Read Iyojwa'ja Chorote Filipenses 2 Bible Online

Filipenses 2 - Iyojwa'ja Chorote bible

Filipenses 2

¹Jakajliete, siuti Sijwajieti pak it'imina ki iyo ni yits'e ti sijweye po'; siuti anikimaja ni semijnaye, siu'neje ti japaka jla'am japa Sinia' jikimet ti 'es ti kasts'opijietk'i wita'm; siuti kasisk'i wita'm, jla'yi ti askap'ijliuskiye poye,

²'esiji ka injwanjli siunie astankiujnieye jiwonayi, asemijnaye kiak iyojliyi, askiojwa'l kiak iyojliyi, siu'neje ni astankiujnieye ti 'es, 'nakayijna'a ti jajnol wita'm siunie inikanitieye siuti jawomayiji.

³Ká aniwunitie; siunie ti janjwela ka ijnonitie ti k'iejliyi pa ti jilisanayi, ká anitonitieyi, 'wenajliyi ti ja anijlasata'yi isia'm. 'Yina kiak jawoyeyipi 'ate, “jla'm ijiate wek jla'am napo i'lijwas ti jle' po'.”

⁴Ká ajwankit siunie ti akimet a'm ti jiwojyi'n, 'esiji ka ajwane'e siunie ja 'esieyi napo a'lejwas.

⁵Ena'yasap siunie asosik siupi jlosik iyot'iyipi pet pa Sijwajieti,

⁶ti jla'am: 'Wanjliyi ijiatataja ti tajla'm pet siupi iyo pi Sinia', 'yina je kia'iyo ka ini'najnat pijia'm. Ka kia'iwo ka iwoyi jijliak'aliye naka, 'wenajliyi ti iliyi kiu wek seka'a.

⁷Sekyi'i iliyeyi kiu' siunie iyo ti Sinia' pet, ka 'wena iwo wata'a iyo ni i'nio' ti yiyetaja'n, ti yiyeje'n pet 'ne ajnat'e, iniwojwa'n inkawoye. Ka 'wena ijno'we wata'a, i'nio' ti iniwojwa'n 'ate awoki.

⁸Inijlasat isia'm, ka kia'iwo ka initonit'ni, je iyo ka inka'm ape'e siupi iyo pi tijliukieje ka iwoyi, it'imina'ne ti 'ya'al. Paj ti tenaja'a pijia'm japa cruz t'ipi.

⁹It'imina ti Sinia' yikiajle pet naka jle', ti iyo anechiyasa' ti 'yaka'm ape'e napo i'nio'. Yi'ni'ne siupi jle' ti 'yaka'm ape'e napo ijia anechiyasas jleyis iyo.

¹⁰Ja'nakayeyi ti ja wikie'eyeyi siunapo poli jlele pet, siu'neje napo yi'i 'ni ajnat, siu'neje napo yi pet kiajwe 'ni ajnat, ja t'akosayisijna'a kiajwe ni iyo ni Jesús jle' ti janwunitis.

¹¹'Yina ja wikie'eyeyi ti janjwelisi pijia'm ti janwoyits'i 'ate, “Sijwajieti Jesús naka ti Saka'niona”, japakayeyi ti ja wujwa ti ja tiwunitie pa Sinia'.

¹²I'lijwas, ti asa'am ti yimijna'ase'm, siuti je atal aska kiowe'e ka pajape ka je ak'iuyek'i'm, 'nakayi ti je a'yasap kajeyepa ti toj'wase, 'esiji ka ijiatayi ka ak'iuyek'i'm siu'nie ajlo'wase'm ka awoyeyi. 'Esiji ka ijiatayiji siunie astankiujnieye ti ijioyi ni askamankiye, jla'yi ti ja ajoskiyeyi ni Sinia', 'esiji ka je injweyeyi ti jla'am.

¹³'Yina Sinia' jla'am ti tajle siunie jiwoyeyi, siunie ti wuj ti 'es astankiujnieye, kajeyepa ti iyo ka emina' jla'yi ka woyeyi siunie ijliu'wase'm.

¹⁴Siuti ja k'iejliyeyipe pi jakimayi, ká anilakiye'yi. Ká anawitie,

¹⁵ja 'nakayeyijna'a ja asama siunapo Sinia' jilis ti lajk'ipa ka jitis iwo ka titiajlataja, jla'yi ti laj jikeyisa', jla'yi ti ja lajak'i paka nit'ojlinitieyi, isis jikiowe'e napoka i'nio' ti ijiateje ti je isis ape'e 'ni ajnat. Jawo 'ate iyo niwa katese'l ti yatamk'i ti yiji ni ajnaj,

¹⁶ti jijwelajia'm niwak Sinia' jlamtis ti janak in'wasankiye. Siuti jakinieyi naka, yam wuj ti jati'mase, ka 'nesta pi Sijwajieti, kajeyepa ti ja 'nakaj ti jlam je askiujni'n jiwek, jla'yi ti jlam je akijme'n jiwek.

