Read Iyojwa'ja Chorote Filipenses 3 Bible Online

Filipenses 3 - Iyojwa'ja Chorote bible

Filipenses 3

¹'Nakayi japo i'lijwas, ké inkiwaliyeyi'ipe pi Saka'niona, 'esiji ka anikanitiets'i wita'm. Ya'am je sik'ijliayi ti ekiajle'e'ni ask'ioye siu'niwa yamtis ti ajlo'wase'ni, 'yina ti niwaka ti ja insisieyi, ti awo'ate:

²Asosik enitiejyits'i'ni k'iye siunapo i'nio' iyo'ate niwa alenas, ti wuj ti je 'es siunie iyoyisi, kajeyepa ti ijialaskine napo ijia ka t'isie'n inewa'ak'i.

³'Yina siunapo ijiate jla'am ti ijiatk'i ti kiak tiwonaja ti t'isie'n jiwa tejwak'i napoka ti sa'am, kajeyepa ti yijits'i niwa sikiojwa'l. Sa'am ti awunitie pa Sinia', ka lajak'i ki iyo 'neje japa jikimet ti 'es, jla'yi ti wuj ti kasts'ajka'a, ti je 'wena paka itiajlaja paka pi Sijwajieti Jesús. Ti je nak ka 'yena siunie 'yaka ti ijnonitieyi tena'a pi k'iejliyi ti po'.

⁴Kia'awo po' siukiwa ti ijiate ti sitiliaja ka ijiatayi ka itienkiujnieye ipijlanitia'm, kajeyepa ti je akakiuni. Siut'itie ka poye pi i'nio' ka initoniti siupa ti jitienkiujnieye ijioyiyi, 'yina ka kia'iwotaja pit ka si'wanjle'e ka yamt'ipa ijiatataja ka ininoniti pet.

⁵Jlampa sipajat'i'nijpe kisie'e ti ayet'ijyimpe, najape tom'nijiye puwa jlomas ajyi ti kiak t'ipa tiwonajat'ik'ipi ti 'isie'n jiwa tejwak'i. Israel jika kia'lek'i'm, papok atajla'm papo Benjamín jika kia'list'ipi pet. Je jlam tiliakikk'im'ni jiwek ti sijwela, Hebreok'i'm, 'yina ijiate kajeyepa ti iniewot napo Hebréojos. Jla'yi ti ajyipi napo Fariséojos, it'imina ti wuj ti ts'ajane ni iyo ni jika'neyasajnaye, siunie iyo napo Judíojos, naka pet ti ajonit.

⁶Kajeyepa ti ijiate ti jlam je awoyi ti ijiatepe ni awoyi ti ajwankitk'iyijpe ki awoyi, ti ata ilia'm siunapo its'iuye pa Jesús. 'Yina ti isiowe apejlanitiamepe siunie Judíojos jika'neyasajnaye, it'iminape ti je yits'e paka sijwe'el, ka injwel ka itis poye, kajeyepa ti ajwel ts'esi ki awo.

⁷'Nakayi siunie ajwelpe ti ijiate ti laja poyi, siuti akiek'i pet pa Sijwajieti, isiowe je ijioyeyi, kajeyepa ti a'yejne'n ti je sitiliajayi, najataja jla'am pi Jesús ti ajonit.

⁸Nak t'an pijiame siunie ti sitiant'ieje pi 'Yaka'niona Jesús ti Sijwajieti, it'imina ti je pa awoye lajaye wikie'eyi niwak wask'i'nelaja, jla'yi ti jla'am ti it'imina ti aleyi. Lapakawo ti ajalas pet ka itiej naka ti e'nijiap pi Sijwajieti, it'imina ti 'nakayi awonayi 'ate ni jlolimak,

⁹siu'neje ka ijiatayiji ka ini'nopijiete wita'm ti jla'am. Je awojonk'iye'ne 'nakayi ka ijwil ka ts'esi naka Judíojos jika'neyasajnaye, jla'yi ka ijwil ka lajak'iyi paka je 'esie ka iyoyi. Najata jla'am ti awota ka ts'esi pa Sijwajieti 'nakayi ka itienkiuni, kajeyepa ti je akakiu. Kajeyepa nakata jla'am Sinia' i'yase napo i'nio' siunie ijiate ti itienkiuni pa Sijwajieti.

