Read Iyojwa'ja Chorote Colosenses 3 Bible Online

Colosenses 3 - Iyojwa'ja Chorote bible

Colosenses 3

¹Ijiatjliyi, siuti asa'am ti pajk'i ti jiniuyets'i kisie'e, ti injwanayeyi'i pi Sijwajieti ti jitiajlajyi pi a'no', woyeyipe astankiujnieyejayi siuniwa wask'i'nelaja ti isis ts'iji ti yi' poliyi, yi'i pa Sijwajieti, ti yiji'n jijweyeje pi Sinia'.

²Askiojwa'l jojwatayi niwak wask'i'nelaja ti yi' poliyi, 'yina askiojwa'l ká ajojwatayi niwa wask'i'nelaja ji'wet 'ni ajnat.

³Siuti pajk'i ti aslaye iniuyi wita'm pa Sijwajieti ti 'ya'al, siojona as'wasankiye ti ijiatk'i je 'yaka kajeyepa ti yijliyi'ijyi pi Sijwajieti ti yijap pi Sinia'.

⁴Sijwajieti jla'am siojona as'wasankiye ti ijiatk'i, janeyi siojona jloma ti janikajanit, sekjane'yi ka inkajayena'a pet ti jawayejiap ti janejyi siunie jawo ni jijweyeja'.

⁵Lanajyi'n wikie'eyi niwak askeyis ti je isis ti taj'le ni ajnat. Je 'es ka ne'yi paka inwoyi siunie 'nojieye, siu'neje ni t'ojli, siu'neje niwa asoski'la, siu'neje niwa je isis ti inteliajayi ti jiwoyeyi. Ká awoye'yi 'ate siunapo ijliak'alijyi'n k'iye siupa iyo ka'we'en, ti 'yiniye ka iwo jika diosa' niwaka ti jiwoyeyi asjlak'aliye.

⁶'Yina niwaka ti itione napo i'nio' ti je iyoyi niwa inamtis ni Sinia' jiwak,

⁷'yina niwaka niwa jiwoyeyi ti pajk'i.

⁸'Nakayi 'esiji ka leyeyi ti injwesisa', siu'neje na ti ine'waja'm ni akiecha, siu'neje na ti jlamti ni akiecha, siu'neje niwa asamtis jiniliaja.

⁹Ká aninekiajlayi siuniwa aska sintijieyis, jlam'ne pajk'i ti jijwayejyi siunie iyo ni askiowe 'yusie, siu'neje kiwa askeyis ti pajk'i.

¹⁰'Yina 'nakayi jit'iuyek'i siunie as'wu' ti ink'ie', naka asosik jikiecha ti ink'ie', siunie ti Sinia' jlomas ti iyo'ni ink'ieye, siunie ti ini'yejnap ni iyone ti 'nakayi ti ja intant'iejayiji ti jla'am, ti jilisanik.

¹¹'Yina je 'esiji'ne ka poye paka in'yene ka jikiecha ti Judío, ni'ne ka nakaye je Judío, ni'ne ka nakaye siunie jikiecha siunie ti po' ni tiwonaja ti t'isie'n jiwa tejwak'i, ni'ne ka napokaye siunapo ti lajk'ipa ka neyi ka kiak tiwonaja, ni'ne ka nakaye siunie ajnat 'wenayi jana tajla'm, siu'neje ni 'lan jlele, siu'neje ni inkipinik, ni'ne ka nakaye siunie ti je inkipinik. Ke iwo pa ti Sijwajieti ijwienjli lajk'ipa kawo'ate ni laja iyo, siu'neje ti jla'am ti ijwienjli inena'yi.

¹²Sinia' 'nama'ase, je nakata siu'neje ti int'ayejits'i, 'nakayi ti ja asama siunapo jika kia'lis pet. Jak je iyoyiji ti jawoye as'wuye siunie askap'ijliuskiye ti ijiate ti tajla'm ni asosik ti 'es, ti ja ena'yi napo as'lejwas. Siupa isitia'n, ti japoye wenajia'm. Ká anitonitie, ke injwesisa', kamaja'.