¹⁷'Wanjliyijna'ape ka siliana, 'yina siunie i'yoyis 'yiniyijna'a ka ji'wet injwanjliyi ti ja tisiajietaj'ni ape'e ni siunie astankiujnieye ti 'es ti jiwoyeyi Sinia' ji'wajieta'. Wuj ti ts'ajkaj'ni ti kia'iyo, 'yina kiak jawoyeyi pit 'esiji ka anikanitie'ni.

¹⁸Ijiate wuj ti 'es ka inikimaja siunie sinikanitiejeye.

¹⁹Ka intaltajanie'e pa Saka'niona Jesús siu'nie, 'yina ka 'wenanie ilia'm ta'a 'ni sikiecha Timoteo ti nak jajliujwi. Sekjane'yi ka wujwana'a ti jats'ajkaj'ni, kajeyepa ti ja ijie'yase siupi jiwoyeyi pit.

²⁰Kajeyepa ti lajk'ipa ka iwo'ate awoyi, siu'nie ti atankiu'niase'ni, jla'yi ti anoye'ase'm.

²¹Lajk'ipa ka 'wi'in ka ijiatayiji kan'ye'en siunie tajle pit ni Sijwajieti, 'yina najataja jla'am siunie ti jla'am ti 'esi.

²²'Yina intant'iejayi 'ni Timoteo ti jlosik po', jlam wuj ti iniuyijk'i'm siuti awoyeta yamtikie', ti ajwel niwa Sinia' jlamtis ti isis, 'yiniye pa ti ijiate ti inase.

²³Je ijiat ka je a'wena'yi ilia'm, kajeyepa ti nak ja ijliu' ka 'nakajtaja siupi jayoyi.

²⁴'Yina je ijiat ka je a'wena pet ijyilia'm, ajwelta ka je pajana'a its'ioye, kajeyepa ti Sinia' janoyijk'i'm ti jayik.

²⁵Jla'yi ti ajwel'ni 'esiji 'ni sikiecha Epafrodito ka nek ka ijno'wase. Jla'am ti iniuyijk'im'ni ti awoyeta yamtikie', jla'yi ti atayeta ilia'm niwa wask'i'nelaja je isis ape'e ni Sijwajieti. Jlampe'eje ti jijliuye ti namik'iji ki jwamjla'a ti jiniuyeyijk'i'm.

²⁶Kia'iyo iyotaja ka in'wena pet, kat'ajayi ti 'yijenayi pet pi iyone ti jijieyeyi ti yi'i jakia jloma ti wuj ti je 'es'ni, kiaka'ne ti wuj ti iyoyi jitienkiujnieyeja'.

²⁷Je ka jla'm iyo, ijlienayi ka 'na'al. 'Yina Sinia' wuj ti ip'ilisi'n jiwek. Je jlamkata, siuti ya'am kiak awoyi, wuj ti sip'elisi'n pet, 'nakayi ti jakeye wat 'niwa yajlas ape'e 'ni ajnat.

²⁸Tempi it'imina ti etit ka inek ka ijno'wase, sekjane'yi ka inkasajyinna'a, ka kia'iyoyenie'e pet ti ya'am ka jeyena'a wat siu'nie ijliak'ali ti yik'i.

²⁹Siuka 'nesta'ase, kimanie'e ilia'm nikanitieyi ilia'm. Ataj enayijpe 'ate ti jlam ti sikiecha, kasjwanjliyik'i siunie ti ak'iukie pa Sijwajieti. Siupa ti po' pa ti kia'iyo, 'esiji ka 'esie ka 'yena'yi ilia'm.

³⁰Je 'wena paka int'emina ti jota ka 'na'al, naka Sijwajieti jikijmaye. Ka kia'iwo ka iwoyi jijliak'aliye kan'ye'en ti poye ki jiwet'ia, 'wenajliyi ti 'es ti iniuyijk'i'm, siunie ti je yits'e japa jlomaye ti asa'am ka akajlajyi ka anoyeyijk'i'm ka woyeyi siunie iyoyi kajeyepa ti toj'wase pit ni jleyejyi.