Read Iyojwa'ja Chorote Efesios 6 Bible Online

Efesios 6 - Iyojwa'ja Chorote bible

Efesios 6

¹Kia'lis, 'esiji ka k'iuyeyi napo asnawot, siunie iyo ka woyeyi, 'yina ti je niliak naka.

²Jlam'ne siunie inia'an niwa Sinia' jlamtis, ti iyotaja ka tiwoki ti takajlunie, yi'i siu'nie ijwi'il pa Sinia' ti janwejna'm siunie jawoyi, iyo'ate: “Emi'n ni ana', siojona et kia'iyojliyi,

³ja 'nakayeyijna'a ti ja'nes, jla'yi ti a'nayi jantoyi'i ape'e 'ni ajnat.”

⁴Jlampet ti asa'am ti po' napo asles, je 'es ka asama asa'm ka ajwesina' napo asles, 'wenajliyi ti ja 'eyasane niwa Sinia' jlamtis. Jloye siuti je 'es ni iyoyi, 'yina lesaniji, noyeje 'nakayi ti jankajli ti jawoyi siunie 'es.

⁵Asampet ti inkawosts'ase'm, 'esiji ka k'iuyeyi napo aska anechiyasas siunapo yi'ne ajnat'e, siuti po' pa ijliuye'ase'm ka woyeyi 'yina k'iuyeyi. Ká awone 'ate ti i'nio' jiniliakta pa ti jikijmape'n, je 'es ti ja ke ijnots'ina, jwane'e pet ni asosik ti 'es ti janilesaniji k'iye. Ataj ja enayi 'ate ka jlama pi Sijwajieti ka noyeyeje.

⁶Ká ajwankita siunie ti ijnonitieyi ti jik'iuyeyi, 'yina jwane'e siunie jiniwonayi ti Sijwajieti jikawosts'ase'm, ti jiwoyeyi siunie Sinia' iyo.

⁷Ke int'o'ni k'iye ti jiwoyi ni akijmaye, 'esiji ka inwa'asiti'ni. Ataj enayijpe 'ate ti pak jikijmape'n pi Sinia', je napoka napo i'nio' ka kijmape'n.

⁸Jlam'ne 'najanayi pi jiwonayi, 'wanjliyi ka nakaye inkawo ni'ne ka nakaye siunie ti je inkawo, siuti 'es ni jikijmaye iyo kiak jawoyi Sinia' jawo jikajaye.

⁹Jlampet ti asa'am ti anechiyasasts'ase'm, kiak niwonayi 'ate awone siunapo akawos kawoyi, ká akasejlane. Ke inkiwaliyeyi'ipe ti aska anechiyas ijwienjli siunie yi' poliyi, ajwel ti asa'am ti anechiyasasts'ase'm, siu'neje ti asa'am ti inkawosts'ase'm pet, jlam ti je i'ye'en pi t'oniye napo i'nio'.

¹⁰I'lijwas, ti asa'am ti jleyejiap pi Saka'niona, janakaye ti asjweye ja atajlatayi, 'yina ti jla'am ti jit'iuni po'.

¹¹Kimayi siuniwa askijmatis askio' jlele ti tejeye ni inwak siuniwa Sinia' iwi'nase'm, tojmatayi ilia'm niwak siuniwa imosik jikajejlasayejes.

¹²Kajeyepa ti, siuti anilanajata, je wats'o paka itieye ilia'm, ni'ne ka jleli poye. 'Yina siuniwa awoki sakojwasa' niwaka siuniwa pini', ti kiak iyo jijweye po', ti yiji ni jloma ti je 'yaka ka ti'wena. Ti jijweye po', jla'yi ti iyo anechiyasa'a pet ni ajnat, jikijmaye siuniwa ti je isis ti yiji ni ajnatiok.