¹³'Esiji ka nilayitieyits'i, jak je iyoyiji siuti akiecha jitis po'a 'yina netiajnat. Iyo pa Saka'niona ti isiwaliyi'i kiwa astes iyo, kiak wonayi napo as'lejwas.

¹⁴Jla'm ijiatayi jla'am siunie ti 'yaka'm ape'e niwaka, ti jawoyeyi as'wuye siunie inka'namankiye. Kajeyepa ti naka ti ijiate ti ilie'nitk'i wita'm niwaka.

¹⁵'Yina siunie inkamankiye ti tajle ni Sijwajieti 'esiji ka iwo anechiyasajats'i niwa asosikis. Kajeyepa ti nak tanajap'ase ni Sinia', ka ts'ijiye injwanjliyek'i 'yiniyijna'a siunie 'najwes ti ijwienjli. 'Yina woyepe asnikanitieyija'.

¹⁶'Esiji ka siuniwa Sijwajieti jlamtis inejyits'i niwa asosikis, 'yina ja wujwa ka noye'ase'm. Siunie 'najanayi ninekiajlayi ti jani'neyasanayi, 'wenkinayi napo as'lejwas siunie tijnajyi. Siuti ja akelisienajyi'n, jonitie ni Sinia'; siuti ja inkasajyi'n 'esiji ka atajlatajia'm ni asosik; kiak jawojliyi siuti jawoye asts'ajlayeja'. Enayits'i siuniwa sálmojos, siu'neje niwa ijia inka'laja ti tajle siojona Sinia' jikimet.

¹⁷Ja k'iejliyeyijpe pa jawoyeyi 'esiji ka wunitie pi Saka'niona Jesús, jla'yi ti jawoye asnikanitiejayi pi Sinia', ti ja etijnajiape pi Saka'niona Jesús.

¹⁸Jlampet ti asa'am ti asejnia'ase'm, ti asjwa'yis po', k'iuyeyi napo asjwa'yis 'yina napoka ti jiwaye kiajwe. 'Yina ti kiak jota woyeyi, ti asa'am ti je kakiuye ni Saka'niona.

¹⁹Siupet ti asa'am ti ayijniests'ase'm, emina' napo asjwa'yis, ke injwesisa'.

²⁰Siupet ti asa'am ti kia'lits'ase'm, 'esiji ka woyeyi siunie iyo ka woyeyi napo asnawot, 'yina nak Sinia' itiliaja pet, 'yina 'es ka kiak iwoyi napoka Sinia' jika kia'lis.

²¹Jlampet ti asa'am ti jiniewot'ase'm napoka kia'lis, je 'es ka asama ka atajlata' ka int'emina ka jwesisa' napo asles, 'lojwinie'e ka ji'wetis je insets'ik'i.

²²Jlampet ti asa'am ti inkawosts'ase'm, 'esiji ka je akama'yi ape'e siunie iyo ka woyeyi napo aska anechiyasas yi' ajnat'e ti ijliu'wase'm. 'Yina je nakata siunie ti in'yena, siunie ti jik'iuyeyi ka akanitie'ni, 'yina 'esiji ka a'nalkitak'i siunie astankiujnieye ti 'es, siu'neje ti ja ajoskiyeyi ni Saka'niona, nak it'imina ti jik'iuyeyi napo aska anechiyasas.

²³Ja k'iejliyeyipe pa jawoyeyi, 'esiji ka anikanitie'yi, 'yejnap ka pakaye Saka'niona ti jiniuyeyeje, 'yina je napoka i'nio' ka noyeyeje.

²⁴Jlam'ne 'najanayi pi jiwonayi ti Saka'niona janwe'nase'm siojona as'wajiete, ti jantojmat ape'e siojona askajaye ts'iji, siojona ti pajk'i ti itiejietap napo jika kia'lis, kajeyepa ti jiniuyeyeje pi Sijwajieti ti ijiate jla'am ti aska anechiyas.

²⁵Jak je iyoyiji pet siunie ti iyoyi siunie ti je 'es, kiak jawo siunie jankajli ja ke 'esie, kajeyepa ti Sinia' je pak ka'yene ka k'iejliyeyi pa kawoyi paka ne'yi pa.