijliuski, it'imina ni iyo ti wuj ti kassemi'n,

⁵siuti mawat je atajlaja ni sake', ijiate kasts'ajle'n kajeyepa ti awaki naka. Jlam ti kasjwajiet it'imina ti kas'wasajne'n 'neje, iyoye'ate siupi iyone pi Sijwajieti ti yikial pijia'm ti tajli pi a'no'.

⁶Sinia' yikialk'i pijia'm niwa sisiak'alis, ti tajla'm niwa a'no'ol, iyo'ate iyo pa Jesús, ti yikial pijia'm ti tajle pi a'no', sekyi'i kassenak'iji'n ti awakiape'n ts'iji poliyi.

⁷Naka'ne ti iyo pa Sinia' ti iyo ka'wenkina ts'iji siuniwa jlomas atayeje napo i'nio' ni jikap'ijliuskiye iyo ti wuj ti kasts'isisi pa Sijwajieti.

⁸Ijiatjliyi, ka lajak'i ki iyo ni jikap'ijliuskiye, it'imina ti jijwaye ti po 'neje ni astankiujnieye. 'Yina je'ne ka asama ka akajlayi ka pak int'emina ka woyeyi siupa 'es ti askijmayeja', 'wenajliyi ti iyo as'wajieta' pa Sinia'.

⁹It'imina ti je 'es ka poye pa ka initoniti, kajeyepa ti je niwaka ka inlesa'n ni i'nio', ti Sinia' ijwiejiet.

¹⁰Sinia' jlam ti jilisajnats'e'm; 'yotats'e ka iyoki siuniwa sikijmayejes ti isis ka lajak'i ki iyo ti ani'nopijietayi wita'm pi Sijwajieti Jesús. 'Yina je ijlie'n pet siupi iyot'iyipi ti 'nelanjie'e, iyo ka kiak iyoki siu'niwa jlomas.

¹¹Tankiuniek'i, siuti pajk'i, asa'am ti je Judíojosts'ase'm, ti lajk'i pa kawo'ate ti jlamis napo Judíojos ti yiyi naka ti t'isie'n jijwa'l tejwak'i. Siunapo i'nio' iniwunitisi ti itimisi naka, ti t'isie'n jiwa tejwak'i, iyo'nase 'ate ti injwela, “Siunapo i'nio' je iyo'ate awoki, ti sam ti kaswakal.”

¹²Kiwak jlomas ti Sijwajieti je yi'asap, 'wena'asem'ne ki iyo napo Sinia' jika kia'lis pet. Napo Israel jlele intojwajiape'n, jak je iyo siunie iyot'iyipi pa Sinia' ti iyone papo jika kia'lis je asa'am ka ijna'yase'm. Je intant'iejayi siunie ti ijiate ti Sinia', jak je iyoyiji ka poye paka woyeyi ka asnejejwiyeyi poye, ti jleye'yi siu'nie ajnat.

¹³Ijiate ti je ijnanjliyejiape'n ni Sinia'. 'Nakayi je pa kiak iyoyeyi, kajeyepa ti insisieyi pa Sijwajieti ti jlam ti tisa'ni pi ji'woyis ask'ioye. Initojmat astepe'e ti 'ya'al ti yi' ape'e japa cruz, it'iminayi ti je intojwajiape'n ni Sinia'.

¹⁴Sijwajieti jla'am ti sakamankiye. Jlam ti kassotk'i wita'm ka 'nakayeyi ka injwanjlik'i siunie awoki sa'am ti Judíojosts'e'm siu'neje pet ti asa'am pet ti je Judíojosts'ase'm, ka je ani'wenakitie. 'Yina ti ijwienjli jla'am ti 'yakajla'm ti 'yajlinitia'm siunie ti to'm ilia'm, iyo ti ini'wenakit napo i'nio'. Pakayi ti 'ya'al ti yi' ape'e japa cruz,

¹⁵'yina sek jlaj yi'i ki Moisés jika'neyasajnaye, siunie jikijmaye iyot'iyipi siupapo taka'neyasane. Naka'ne siunie ti sa'am Judíojosts'e'm siu'neje ti asa'am pet ti 'wena'ase'm, kaswom wita'm ti iyo ka kasjwanjlik'i, jla'yi ti jla'am ti jitis naka 'ni awoki ti ink'iejyists'e'm ti awakiap. 'Yina kiaka'ne ti wakajla siunie inkamankiye ti jlam ti ilisane.

¹⁶Jla'yi ti ka lajak'i ki iyo ti inilayiti ti yi' ape'e japa cruz ti 'ya'al, sekyi'i ti kasts'isisk'i wita'm. Aninenaja 'ate it'iminayi ti akajmak ti awokieyi kats'iukie ni Sinia', ti kasjwankitk'i ti iyo ka kasjwanjlik'i.

¹⁷Sijwajieti ti na'am, nameje wikie'eyi napo i'nio', siunapo ti je jnanjlajapenpe ni Sinia', siu'neje napo je tojwape'n ta'a pi Sinia', ni jika'niye ti 'es ti ijwi'il ni inkamankiye.

¹⁸Sijwajieti jla'am ti iyo si'niayeja' it'imina ti a'yakanaja ni Sinia', ka lajak'i'ne wek jana Sinia' jikimet ti 'es ti iniuyits'e'm ti je kas'wenakite'n.

¹⁹'Nakayi je pa jiwoye 'ate napok siunapo i'nio' ti ijiateje ti 'wenayi, ka je as'weta paka aye'yi. As'wet ijwienjliyi siunapo Sinia' jilis 'yina je jika'ajwejlasana, Sinia' jilists'ase'm.

²⁰Jiwoye 'ate siojona 'wuk ti po' ni to'm isiamk'iye napoka napo injlojwajnas siu'neje papo Sinia' jijwejlanawos t'ipi. Siojona jlame sisaj to'm isiamk'iye nakaye pet ni Sijwajieti.

²¹Siunie tena'a jana 'wuk ti t'otataja, ape'e jana sisaj ti 'yit pijia'm, jlam yamjli pijia'm wikie'eyi siuniwa jitiojwa'l jana 'wuk. Jak je iyoyi ts'ijiye ja wakajla janaka siojona Sinia' ji'wuk ti 'es.

²²'Yina kiak jiwoyeyi ti jini'nopijietayi ni Sijwajieti, jani'nopijietak'i wita'm, ja 'nakayeyijna'a ti jawoye 'ate janak Sinia' ji'wuk, ti siojona Sinia' jikimet ti 'es ji'weta.