Read Iyojwa'ja Chorote Filipenses 4 Bible Online

Filipenses 4 - Iyojwa'ja Chorote bible

Filipenses 4

¹Jak je iyoyiji, japo i'lijwas ti yimijna'ase'm, je pi sik'iejie'e ti awotaja'ni ka i'wina, jla'yi ti asa'am ti inikanitiejeye'ase'm, asa'am siunie i'wiejiet ti ja'yakajli, yimijna'. Ká ajlasata'yi isia'm siunie jiniwonayi; ká aleyeyi ni Saka'niona.

²Anip'elisi'niase, asa'am, Evodia jla'yi ti a'am Sintique, 'esiji ka leyets'i siunie jiniwonayi ti jitieyets'i wita'm. Niwomats'i wita'm, jlam'ne ti injwanjliyik'i ni siunie jiwoyeyi ti jitienkiunieyi pi Saka'niona.

³Siupet ti a'am, a'm ti je paj ka sitionit ti inkayank'i pet ti awoyetaja siunie sikijmaye, yot'iyi'ni ka je anoyeje japo ti napok si'lijwas, napoka ti t'as yi'pe ti 'ekiyejayi ni siunie sikijmaye ti awoyi yamtikie' siuniwa Sinia' jlamtis ti isis. Siu'neje ja sikiecha Clemente, je ijwienjli japoka 'neje japo ya'yispe ti akimak'iji'n. Wikie'eyi ti jleyis yi'i ni siunie imp'esinik, yi'i napoka ji'wasankiye laj jlaja po'.

⁴'Esiji ka je aleyeyi siunie asnikanitieye ti tajle pi Saka'niona. Jayikiajle'eje: ¡Nikanitiejyi'n!

⁵Ni'wenkinajia'm napo i'nio' asa'am ti jikap'ijliuskiye. Je pa tojwa'a ti ja'nes pi Saka'niona.

⁶Ká awoye asjlak'aliye paka k'iejliyeyi ti potie, 'wenajliyi ka awoye astankiujnieyeja'. Jwelayi pi Sinia' pi nitia ti jisitiana', 'yina jajwanayi'ipe ni asnikanitieyi ti jawenayi.

⁷Ja 'nakayeyijna'a siunie inkamankiye, ti lajk'ipa ka ijnojliji, ti 'yaka'm ape'e ni siunie iyo ni i'nio' ti 'yije'en, jane'yasap ti janoye'ase'm siunie jiwonayi ni asosik jla'yi ni jiwonayi ni astankiujnieye, kajeyepa ti jini'nopijietayiji pa Sijwajieti Jesús.

⁸'Niwak 'wanjli isiame, i'lijwas, jane'yi siupa ti ja ijiatak'i, siunie ti je jlam tonitie wek, siu'neje ti japoye naka ti tijnajyi, siu'neje ti lajk'ipa ka injlejni'ni, siu'neje ni ti wuj ti emina, siu'neje ni ti ajieyeje ti wuj ti 'es, 'niwak 'esiji ka ijiatayiji ka astankiujnieye ijnoyi. Kajeyepa ti jlam je jiniwonayi, 'yina ti 'yu'we ti jiwunitie 'niwaka.

⁹'Yina siunie 'eyasanayijpe, siu'neje ni ajloye'asempe ka woyeyi, 'niwaka ti jawoyeyi askijmayeja'. Siunie ajwe'lase'm, siu'neje ni si'wenayi ti akima, kiak wonayipi pet. Sinia' ti tajle ni inkamankiye jane'yasap.

¹⁰Wuj ti ts'ajkaj'ni jla'yi ti inikanitiejeye ijioyi pi Saka'niona, kajeyepa ti jlekiajlayi'iji ti astaj wujwak'i, siunie jiwoyeyi ti jiniuyeyijk'i'm. Je ajwel ka iyo'ate asa'am jiliyeyi ti jiniuyeyijk'i'm, kajeyepa siukiwa jlomas yam'niji ts'ajane pi awone ti je 'wena' paka k'iejliyeyi.

