Read Iyojwa'ja Chorote 2 Tesalonicenses 1 Bible Online

2 Tesalonicenses 1 - Iyojwa'ja Chorote bible

2 Tesalonicenses 1

¹Asampey, i'lijwas ti Sinia' jilists'ase'm, ti as'wet pet jlajak isi' Tesalónica. Ya'am Pablok'i'm, ya'yi 'ni sikiecha Silvano,[1] siu'neje 'ni Timoteo, sa'am ti sip'esinik ti ajlok'iase, asa'am ti ijwanjliyeyik'i pa Sinia', jla'yi pi Saka'niona Jesús ti Sijwajieti.

²'Esiji pa Sinia', jla'yi pa Saka'niona Jesús ti Sijwajieti, ka imp'elisinape, jla'yi ka i'notata.

³I'lijwas, ajwelta ka jlam je iniwonaja ti sinikanitieyi awenaja'ni pi Sinia' astepe'e, 'yina ti je niliak kiaka ki jiwoyeyi siunie astankiujnieye ti 'es, jla'yi ni asemijnaye ti jlena'yi napo ijia as'lejwas 'neje, jlam yamjlijyi'n pet.

⁴Ti sa'am wuj ti atema'ase ni jiwoyeyi, ti awakietaja napo si'lijwas Sinia' jilis. Ajwelaja ape'e ki jiwoyeyi ti je t'ikijieta naka astankiujnieye ti 'es, jla'yi ti ka kia'iwo ka woye jlaja, ejlowek siunie tiwona'ase napo i'nio' ti teje aselia'm, jla'yi ki iyo ni aswet'ia ti poyeta.

⁵Naka ti 'yakajanit ti ijiate ti je niliak siunie Sinia' jikijmaye iyone, ti i'ye'en ni i'nio' siunie jitis iyoyi, ka ijiatayijijna'a ti ja as'nayi japoye yi'i ni ji'wet ti iyo anechiyasa', ti naka ti it'imina siunie iyo ti wuj ti janilayitieyi siunie jloma.

⁶Jla'yi ti jlam je iyo pi Sinia' ti yijni ni jijliak'ali napoka ti iwi'nase'm ni asjlak'ali,

⁷ti janeyi siunie jloma ti ja'naka'aja pi Saka'niona Jesús ti jantal poliyi. Sek jane'yi ti janinop'itayi ni iyo ni asjlak'ali, iyoye pet 'ate awoki. Siunapo jijliujwajnas poli jlele ti jlame ti jijweye po', napoka ti janamik'i, jla'yi ki jawo ti jane jikiowe'e pi jwat ti jank'ayi'ni,

⁸ti janame ti jan'ye'en ti jansa'a napoka i'nio' ti ijiateje ti teje'yi ilia'm ni Sinia', siu'neje napo ti je iyo ka ink'iuyeje ni inka'niye ti 'es ti ijwi'il pet pa Saka'niona Jesús.

⁹Siuti janeyi siojona jloma ti ja'nesi pi Saka'niona, 'yina napoka ti Sinia' jansa'a, napo kia'iyo ka kiak inwonayijinie'e ti jikio' jajnotie. Sek jane'yi ka intonitieyinie'e siupi janjlojwi ti jantajla'n jitieyi'i, jla'yi ti jantajlajni siunie iyo ti iyo anechiyasa' jajnok'i'ni ti kiak janwo pi jiwet'ia. Ja jlama pet napoka Sinia' jilis ti je 'yakakiuyis, ka jla'm iwonie'e ti jajnonitis, 'yina ti janesi'liet siupi janwoyi. Lapakawo ti je jikakiunieyi siunie ajwela'asepi.

¹¹'Yina nak it'imina ti je paj ka iliki ti awoki'ni ts'ajlaye astepe'e ti ajwelaja pa Sinia', ka Sinia' i'notata' kajeyepa jlam jla'm ti ta'nase. 'Esiji ka jijweye inejni wikie'eyi siunie 'es ti jawoyeyi, siu'neje ni askijmaye ti 'es ti jitiajlayiji ni astankiujnieye ti 'es.

¹²Siuti kiak jawo napo i'nio' jajnonitieyisna'a ni Saka'niona Jesús jle', sek jane'yi kiak iwona'asenie'e pet ti asa'am ti jajnonitie, 'yina ti kiak iyo ni jikap'ijliuskiye ti jla'am ti tajle pi Sinia', jla'yi pi Saka'niona Jesús ti Sijwajieti.