Read Iyojwa'ja Chorote 1 Tesalonicenses 1 Bible Online

1 Tesalonicenses 1 - Iyojwa'ja Chorote bible

1 Tesalonicenses 1

¹Asampey i'lijwas ti Sinia' jilists'ase'm, ti jleye'yi jana Tesalónica. Ya'am Pablok'i'm, ya'yi ni sikiecha Silvano,[1] Timoteo 'neje, sa'am sip'esinik siu'nie ajlok'iase. Asa'am ti jini'nopijietayi wita'm pa Sinia', jla'yi pa Saka'niona Jesús ti Sijwajieti. 'Esiji ka Sinia' imp'elisina', jla'yi ti jane'yi asap.

²Ti awokieta ts'ajlayeja', sitiej awunitie'ase'ijyi, sekyi'i ti sinikanitiejeye awenajayi'iji pi Sinia' astepe'e.

³Siuti ijiate ti jikimayi ni astankiujnieye ti 'es, je pini' siuniwa askijmayejes ti isis niwa jitiajlayija'm. 'Yina siuti jikimayi ni asemijnaye, wuj ti jinilankinieyi ni askijmaye. Siuti ijiate ti jikajanitie ni jinijijwiyejyink'iye pi Saka'niona Jesús ti Sijwajieti, ijiate nak it'imina ti jini'netieyi, ejlowek ti wuj ti jinilayitieyi pi k'iejli ti aswet'iayeta. Ti a jitieyi'i pa Sinia', je paj ka sikiwaliyi'i niwak siuniwa isis ti jiwoyeyi.

⁴I'lijwas, wuj ti 'nama'ase pa Sinia', jla'yi ti je kast'ayiji'n ti Sinia' jla'am ti isi'mase'm.

⁵Siuti anamaye'asejepi niwa Sinia' jlamtis ti isis, je 'nakata, siu'neje ki iyo ni jijweye jana Sinia' jikimet ti 'es, 'yaka ti ijiatk'i jla'am. Mejla'ala ka je 'najanayi siunie ti iyo ti si'wena ti a'yasap, kajeyepa ti ajalasa pet ask'ioye pa ka 'nisisieyi.

⁶Asa'am je wet'ianayi kajeyepa jiwoyeyi siunie aniwonaja pit, siu'neje ni iyo ni Saka'niona. 'Yina ti jikima'yi ilia'm niwa Saka'niona jlamtis, it'imina ti wuj ti jinilayitieyi siuniwa iyo'nase napo a'lejwas ti yi'nase'm, 'yina asjweye poye wek k'iye, kajeyepa siunie asnikanitieyi jitiajlayiji jana Sinia' jikimet ti 'es.

⁷Jak je iyoyiji'ni siunapo Sinia' jilis yijits'i niwa ajnatis, yiji jana Macedonia, siu'neje jlaja Acaya, ti i'wina siunie jiwoyeyi, 'yina kiak iniwonayisi pit, iyo siunie jiwoyeyi.

⁸Asa'am ti it'imina ti yamaja'neje niwa Sinia' jlamtis iyoye'ate iyo ni jla'lap ni wikinie ti pesieje wikie'eyi ape'e ni ajnat. Je napokata napo Macedonia siu'neje napo Acaya jlele ka injie'yase siunie jiwoye ti jiwoyeyi ni inamtik, ti je jikakiuye pa Sinia'. Siunapo i'nio' yijits'i niwa ajnatis kia'iyo pajk'i ti 'yijene pi iyo'nase, it'imina ti kiak awoyi ti awo'ate, 'wanjliyi ka je iyok saka'niyejayi.

⁹Siukia awoniji'ni ti pajk'i ti 'yijene pi iyone, jitiej iyunitisk'i'ni ti ajo'wasepi ijwi'il ti ijiate ti 'es ti jiki'm selia'm, siu'neje ni ijwilis ti jiliyeyi kiwa aska topa ti jiwunitie. Naka 'neje jla'am ti jik'iuyi pi Sinia' ti je jikakiuye ti ijiate jla'm ti Sinia' ti ji'wasankiye po', jla'yi ki jiwoyeyi ti jlonitie jla'am.

¹⁰Kia'iyo injwela ti jinijijwijyink'iye pi jlas pi Sinia', ti janapimet ti jantal poliyi. Paka Saka'niona Jesús ti Sinia' jlam ti iniujwat kisie'e ti tajli pa a'no'. Jesús paka ti kas'manit, kajeyepa ti ajwayeje siunie Sinia' jiwak siunie jana'am.