Read Iyojwa'ja Chorote Efesios 3 Bible Online

Efesios 3 - Iyojwa'ja Chorote bible

Efesios 3

¹Jak je iyoyiji ti sa'am ti Judíojosts'e'm, siu'neje ti asam pet ti je Judíojosts'ase'm, ti Sijwajieti Jesús kasts'opijietk'i wita'm. Siupet ti ya'am Pablok'i'm je paj ka iliyi ti 'ajlana'ni, ti a'ne yi'i jla'a insat jiwe, 'yiniye ka jlama pa Sijwajieti ka siwojwa'n jikipinikiek'i'm, ti ts'otie a'laja'm astepe'e.

²Ajwelta ka pajk'i'ni ti 'najanayi pi jiwonayi ti Sinia' jikap'ijliuskiye ti it'imina siunie awo pet, ti awoyi ka iniuye'ase'm.

³Sinia' 'yakajanitie siunie ti je iyo ka nen kisie'e, ti iyo ka woyi, sekyi'i ijwilk'i'm kats'ajane pet paka iyone, iyo siukia yiji ja jikiecha ip'isinik, ti jwamjla'a ti amtitieje.

⁴Jak je iyoyiji siuti ja'yena 'ni ip'isinik, ijiate ja 'nakayeyijna'a pet ja 'najanayi paka wonayi ti yam ti ts'ajane pa awone siunie ink'ie' Sinia' iyo kawoyi, pakayi ti Sijwajieti iyoyeyi pet siukia iyo.

⁵Ti pajk'i Sinia' je iyo ka ti'niejenaja. Siu'nie iyo 'nakayi 'yakajanitieja'm napo jijliujwajnas, siu'neje napo jijwejlanawos napo isis, 'yina ti po' jana jikimet ti iniuyeje.

⁶'Naka siu'nie ti Sinia' ip'io'n ape'e ti ka lajak'i niwa Sinia' jlamtis ti ijwi'il ni injwajieti. It'imina 'nakayi napo ti je Judíojos kia'iyo jikimetayis pet siuniwa isis wask'i'nelaja tajle pi Sinia' ti jla'm ilisan'ni k'iye napo jilis, iyo'ate iyo napo Judíojos. Je pi iyoye 'ate ti pajk'i, ti ijiate ti 'wenayiji ijiaja napo Judíojos. Jak je iyoyi siunie Sinia' pajk'i ti ijwil'ni, kia'iyoyeyi pit tijnaye'e pet, 'yina ti pakayi pet ti Sijwajieti Jesús iyoyeyi siupi iyo.

⁷Siuti ya'am je ani'nojonit'i siu'nie awoyi ti anoyeje pi Sinia', ti ajwel niwa jlamtis, 'yina ti jlam ti jijweye po' it'iminayi pet ti akajli ti awoyi.

⁸Ya'am ti je ts'esijiyi, 'yaka'm itipe'e siunapo ti kia'iyo je isisijiyi pet Sinia' jilis ti ajyi. 'Yina je iyojliyi pi Sinia' ti ijniejietk'i'm siu'nie awoyi, ka lajak'i ni iyo ni jikap'ijliuskiye, yam ti sats'ilkaja ti akiji napo i'nio' je Judíojos niwa Sinia' jlamtis ti ijwil ni Sijwajieti ti jikap'ijliuskiye ti ijiate ti laja po' ti laj jlaja.

⁹Ti iyo ka 'winkijna'm pet wikie'eyi napo i'nio' siunie iyot'iyipi ka woyi, ti je 'yakajanit ta'a, ti 'nelanjie'e jla'am ti ilisanayi wikie'eyi niwa wask'i'nelaja, 'yina 'naka'ne ti 'yakaj siu'niwa jlomas.

¹⁰Lapakawo ti iyojonk'iye pet ka intant'ieje wikie'eyi siuniwa yiji ni poli niwa jijweye po' pet, siu'neje napo anechiyasas ti kia'iyo yiji ni poli naka Sinia' t'ajankijnieye ti ijwienjli je k'iejliyiji'n, ti jilis ijwilis.

¹¹Ka 'wena iwo wata'a siunie iyot'iyipi ka iwo ti 'nelanjie'e, ti je paj kant'eki naka ni siunie 'yakaja 'nakayi ti Sijwajieti Jesús iyoyi.

¹²Lapakawo jlam ti kasts'isisi siuti atankiuniejayi, jak je iyoyiji ka init'ajanitieje'n ti ajalasaja, paj ti a'yakanajayi ni Sinia'.

¹³Tempi it'imina ti kia' awo'nase, ti anip'elisi'niase, ka je ijnots'inats'i naka siu'nie awoyi ti yik'i ti anilayiti, jlam'ne je 'wena pa kat'emina asa'am ti iwit'ia po' astepe'e. Ja 'wenajliyi ti jawunitie pet ti kia'iyoyi kajeyepa ti asamkata ti yi'ase naka.

¹⁴'Nak it'imina ti 'yakosjlete'l ateyijin kiajwe pi Sinia' ti awo 'yejlayeja',

¹⁵jlam ti tajle wikie'eyi siunapo in'wet jlele ti yi' poliyi, siu'neje napo yi'i 'ni ajnat.

¹⁶A'yasane siunie asjweyeja' ka intajleje siuniwa i'wi'in ti je jlase', ka ne'n aswa'm, lapakawo siojona Sinia' jikimet ti 'es janoye'ase'm.

¹⁷'Yina siuti astankiujnieye poye, 'esiji ka Sijwajieti 'wet poye pet, ka nejyits'i niwa asosikis. Ja 'nakayeyijna'a ti jant'onieyi pijia'm ni inemijnaye ti jiwoyeyi, jla'yi ti jawo ajwetisijlaje naka.

¹⁸'Nakayi ti ja inwikie'eyeyi, siunapo Sinia' jilis ijia, ja 'najanayi paka wonayi ti ijiate ti isajk'i naka Sijwajieti jlemijnaye iyo, jla'yi ti intaj je yame siupa jlaj, siu'neje ti je ti'wena isia'm siupa jlaj yi'i, siu'neje ti je jnanjli pijia'm,

¹⁹siu'neje ka intant'iejayi ti ijiate ti 'yaka'm ape'e siunie ti ajwela ka kasts'ajajne'n. 'Yina ti kiak jawo, ja inkajana'a ti jampo'ase pi Sinia'.

²⁰'Nakayi, ¡'esiji ka inwunitieye tena'a pi Sinia', jijweye siu'nie iyo 'ni a'wena ti yiji sitiowiji it'imina'aja ti 'yaka siunie awoki, ti tajle pi Sinia', jla'am ti 'yijene pi iyone ka nene ape'e siunie iyo ni ts'ajlaye, siu'neje ti 'yaka'm ape'e ni sitienkiujnieye ti iyo!

²¹¡'Esiji ka jlam kiajatajak'i ka tonitie ni Sinia', je lajk'i ki iyo napo jilis, siu'neje pi Sijwajieti Jesús! Amén.