Read Iyojwa'ja Chorote 1 Tesalonicenses 4 Bible Online

1 Tesalonicenses 4 - Iyojwa'ja Chorote bible

1 Tesalonicenses 4

¹'Nakayi japo i'lijwas, etijnape pa Saka'niona Jesús jle', ti sa'am wuj ti anip'elisina'ase ka je aleyeyi ni siunie iyo ni pajk'i ti 'eyasanayi, siunie ti Sinia' yimink'i. 'Ejie'nase'm ka je aleyeyi naka kawoyeyi.

²Je injwesiejayiji'n ka yikiajle'e'ni ask'ioye ka 'yiyasanayi siunie iyo ni 'eyasanayijpe, siunie tajle pi Saka'niona Jesús.

³Siunie Sinia' iyotajank'iye, naka ti iyotaja ka anilesanayiji, ka wujwa ka insisie. Je 'es ka poye paka iwoyi ni siunie ti wuj ti je 'es, naka ti 'yu'ni ni i'nio'.

⁴'Yina jla'm ijiate ti 'esiji ka akajlajyi siu'nie, paj ka inojwayeta'a ka woyeyi. Siunie ti awo'ate, 'esiji ka anijnoskijietayi niwa asjwes siunie ijiateje ti je 'esk'i, ajwel napo asjwa'yisk'i wita'm. 'Esiji ka alesanayiji siunie jiniwonayi, woye lajaye naka.

⁵Je 'es ka woyeyi ni siunie ti asa'am ti inteliajayi ka woyeyi, ti je injweyeyijits'i'ni ka woyeyi ni siunie je 'es, iyo napo i'nio' ti ijiateje ti 'wanjli witame ti je itiant'iejesi pi Sinia'.

⁶Wuj ti je 'esk'i naka ka kiak iwone pi jikiecha, naka siunie ajwe'el, siu'neje ni ka ink'emijiete pi jikiecha paka k'iejliyeyi. Saka'niona jla'am ti jawo lajaye niwaka wask'i'nelaja kia'iyo, iyo siunie ti pajk'i ti ajwe'lase'm ka je inkiwaliyeyi'i.

⁷Kajeyepa ti Sinia' je naka ka intanets'e ni siunie je 'es. Tanets'e ka iyoki ni 'es, ka ijiatayiji ka inilesanaja.

⁸Jak je iyoyiji siunie i'nio' ti iliaki naka inka'neyasajnaye, je paka ka i'nioye ka inlaki. Iliaki pa Sinia' ti iwints'e'm janaka jikimet ti 'es.

⁹Jlampet naka asemijnaye ti jininemina' ti injwanjliyeyik'i ki iyo pa Sijwajieti, nak je awo ka yiyiji ka ijliuye'asem'ni, ka yi'ne ni ip'isinik, 'yina ti Sinia' pajk'i ti i'neyasanayi, jla'am pa Sinia', ka emina' napo as'lejwas,

¹⁰siunie jiwonayi papo si'lijwas yiji jana Macedonia. Ijiatjliyi i'lijwas, awotajank'iye ka ak'iuyek'i'm, siunie ti ajlo'wase'm, ka ijiatayi ka aninemina'.

¹¹Katatayi ka awoyejyi'ni siunie ti ja atajlayiji ti ja akamaja. Kimayi siunie jiwo ka akimayi. 'Oye'yi siunie awotaja ka awoyeyi ti ajlo'wase'm;

¹²ja 'nakayeyi siunapo i'nio' Sinia' je jilis jank'iu'wase'm, jla'yi ti ja ke inetia'nase pi k'iejliyi.

¹³I'lijwas, jlampet siukiapo pajk'i ti 'yajle'n, awoktajank'iye ka 'najanayi pet paka wonayi, 'nakayi ti astankiujnieyi ja ke inlanayi, ka woye 'ate siunapo ijia lajk'iyi paka iwo ka nejejwijyink'iye pet.

¹⁴Iyo'ate ti je akakiunieje pa Jesús ti ijiate ti 'ya'al jla'yi ti iniu kisie'e ti tajli pi a'no', Sinia' janeki napoka ti pajk'i ti 'yajle'n ti je 'yakakiu ni Jesús jla'yi ti janojwa'n kisie'e ni jantajli ni a'no'.

¹⁵'Nak it'imina ti ajwe'lase'm, siu'nie Saka'niona t'eyasajnaye ti kasjwel pet, ti sam ti kas'wasajne'n, ti je 'ekiyejli'yiji ape'e 'ni ajnat ka 'nesta pi Saka'niona, ja ke iyok jiwek'iate ka na'ni jitieyi'i pa Sinia', 'wenajliyi ti ja kas'wanjlik'i isia'm. Ja ke inianak'iye siukiapo pajk'i ti 'yajle'n.

¹⁶Japoye siupa ja ina'lapa' ti ja tipe'yak ti ja jwesiejayijk'iji'ni. Japakaye pi injlojwajnas poli jlele jika anechiyas ti jantamti, siu'neje japa Sinia' ji'woso' ti wakiak'iu'. Sek jane'yi ka inamana'a ajnat'e pa Saka'niona ti jantal poliyi. 'Yina papoka siupapo pajt'ik'ipe ti 'yajle'n, ti je 'yakakiu pi Jesús, papok jana'an ti janok'i kisie'e.

¹⁷Jlampet ti kas'wasajne'n, papok jawieki siupapo ja tikinieje'ni ti ja toki'niji pijia'm pa jani'wenaja'a jikiowe'e ni jloma pi Saka'niona. Jajiok'i'ni ti jawiekiap pa Saka'niona pi yi'i pi ji'wet.

¹⁸It'imina ti awo'nase 'ate: nikelayi siuniwa Saka'niona jlamtis.