Read Iyojwa'ja Chorote 1 Timoteo 1 Bible Online

1 Timoteo 1 - Iyojwa'ja Chorote bible

1 Timoteo 1

¹Ampey isiecha Timoteo, ya'am Pablok'i'm, yam ti ajlo'wase 'ni ip'isinik. Ti Sijwajieti jijliujwanikk'i'm, ka iyot'e 'ate siunie Sinia' ti Sijwajieti jikawo siunie jlame ti je toj'we ti jla'am ti kiak siwoneje siu'neje pa Saka'niona Jesús ti jlam ti sinijijwiye. A'am ti jiwoye 'ate ka yasa'a'm ti tajle ki iyo ni sitienkiujnieye ti 'es ti wuj ti emina. 'Esiji ka Sinia' jla'yi pa Sijwajieti Jesús ti Saka'niona, 'esiji ka inwe'na'm ni siunie 'es, siu'neje ka imp'elisimpe, jla'yi ka inlesa'n.

³Ti awoyeyipi ka ijio 'niji Macedóniaja, jla'am ajalaskinjli'ya ka in'wanjli Éfesojo. Ka ajloye siupapo i'nio' ti ijwilta ka inka'neyasajne'n, 'yina ti je 'es ni siunie taka'neyasane. Jloyeyi ka inleyi ni iniwonisiji.

⁴Ke ene 'ate siuti janjwel ka ini'neyasane siupi iyot'iyipi papo pajt'ipi, jla'yi ti ijwienjli yijnap'eyi ti ini'neyasane siupi iyot'iyipi pet papo jika kijilas t'ipi siupi iniwonisi. Niwaka ti it'imina napo i'nio' ti ji'lija je isis, 'yina je iniuyeje ka iwo jlosik ink'ieye ka jitiej inwoma pa Sinia' jla'yi ka iwoyi siunie iyo.

⁵Tempi it'imina ti ekiaj'la pet naka ti ajloye'a'm, 'nakayeyijna'a napo Sinia' jilis ka inenjlajap ni jlemijnaye ti tajla'm niwa jlosikis ti isis, jla'yi ka intajle siunie ti i'nialkitk'iyi ti jitiej iyoma pa Sinia' siu'neje ti jantajle ti ja lajak'i pa ka k'iejliyeyi paka jitiej wujwayisk'i ka iwo t'ajwejliye.

⁶'Yina po' napo ti ijiate ti ilik'i niwaka, 'yaka 'yakamk'iji'n siuniwa jlamtis laj lajaye.

⁷Iyoyisink'iye pet ka jlamayis ka inka'neyasanisi ki Moisés jika'neyasajnaye, jlam'ne je itinisisk'i siunie yamtiyisi, ijwilis ka ijiatayi ka ijnewitejeje, siunie taka'neyasane.

⁸Kasts'ajane ti je niliak naka Moisés jika'neyasajnaye, siuti tewitaja siunie iyoyiyi.

⁹Siuniwa inka'neyasajnayejes, je tejeye napo i'nio' ti isis ti tilisanajat'iyijpe, 'wenajliyi ti tejeye napoka je isis ti iyoyi ni je 'es; siunapo jwesis, siu'neje napo kakiujnietas; siunapo inke' iyo kipijnasa', siu'neje napo ti iliaki ni Sinia', siu'neje napo teje'yi ilia'm ni 'es, siunapo i'nio' iliajne'n napo jiniewot, wikie'eyi napoka kalankijietas;

¹⁰siu'neje napo 'yu'ni, siu'neje napo iyoyi ni je 'es ti ayijniesk'i wita'm, siu'neje napo i'nio' ti isi'mik'i napo ijia ti iyo jikipijnasa', siuti iwin'ni wikiniet'aj ikajlayiji. Kia'iyojliyi siunapo sintijyis, siu'neje napo ti ijwil ti ijiate siupi iyo ti ijwil kan'wenis, jlam'ne je ijiatk'i; napoka napo ijiate ti 'yakaja'a pet ti teje'yi ilia'm naka ni siunie 'es inka'neyasajnaye ni tajle pi Sinia'.

¹¹Siu'nie inka'neyasajnaye ti 'es, ti yiji naka inka'niye ti 'es ti Sinia' ti jiwunitieye po', yikialk'i ka ijwile pijia'm.

¹²Inikanitiejeye ekiajle pi Saka'niona Jesús ti Sijwajieti, jla'am ti iyo ijwiyeja', jla'am ti 'yujwanitk'i'm ka sejni ni isijmaye iyo.

¹³Ijiate wuj ti je alesanataja pi Sinia', 'wena awo ti i'lijp'an je 'esijpe, ti ata'yi ilia'm kajeyepa ti sijwesieja'm. 'Yina ti jakayi ti lajk'iyi pa ka iyoyi ti je sitiant'ieje pi Sinia', wuj ti sip'elisi'n.

¹⁴Sip'elisi'n ti je wata'a, 'nakayi yikialk'i ka ijiatayiji ka itiej iyoma, jla'yi ni yimijnaye, iyoye 'ate pet 'nakayi 'ni yits'e ti anitajaki pi Sijwajieti Jesús.

¹⁵'Yina jla'am je iyo naka ti iyo'ate, 'esiji ka 'wena je ink'iuyisiap'e wikie'eyi napo i'nio', ti Sijwajieti Jesús na'm ajnat'e je 'wena papo ka iname, napoka inkeyis jiliajnis ka injwajiete'n. Siuti ya'am naka ti ijiateje ti je 'esijiyi, ti si'wanjlipe wita'm ti awoyi ni wuj ti je 'es.

¹⁶'Yina ti Sinia' wuj ti sip'elisi'n, it'imina ki iyo ti Sijwajieti wuj ti inilayiti pet its'ioye ti je k'iejliyi paka inenk'i'm 'nakayi ti jan'we'en napo siunapo iyojon pet k'iye ka neki siunie iyoyi, jla'yi ti iyojonk'iye pet kan'we'n jana ji'wasankiye ti laj jlaja, 'yiniye ka iniane k'iye napoka.

¹⁷¡'Esiji ka iyunitie ni iyo ti jlam ti anechiyas, jla'yi ti ja ke iyok jlaja ti jayunitie, ti ijwienjli jla'am ti Sinia', jla'am ti je ti'wena ka paja, anechiyas ti je pajna'a ka netia'n, je ti'wena ka'na'al! Amén.

¹⁸Yas Timoteo, 'ye'en siu'nie jayo'naja ti ja'yiyasa'n, ka 'wena ijnojwap'e wat siuniwa Sinia' jlamtis iyont'iyipi ti injwe'el ti ijwijla'm papo jijwejlanawos. Ja ke paja ka aleyi ti ja awoyi atankiujnieyeja' kiwa inamtis, 'nakayi ti ja'nesiejempe ti jlak'aliyijin'ni ni je 'es.

¹⁹Jlam ja akjliyi siunie jawo ti ataj jiwoma pa Sinia' siu'neje ni atankiujnieye, 'nakayijna'a ts'ijiye ja lajak'ina'a paka k'iejliyeyi paka awo 'ajwejliye, najataja jla'am ni 'es ti jawoyi. 'Yina po' napo ti iliyi naka jitienkiujnieye ti 'es, napoka'ne siunapo je ilisanijiyi ni iyoyi.

²⁰Jiwet'ia kia'iyo japo Himeneo, siu'neje ja Alejandro, ya'am pajk'i ti ekiajle ni sitiejiejwa imosik ja 'nakayi ti ja'naja'n jlosiki, janleyeyijna'a siuniwa jlamtis jiniliaja ti yi'ne ni Sinia'.