Read Iyojwa'ja Chorote 1 Timoteo 3 Bible Online

1 Timoteo 3 - Iyojwa'ja Chorote bible

1 Timoteo 3

¹Ijiatk'i siu'nie ti po' ni yimi'n ka jikijmaye kiak iwo ti i'yena napo Sinia' jilis, 'yina wuj ti 'es ni itiliaja.

²Jak je iyoyiji ti jikijmaye kia'iyoyi ni i'nio', 'esiji ka ini'ye'en ni siunie iniwoneje, 'nakayeyijna'a ti ja lajak'ipa ka ti'yenaja. Janjwankit siojopa jik'iemjla. Jlosik japoye ni i'nio'. Ti k'iejliyi pa jlam je iyone 'ate ka woyi, 'wenajliyi ti wuj ti i'ye'en t'oniye 'es. Jla'yi ti i'ye'n ilia'm napo ijioyi. Naka ni i'nio' ti 'yijene ti 'yiyasa'n napo ijia.

³Je 'yata ni i'nio', jla'yi ti je naka ni siunie ti inilanejen'ni napo ijia, 'wenajliyi jla'am ti takap'ijliuski. 'Yakama ni i'nio', je itiliaja jana wikiniet'aj.

⁴Naka i'nio' ti 'yijene ti i'yena ni ji'wet, jilis its'iuye, kajeyepa ti iyo lajaye.

⁵Kajeyepa ti siuti janakaye siunie je 'yijene ka 'yena ni ji'wet, ¿tepa jawo ka 'najane paka wone ka 'yena napo Sinia' jilis?

⁶Ijiatjliyi siunie iyo ka 'yena napo Sinia' jilis, je ti'yenajayi'n siunie i'nio' je pajk'i ti ininekial. Iyojonk'iye ka nakaye siunie ti paj, kajeyepa siunie ti je paja ni inamtik ent'a janitonit. Jawoyena 'ate pi imosik siupi iyo pi jiwet'ia ti tena'a.

⁷Janakaye siunie i'nio', ti siunapo je iyoyi ni inamtik jank'iuye kajeyepa ti jawoyis lajaye. Ja'nakayi ti ja ke tiwet'ianaja ts'iji, ni'ne ka nojwa'm jana jikatsala ni imosik.

⁸Kia'iyojliyi pit siunapo iniuyeje pi Sinia' pi jikijmaye janakaye siunie i'nio' ti t'oniye 'es, ji'lija je itimisiete, je 'yata, ni'ne ka inteliaja ka inkajli jana wikiniet'aj.

⁹Janakaye siunie ti ja ijiatayi ti janki'me siunie iyo ni ijiatk'i ni kas'wenkinaja, siunie ti je akakiunieje, jla'yi ti lajk'ipa ka t'ajwejli ineyiji pa ka k'iejliyeyi.

¹⁰Jana'an ka ti'yena siuti ja ijiatayiji ti ja lajak'ipa paka jitis inwo. Siuti ja lajak'ipa nak 'es k'iye ka kiak tiwonaja ka inoyeje pi Sinia' ni jikijmaye.

¹¹Kia'iyojliyi napo asejnia ti iniuyeje pi Sinia' ni jikijmaye ja ke jiwekie'eja jana i'nioki. Janapokaye napo ti je yimi'n siuniwa ye'laja jiniliaja, je nesi'li'yi pa k'iejliyi, 'wenajliyi ti i'ye'en. Je tak'emiyeje wek siupi k'iejliyi ti iyo ka woyi.

¹²Jayapiliji'ijyi pet ti jajwil napo ayijnies; ja ke nakaye siunie jijwa'yis 'loj, jla'yi ti ja'najane ka 'yena papo jilis, jla'yi pa ji'wet.

¹³Siuti 'es pi jikijmaye ti iyoyi napoka, siunapo ijia Sinia' jilis ijiunitieyisi pet, 'yina ijiatayi pet ti jijweye po' ti iyoyisi jlamtikie' pa Sijwajieti Jesús.

¹⁴Awotajank'iye ka je pajayinie'e ka ijio'wa, 'yina ajlo'wa ta'a 'ni ip'isinik,

¹⁵kajeyepa 'lojwinie'e ka je simajli. 'Yina je sikiwit'a'm siunie iyo ni sikijmaye, ti Sinia' ji'wet jlelets'e'm, ka iyot'e 'ate, Sinia' ti je paj ka netia'n jilis. Jlam ti yints'e'm ka 'yitie pijia'm naka ni siunie ijiatk'i jla'yi ti akiejek'i ape'e.

¹⁶'Yaka ti je jlase' ki iyo ni siunie je akakiunieje. Sinia' 'yakajanitts'e'm sa'am ni siunie ti 'es, ti iyo'ate: Sijwajieti ti inikajanitie, iniwojwa'n i'nioye, jlampet ti Sinia' iniujwata kisie'e, ti tajli ki a'no', 'yakaja ape'e pet ti Saka'niona, injlojwajnas poli jlele i'wi'in, sekyi'i ti tijwelajayi pet ape'e wikie'eyi napo i'nio' ti yi' ape'e 'ni ajnat. Ijiate je takakiunisi, siuti tikiniejayi 'niji poliyi, 'yina sekyi'i ti isima ilia'm, siunie 'es ti tiwunitie.