Read Iyojwa'ja Chorote 1 Tesalonicenses 2 Bible Online

1 Tesalonicenses 2 - Iyojwa'ja Chorote bible

1 Tesalonicenses 2

¹I'lijwas, 'najanayi ala siojokia jloma ti ajok'iase, wuj ti 'es.

²Kajeyepa ti ajoktajapi, japo i'nio' yiji siujlieja isi' Filipos wuj ti je 'es siukia iyonts'eje, je kasse'nate 'yina ti ti'yikisants'i'ni. 'Najanayi pi jiwonayi naka. 'Yina Sinia' wuj ti iniuyets'e'm jakayik'i ti ajok'iase, 'wanjliyi ijiatataja ti po' japo teje'yi ijyilia'm, 'yina ka kia'awo ka sots'ina. Jla'm ani'netjliyi pa Sinia' ti ajwel niwa inamtis ti jlamtis jla'am ti isis ti ajwe'lase'm.

³'Yina je ka jiniliakie pi samtikie ka neye ts'iji, ka 'yakajmanats'iji'n ka ne ts'iji ka inkajyina niwa askiojwa'l, jeyi kat'aja.

⁴Sinia' pajk'i ti kassejlit ka ijiatayi ni awoki, 'yina kas'wen'ne, it'imina ti je isiwitits'e'm niwa jlamtis, jak je iyoyiji 'ni iyo'ni amtiki ti je niliak. Je napoka napo i'nio' ka iyojonk'iye ka 'yakanitie'ni, 'wenajlitieje pa Sinia' ti awoktajank'iye ka 'yakajanitie'ni, ti jla'am ti kas'ye'en iyo niwa sikiojwa'l.

⁵'Najanayi pi jiwonayi ti je ak'emijnatayi puwa yamtis ka wujwa kanses, ka 'nakayeyi ka int'emina ka poye paka k'iejliyeyi ka ikajliji, ni'ne ka wikiniet'aja japa. Sinia' kia'iyo 'yijene 'neje naka.

⁶Je naka ka iyokijyi'n ka kassonitie ka kasses, ka awoyeyi aska anechiyasasiets'i'm, ni'ne ka napokaye ijia.

⁷Ijiatatajaja sa'am 'notie'e wek ka iyok saka wosa'ase'm sam ti Sijwajieti jijliujwajnasts'e'm. 'Yina kiak je aniwonaja, 'wenajliyi ti aniwonaja 'ate napo kia'lis. Ap'elisina ti awak aska kiowe'e awok'iate siunapo i'nioki ti i'yena napo jilis.

⁸Kiak awona'ase pit ti wuj ti emina' kaswikie'eyi. Je najata ki awo'nase ti ajwe'lase'm niwa Sinia' jlamtis, ¡paj ti awoyetajapi ka iniwe'n astepe'e, kajeyepa ti ijiatk'i ti emina'!

⁹I'lijwas, astaj wujk'i siukia awoki ti akimak'iji'n, ti jloma ajnaj kia'iyojliyi, paj ti je kasts'isisieyi ti akimak'iji'n ti awokijyi'n pi sak lajaye. Jak je iyoyi ka poye pa ka intajli'i ka jwesiejayiji'n paka k'iejliyeyi ka kasts'isisi ti awokietaja ni sikijmaye, ti awok samtikie' ti ajwela niwa Sinia' jlamtis ti isis.

¹⁰Asa'am ti Sinia' jilists'ase'm ji'wena siunie aniwonaja ti awak aska kiowe'e, ti lajk'ipa ka k'iejliyeyi ka je 'esie ka iyoki ka i'winki'nase'm. Sinia' kia'iyo 'yijene pi iyone naka. Lapakawo ti anilesanaja jla'yi ti je aleki ti awoki naka ti ijiate ti 'es jla'am ka iyoki, jak je iyoyiji ti je yits'e paka injwel ka sitis poye.

¹¹Jla'yi ti 'najanayi ti wuj ti iniuye'ase'm pet siukiwa samtis iyo ti akela'ase'm, yi'i japo ti asa'am, awoye 'ate ni i'nio' ti po' napo jilis. Je aleyi ti 'ejie'nase'm ka woyeyi siunie 'es iyo napo Sinia' jilis, kajeyepa ti naka ti Sinia' tajnap'ase ni jika anechijiayas jla'yi ni jiwunitieye iyo, ka awayejyi pit.

¹³Je aleki ti sinikanitiejeye awenaja pi Sinia', kajeyepa ti atankiuniek'i ti awoyepe yamtikie', ti ajwe'lase'm niwa Sinia' jlamtis, ijiate je jit'iumaja ilia'm, 'wenajliyi ti jikima'yi, kajeyepa ti je jikakiunieyi ti Sinia' paka jla'am ti jlamtis, 'yina je tajle paka i'nioye ka jlamtisie'. Ijiatjliyi, paka ti Sinia' jlamtis niwaka, 'yina ti 'yaka siu'niwa tajla'm, ti asa'am ti je jikakiuye.

¹⁴I'lijwas, ti a'wetijwas kiak iyo'nase ti yi'nase'm ni wuj ti je 'es ti jinilayitieyi, jiwoye 'ateyeyi papo Sinia' jilis pet ti yi' Judéaja, ti ininop'ijiete wita'm pa Jesús, kajeyepa ti kia'iyo papo ji'wetijwas pet japo Judíojos wuj ti iliaki.

¹⁵Napok Judíojos ti takajlunt'iyijpe pi Saka'niona Jesús ka tiliana, iyot'iyipi jla'am papo kijilas t'ipi ti iliajnen'ni papo injwejlanawos, je 'wena papo ka kassot'ni napoka. Siuti kia'iyo, 'yina wuj ti ijwisi'n pi Sinia', jla'yi ti je ijwienjli paka inta'yi ilia'm, wikie'eyi ti teje'yi ilia'm.

¹⁶'Wanjliyijpe ti awoki ka iyok samtikieyi napoka ti je Judíojos, napokape ti ijiulsinaja'm kanjwayis pet, 'yaka ti je iwints'eme. 'Yina ni iniwonisi, talk'i'ni ti iyoyi niwa jikeyis. Nakayi, yiyi ni jlaj yi'i, sekyi'i ti nama pet ni jiwak iyo ni Sinia' ti yi'ne.

¹⁷I'lijwas, jakatajak'ipe ti ani'wena, 'yina itioyi'i kiwa jlomas ti je a'wena, je aleyi ti atankiu'niase'ni, ejlo'owek ti je ani'wenajata. Je aleyi ti anijnalas ti awotaja'ni kayik ka ijio'wase ka'wina kiu'ujwe.

¹⁸Je ajwela ka je iyokieta'ni ka naj, 'yakajlitieje ti yamata ti ya'am Pablok'i'm anijnalasata wata'a, 'yina ka lajak'i pa sitiejiejwa imosik ti tom'ni sik'ioye.

¹⁹I'lijwas, siuka 'nesta pi Saka'niona Jesús, ja ke 'wenaye papo ti jant'emina ti japoye ni sinijijwiyeja' jla'yi ni ja inikanitiejeyeja', 'yina 'yiniyijna'a ka wo 'ate ti janitonitieje astepe'e ti kiak jawo, jitieyi'i jla'am pi Sinia'.

²⁰Ijiate, asa'am ti jiwoye inikanitiejeyeja'.