¹⁰Siunie awojonk'iye ka iyo, ka ijiatayiji ka sitiant'ieje pa Sijwajieti; jla'yi ti anik'iutieje ka into'm iwia'm ka inejyi 'ni isiowe paka jijweye ti iniujwa'n kisie'e jla'am ti tajle pa a'no'; jla'yi ti awotajank'iye ka ini'we'en ka 'naka ka iliaye janoyi wita'm; siunie jiliaye iyo ti wuj ti a'tiek'i, ka iyoyena'a 'ate iyo ti 'ya'al.

¹¹Po' siunie ak'iujwink'iye pet, naka ti janiu pet kisie'e ti jatiajli ni a'no' ts'iji.

¹²Je ajwel ka ya'm ape'e niwaka, ni'ne ka ijwil ka yama ka ts'es, 'yina ajalasjli'yi ape'e ka i'yaka'n naka, tempi it'imint'iyijpe ti Sijwajieti jla'am ti si'yaka'n ti 'nelanjie'e.

¹³I'lijwas, je ajwel ka pajak'i ka 'yakajli naka. 'Yina najata jla'am siunie awoyi, ti itiej je awunitk'i'ni siukiwa pajk'i ti yam'niji, jla'yi ti aleyi ti a'ye'en niwaka yi' i'wichaja, jlam ajalasjliyi pit siunie yi' itieyiji.

¹⁴Ajalasjli'yi ape'e ka yiyi ni yi'i ni jlaj, kajeyepa ti awojonk'iye ka i'yaka'n siunie i'wiejiet siunie Sinia' janwejna'm napo i'nio' ts'iji poliyi, ti tanets'eje siuti sa'am je akakiuk pa Sijwajieti Jesús.

¹⁵Ja kaswikie'eyi sa'am ti kaspaja ti awoki ni sitienkiujnieye ti 'es, 'esiji ka sitienkiujnieye kiak iyonaja. Ja jlama pet ti astankiujnieyeja' 'wena awonayi, kiak ja wo'ojyi, Sinia' jankajanit'iase'meje siunie ajwe'el.

¹⁶'Yina ja 'yena 'ni si'niayi 'ni anokk'i 'nakayi, sekyi'i janajliyijna'a ti jayoki.

¹⁷I'lijwas, mayeyi siu'nie aniwone pet. 'Yena siunie iniwone napoka siunapo ti ijiate ti iyoyisi jla'am siunie iyo ni ajlota'ase'm ka woyeyi.

¹⁸Je ijwienjliyiji ka je ijwilata'asem'ni siu'nie, 'nakayi ja yikiajle'eje ti jajwi'lase'm itiet t'e' atonata'ni ti awo'ate, je pini' napo ti teje'yi ilia'm janak Sijwajieti jika cruz t'ipi.

¹⁹Napok je ijiate ka je inojk'i'ni. Jlamis ti iyoyisi jika diosa' naka ti ijiate ti jitienkiujnieye yi'ne niwa wask'i'nelaja ti iyojonk'iye kan'wenis. Ka kia'iwo ka iwoyisi t'ajwejliye ni jike' ti iyoyisi. Jlam itimisjliyi niwaka, ti jitienkiujnieye yi'ne niwa wask'i'nelaja yi' ape'e 'ni ajnat.

²⁰Jlam pet ti sa'am ti poli jlelets'e'm, ak'iukink'iye pet pa Sijwajieti ti ja'nes ti jantal poliyi, paka pa Saka'niona Jesús ti Sijwajieti.

²¹Ti jawo ink'iejyisa' niwa ts'isienis, ti ji'niayi je itio'yi ape'e 'ni ajnat, ka iwoyena'a 'ate iyo ti jla'am ni t'ajwes ti ijiate jla'am ti 'es. Je lajk'i ni jijweye iyo ti jla'am ti i'yena wikie'eyi niwa wask'i'nelaja yi' ape'e 'ni ajnat.