Read Iyojwa'ja Chorote Efesios 5 Bible Online

Efesios 5 - Iyojwa'ja Chorote bible

Efesios 5

¹Siuti asa'am ti jilists'ase'm pa Sinia' siu'neje ti jlemijna'ase'm, 'esiji ka niwonayi 'ate iyo ti jla'am.

²Woyeyi ni asemijnaye, 'wena ká aniwonayi iyot'iyipi pa Sijwajieti ti kia'iyo wuj ti 'nama, it'imina'ne ti iniwe'n sitipe'e. Ti iniwojwa'n Sinia' ji'wajieta', iyoye'ate ni k'iejlitieje ti tiliana ti tiwunitieta pi Sinia', sekyi'i siu'nie jini ti yame pi Sinia' ti 'yakanit'ni pet.

³Tiwet'ianaja ka 'esieyiji ka ena askiwiti naka siunie iyo ti 'yutie'ni pa, siu'neje ni iyo napo ti k'iejlitieje pa itiliaja ti yiyi pi jikiecha, siu'neje niwa ti ijiate ti 'yakajyijne'n napo i'nio', asam ti Sinia' jilists'ase'm.

⁴Ká ena askiwiti siuniwa asamtis ti 'yajwejlanitk'i wita'm napo as'lejwas, siu'neje niwa jlamtis ti iyo ni ijiuski'la'n, siu'neje niwa inamtis ti jiniliaja ti jlam pak iyots'i'ni, 'yina je 'yu'wase'm ka woyeyi 'niwaka. 'Wenajliyi ni 'esk'i ka awoyeyi ti jawoye asnikanitieyejayi pi Sinia'.

⁵'Yina 'najanayi ti siunie 'yuyi'ni jana jikiecha k'iemjla, siojona ti 'yuyi'ni na jikiecha k'iemjla, siu'neje ni iyo siunie ti ijiate ti je 'es, siu'neje ni ijwil ka woyi ni t'ajlaye 'yina ti je 'es ni iyoyi kajeyepa ti iyoyi jika diosa' niwaka ti itiliaja ka'we'en, ja ke ijnoyi pi Sijwajieti, jla'yi pi Sinia' ji'wet ti iyo anechiyasa'.

⁶Ká ak'iuye siunapo ti iyotaja ka ink'emijieta siunapo jlamtis inkasi, tejnisieyi ti je ijiatk'i siunie ijwil ka woyi. Niwaka siuniwa ajwel'ni, niwak itione ni Sinia' jiwak siunapo i'nio' ti je its'iuye niwa Sinia' jlamtis.

⁷'Yina ká awayejyi napoka.

⁸Ti pajk'i ajnatiok jlele'ase'm, 'nakayi ti jleyejiap ni Saka'niona, kates jla'al jlele'ase'm. It'imina ti kiak awo'nase, 'esiji ka anilesanayiji ti asam napoka ti kates jla'al jlele'ase'm; woyeyi siunie jikijmaye iyo pit napoka ti yiji jana kates jla'al.

⁹'Yina siuniwa jla' iyo jana kates jla'al naka ti jlosik po' ni i'nio', siu'neje ti tiwoki siunie ti tijnajyi, siu'neje ti ijiatk'i.

¹⁰Jalasa ka woyeyi siunie Saka'niona yimi'n ka woyeyi.

¹¹Ká ani'notieyi niwaka jikeyis jiniliaja napo i'nio', ti tajle ni ajnatiok, 'yina 'wenajliyi ti jakajanitie ape'e niwaka.

¹²'Wanjliyi je awo ka ijwi'il siuniwa ti wuj ti je isis ti ijwikis, jeyi kajeyepa ti ts'ajwejle.

¹³Kajeyepa siojona kates ti 'yakajanit pa yi'i pa, siupi iyoyi nakaye'eje pet ti yiji ni jla'al janak kates.

¹⁴Jak je iyoyi ti kiak tiwoki 'ate: “'Ojwe'n, ti jima'a, tajli kiowe'e napo i'nio mases, 'yina Sijwajieti jankajanit'i ape'e.”

¹⁵Jak je iyoyiji ti kiak awoyi, joskiyeyi. 'Yena siunie jiwoyeyi. Ká awoye 'ne'liasa, asosik tajanitie.

¹⁶Katatayi pet siu'nie jloma ti jiwoyeyi ni siu'nie 'es, 'yina 'yaka siuniwa jlomas ti awaki wuj ti je isis.