¹¹'Yina ká ajwela ka kiak iyo ka iyo'ate wujwa a'tie ti sip'elisie. Je'e, 'wenajliyi ni awoyi ti anikayankite ti awo'ate, “Ijniujli wek 'ni a'we'en”.

¹²Sakayane ti ajyi ni ip'ilisieye, siu'neje ni ti jwajla'a je tisitiana. Yi'i pa jloma pi ajyi, anikajaniti ti akama pi a'yi. Yi'i japa jloma a'we'en ni yak, ni'ne ti lajk'ipa ka'wi'in, ni'ne ti kiak iyo ti yamayi'iji 'ni yak ti a'we'en, ni'ne ti ijiatayi'iji ti lajk'iyipa ka k'iejliyeyi paka i'wi'in ka yaka.

¹³Atojmi wek ilia'm, 'yina ti ijwiye powek, kajeyepa ti paka Sijwajieti ti iyo ijwiyeja'.

¹⁴'Esiji siunie jiwoyeyi, ti siliaye iniuk'i wita'm siunie iyo ni anilayiti.

¹⁵Asa'am ti as'wet jana Filipos, 'najanayi pi jiwonayi, jakayi ti atal Macedóniaja, ti 'nelanjie'e awoyeyi ni isijmaye ti akiji'n niwa Sinia' jlamtis. Asamkatape ti ts'eschiase, kajeyepa ti jiniuyeyijk'impe ti k'iejliyi pi asetia'n. Kajeyepa ti jitiejenitie pet ijyilia'm, siunie ti insisiek'i pet siunie awoyi ti anoye'ase'm pet ki iyo niwa asosikis.

¹⁶Kia'iyopi'iji ti a' Tesalónicaja, asampe'eje ti jijliuyek'i jakia jwamjla'a ti jiwoye i'wiejieta'. It'imina ti kiak awo ti awo'ate ti je ijwienjliyiji ka je anoyeyijk'im'ni.

¹⁷Je'ne ka nakaye ka ts'eliaja ti jiwoye'ni i'wiejieta', 'yina awojonk'iye ka Sinia' jlam kiajatajak'i'ni ka inoye'asem'ni ka je instayepe pet siunie jawo ka wenak'i'm, naka ni siunie ti ja wujwa ti jamp'elisina'.

¹⁸Kajeyepa ti pajk'i ti yi' isiojyi siunie ti jijliuyek'i, 'yina 'etsaka 'yaka'm itipe'e janaka. Siojokia jiwenajia'm ni sikiecha Epafrodito ti jijliuyek'i, ya'am awo'ate 'etsaka ti a'yena. Nak a'yejnap siunie jini inkajk'i, ti tiwoki ji'wajieta' pa Sinia', ti wuj ti 'yakanit'ni pi Sinia'.

¹⁹Siunie Inia' je ijiate pet ka je inwe'nase'm wikie'eyi siunie jisitiana', ti jantajla'm ni iyo pet pa Sijwajieti, ti je jlase' ni yiyi niwa wuj ti isis.

²⁰¡'Esiji ka jlam kiajatajak'i'ni ni iyo ti jiwunitie pa Sinia', jajnok'i'ni! Amén.

²¹Atejwile wikie'eyi japo Sinia' jilis, ti ini'nopijiete wita'm pa Sijwajieti Jesús. Jlampet 'napo si'lijwas ti ajyi wuj ti itijwi'lase pit.

²²Kia'iyo wikie'eyi napo Sinia' jilis itijwi'lase. Siu'neje napo isimape'n ni anechiyas Roma jlele wuj ti itijwi'lase.

²³'Esiji ka Saka'niona Jesús ti Sijwajieti jikap'ijliuskiye inejyi niwa asosikis.