Read Iyojwa'ja Chorote 1 Timoteo 2 Bible Online

1 Timoteo 2 - Iyojwa'ja Chorote bible

1 Timoteo 2

¹Janiajnat siu'nie ti ja'yijie'ne napo Sinia' jilis ka 'najla'n wikie'eyi napo i'nio' yi' ape'e 'ni ajnat, jla'yi ka 'esieyiji ka inip'elisini pi Sinia', jla'yi ka jinikanitiejeye inekiajlisipi pi Sinia'.

²Nak ijiateje ti 'yu'weyi siuti ja'najlan'ni napoka anechiyasas wus, siu'neje napo yi' jitieyi'i pet. 'Nakayipe ti ja lajak'i paka k'iejliyeyi ka nets'e, ka ikajmakiepe, 'esiji ka ijiatayi pet ka je kasjweye ni Sinia', jayoki pet ni siunie 'es ti tijnajyi.

³Jla'm ijiate wek jla'am naka ti 'es, kajeyepa ti 'yakanit'ni pet ni Sinia' ti Sijwajieti.

⁴'Yina jla'am iyotaja ka wikie'eyeyi napo i'nio' kanjwa', siu'neje ka intant'ieje niwa jlamtis ti ijiatk'i.

⁵Sinia' ijwienjli, jla'yi ti ijwienjli ni siunie i'nio' ti itionk'i wita'm napo i'nio' siu'neje ni Sinia'; naka ni Sijwajieti Jesús.

⁶Siupi iyot'iyipi papo Sinia' jikawos ti ijwilis, 'wena je ijiojwap'e siupi iyo ti yiyeyi, ti iniwe'n ape'e wikie'eyi napo i'nio' kanjwajiete'n.

⁷Jak je iyoyiji ti Sinia' siwojwa'n jijliujwanik'i'm, ka ijwile ni siunie inka'niye napoka siunapo ti je Judíojos, ka 'yiyasane naka ni siunie intankiujnieye ti 'es, siu'neje ni ijiatk'i. Jlajme awoyi, ijiatk'i siunie awoyi.

⁸Naka ti awotaja ka iwoyi wikie'eyi napo yi'i pi yi'i, ka int'ajlisi pi Sinia', ka jikioye ijnayisk'i pijia'm. Siuti kiak jawoyi, 'esiji kanjwanjlik'i siupi jlosik janwonisiji; ja ke injlejnate siunie jiwak, ni'ne ka woyi naka ti iniewitis'ni.

⁹Jlampet napo asejnia, awo'ate: 'esiji ka 'nots'iji'n niwa ji'wuye, siuniwa ji'wuye iyo pet jana asejnia ti jlosik po'. Siuti inilesanata ti jlete'l isiayetajets'i, je 'esiji ka inkajanit ape'e siunie iyo ti ilisa'n niwa ji'wole ti isiajyi'ni, ni'ne ka inkime siuniwa wikinie maja ti 'najli, ni'ne ka niwakaye t'ijyi'l, iyoye'ate niwa ji'wuye ti t'ojnits'i.

¹⁰Jla'm ijiate ni 'es ka woyi, kan'yejnap ni ji'wu' ti 'es, iyo ti inilesanijisi jitieyi'i pi Sinia'.

¹¹Siuti initotietak'i wita'm napo i'nio', siojona asejnia 'esiji kank'iu'wate, ja wujwa kan'ye'en siupa t'eyasanaja.

¹²Siojona asejnia ka injwel ka inka'neyasa'n, nak je anijweki ti je awejna'm ka kiak iniwone, jla'yi kanjwel kawo anechiyaskiye k'iye napo ayijnies. Awotajank'iye ka k'iuk'iate ti yiyis 'wuk kiajwe.

¹³Kajeyepa, ti 'nelanjie'e, Sinia' iniajnat pa Adán ti ipiujunit, itimeje ti jiwekie'ejat'ipi pet japa asejnia Eva ti ilisane.

¹⁴'Yina je paka Adán ka imosik ka jikajejlasaye ine'ne, japaka jlam japa asejnia, pakayi ti iyoyi pi jike'.

¹⁵Siojona asejnia ti jlam ti inet, siuti ja ke inleyi ni siunie jitienkiujnieye ti 'es ti iyoyi, jla'yi ni jlemijnaye, jla'yi ti janilesaniji jitieyi'i pi Sinia', janak janjwa'.