¹⁷Ká awoyeyi siunie ti laj lajaye, jalasa ka ijiatayi ka intant'iejayiji siunie Sinia' iyo ka woyi.

¹⁸Ká anijnomitiejyi'n siuti ji'yayetaje ni siunie at'es, jlam'ne naka ti ikajyi'n napo i'nio'. Ja 'wenajliyi jla'am ti siojona Sinia' jikimet ti 'es jantejwijyi'n ni asosik.

¹⁹Siuti jikamtijnienayi napo as'lejwas, 'esiji ka niwakaye sálmojos ti ja ena akiwiti. Enayits'i siuniwa inka'laja ti isisk'iji'n, kelisiena, 'esiji ka ijiatayiji ka wunitie ni Sinia' ti Saka'niona.

²⁰Ja k'iejliyeyi siupi jawoyeyi, ni'ne ti jane'yase, wikie'eyi niwaka 'esiji ka awoyeyi asnikanitieyeja' ti ja etijnajiape ni Saka'niona Jesús ti Sijwajieti.

²¹Siuti asa'am ti jiwunitie pi Sijwajieti, 'esiji ka anitejwayi'i ti jawoyeyi siunie ti jak'iuyeyi napo as'lejwas, kajeyepa ti jleye pet kiajwe.

²²Asejnia siunapo asjwa'yis po', k'iuyeyi napo asjwa'yis, wonayi 'ate ti jik'iuyeyi ni Saka'niona.

²³Kajeyepa ti siunie jik'iemjla jana asejnia nak iyoyi jletikie', iyoye pet 'ate ni Sijwajieti ti jlam ti jletik napo Sinia' jilis. Jla'yi ti Sijwajieti Jesús nak jijwajieti napo Sinia' jilis, 'yina iyoyi t'ajwesie' napoka.

²⁴Siuti kia'iyo napo Sinia' jilis ti its'iuye ni Sijwajieti kajeyepa ti yi kiajwe, 'yina 'esiji ka kiak iniwone pit napo asejnia ka ne kiajwe napo jijwa'yis.

²⁵Jlampet ti asa'am ti kiak jiwoyeyi asjwa'yis po', 'esiji ka i'namaja jana ak'iemjla, iyoye pet 'ate pi Sijwajieti ti wuj ti 'namaja napo iyoyi ni inamtik, it'imina ti iniwe'n ape'e.

²⁶Kiak iyone kajeyepa ti iyo ka ilesa'n pa Sinia' napo jilis. Iliji pi i'niat pakayi ti tiniejienaja'n, siu'neje ti iliji niwa Sinia' jlamtis.

²⁷Jak je iyoyiji siuti janen jitieyi'i, sekyi'i jan'we'en ti isis napo Sinia' jilis. Ja lajak'ipa pa kanwo'ate ti k'iejliyi pa ti iyo ji'yusieja', ni'ne ka wo'ate siupa ti k'iejlitieje pa ti t'ojli, siu'neje ti k'iejlitieje pa ti je 'es, 'yina isis; je t'ojlijyi'n.

²⁸Siunie i'nio' jik'iemjla po', 'esiji ka 'namaja jana jik'iemjla jawone 'ate iyone ti jla'am ti yimi'n ni t'ajwes. Je kast'ayiji'n, siunie i'nio' 'namaja jana asejnia, ijiate 'yaka 'namaja pet ni t'ajwes.

²⁹Atejnistieje ka lajak'ipa ka je i'yena ni t'ajwes, awo'ate ka ne'waja'm, 'wenajliyi ti 'es ti i'yena, 'es ti 'yakojnie'n. 'Yina Sijwajieti kiak iyone napo Sinia' jilis.

³⁰Lapakawo ti napoka ti t'ajwes, 'yina ti sa'am nak atajlaja pit.

³¹Iyo niwa Sinia' jlamtis ti iyo'ate, “Jak je iyoyiji ni i'nio' ti jantajla napo jiniewot, ti janejiap siojopa jik'iemjla, ni nojwaja'm 'yiniye na ka injwanjli paka i'nioye.”

³²'Yejne'n, ya'am awo'ate ti ajwel naka ti to'misiame ti yiji niwa Sinia' jlamtis: niwakayeta ti ijwi'il ni Sijwajieti siu'neje napo iyoyi ni inamtik.

³³'Yina ja inwikie'eyeyi 'esiji ka i'namajayi jana ask'iemjla, wonayi 'ate ti jininemina'. Kia'iyojliyi pit jana asejnia je 'esiji ka je awoye lajaye ni ask'iemjla.