¹³Tempi it'imina ti kiak awo'nase ti ajlo'wase'm, ka kimayi niwaka askio' jlele ti janiwakajlanitie ta'a. Jak je iyoyiji siuti jane'yase janak jloma ti wuj ti je 'es jatoma'yi ilia'm siupi jawoyeyi. Jak je iyoyiji ti jitimayi ti jinilana', ijiate je t'ikiyejyi pit siunie jiwoyeyi ti insisie, kajeyepa ti ast'oni po'.

¹⁴Ekiajlayi'i ti kiak awo'nase, nit'onitie pijia'm. Woyeyi aska'wakie' siunie ijiatk'i, jlampet siunie tijnajyi nak woyeyi ast'ot jip'ota'.

¹⁵'Asajyits'i ta'a niwa asati ti janiwakajlanitie ti jakinieyiji'n niwa Sinia' jlamtis ti ijwil pet naka inkamankiye.

¹⁶Siunie ti ja ijiatayiji ti ja ke inkiwaliyeyi'i siunie astankiujnieye ti 'es, wonayi 'ate iyo siojona yiyi napo inwak jiwos ti itiujmat ilia'm niwa jikio' jlele ni jitiejiejwa. Ja 'nakayeyipe 'wanjliyi ka kia'iwo ni imosik ka inteya'ase'ni ja 'noma'ak'ipe niwa jik'iaja'l ti jwat yi'ik'i.

¹⁷Siojona asjwajieti, janak woye pet aska wontaja, ti ja jip'ota pet jana asetik. Jlampet siuniwa Sinia' jlamtis, nak jawoye pet astesajnat jitiokie', ti siojona Sinia' jikimet ti 'es iwi'nase'm.

¹⁸Je paj ka leyeyi ti jawoyeyi ni asts'ajlaye. Nip'elisine ni Sinia', jlomas niwa ajnajas ti janip'elisinayi, 'yina 'yaka po' janaka Sinia' jikimet ti 'es ti janoye'ase'm. Ni'netiejyi'n, ka ekiajlayisia'm siunie jiwoyeyi, ti jit'iejlana'ni wikie'eyi siunapo Sinia' jilis pet.

¹⁹'Yina jwanayik'impe pet ka ts'ajlana'ni ka Sinia' iwenk'i'm pet puwa yamtisa siunie awo kayoyi. Jla'yi ti ja ijwiye poye ti jajwi'il niwa Sinia' jlamtis, jla'yi ka ts'ajane pet paka iyone ka i'winkina napo i'nio' naka siunie ti je 'yaka ape'e, naka siunie Sinia' jika'niye ti 'es.

²⁰Sinia' yikialk'i'm siu'nie iyo 'ni isijmaye ti akiji'n niwa jlamtis, 'yina nak siunie it'imink'i ti silie'nitieje niwa wikijnies. Ataj wunitiek'ipe pet ka ts'ajlana'ni ka Sinia' 'yotale int'onit, ka ijwile pijia'm pet ni inka'niye ti 'es siu'nie iyo ni yikialk'i.

²¹Po'ala siunie sikiecha Tíquico, ti wuj ti kasts'amaja, jla'yi ti ats'ilkaja ti iniuyeje pa Sinia' ti iyoyi niwa jlamtis. 'Nak janjwe'lase'm siu'nie awo 'ni a'yi, siu'neje ni awo ti akijme'n.

²²It'imina ti nak ajlojwi ka iwo jika'niyeja'ase, ka jwe'el siunie awo pit, jla'yi ka noye'ase'm.

²³'Esiji ka Sinia', jla'yi pa Saka'niona Jesús ti Sijwajieti, imp'elisijnimpe, 'nakayeyi jankamajayispe, siunie jlemijnaye kia'iyojliyi, siu'neje ni jitienkiujnieye ti 'es, 'esiji ka Sinia' iwejna'm.

²⁴Siu'neje napo ti je yisit ilia'm ni jlemijnaye, ti yi'ne ni Saka'niona Jesús ti Sijwajieti, 'esiji ka wujwa kamp'elisijnempe.