Read Iyojwa'ja Chorote 2 Timoteo 1 Bible Online

2 Timoteo 1 - Iyojwa'ja Chorote bible

2 Timoteo 1

¹Ampey ja isiecha Timoteo, ya'am Pablok'i'm ti Sijwajieti Jesús jijliujwanikk'i'm, 'yina ti awoyi siunie Sinia' jlam ti ijliuyijk'i'm ka iyo. Jla'yi ti yikialk'i ka ijwijla'm ti ji'wasankiye po' napoka ti ini'nopijiete pi Sijwajieti Jesús, ya'am ti ika jwukis siu'niwa. A'am ti awo yasa'a'm ti wuj ti emi'n, Timoteo, 'esiji ka Sinia', jla'yi pi Sijwajieti Jesús ti Saka'niona ka we'na'm ni 'es, jla'yi ka imp'elisimpe, siu'neje ka akama.

³Ti awo 'yejlayeja', jloma ajnaj, itiej wuj'wa'ni, sekyi'i ti awoye'eje inikanitiejayi pi Sinia' ti 'Yaka'niona. Ka kia'awo ka poye paka k'iejliyeyi ka iyo 'yajwejliye, ti ijiate ti anoyeje, iyot'iyipi papo 'yaka kijilas mases.

⁴Je paj ka sikiwaliyi'i siukia ti jlap'nijpe, it'imina ti ajalas ka i'wi'in, sek jantajle ka wujwana'a ka ts'ajkaj'ni siuti kiak jawo.

⁵Je paj ka iliyi ti atankiunk'i siunie ti jiwoyi ni atankiujnieye ti 'es, siujlieja ant'e Loida jlajak tajle ti 'nelanjie'e, sekyi'i ti ijliasayi pet jla'a et Eunice, naka'ne siunie ti je sit'iayiji'n ti yi'a.

⁶Siuti kia'iyo, 'esiji ka je ekiajle isia'm naka siunie Sinia' iyo a'wajieta' jakayi ti siojokia jloma ti isioye e'n atepe'e ti 'a'l atepe'e.

⁷'Yina Sinia' je naka ka inekialts'e ka je kasjwe'e, 'wenajliyi ti iwints'e'm ni sijweye, jla'yi ni semijnaye, siu'neje ti wuj ti a'yena siunie aniwonaja.

⁸Nak it'imina ti awo'ate, 'esiji ke 'najwel ti jijwe'el ni Saka'niona, jla'yi ti ja ke i'najwel itipe'e siuti ajyi jla'a insat jiwe, lapakawo ti naka ti it'imink'i ti anoyeje. 'Yina noyeje pet siunie ti anilayiti ape'e niwa Sinia' jlamtis, je lajk'i ki iyo ni ajweye ti jitiajleje ni Sinia'.

⁹Sinia' kasjwajiet, jlam ti isimts'e'm, jlam ti kaslej, 'nakayi ja kasts'isis. Je ka isijmayeja ka 'esie kant'emina siuti ti kia'iyo, 'wenajliyi ni iyo ti jla'am ti tajle, ni iyo ka wonts'e ti kasp'elisi'n. Ka lajat'ik'ipe pa Sijwajieti Jesús, ti Sinia' kassemi'n, tajlap'e ti lajlik'ijipa 'ni ajnat.

¹⁰Siuti Saka'niona Jesús nama ajnat'e, kiakayi'ne ti 'yakajanitk'i siunie jlemijnaye ti yints'e'm. Sijwajieti jlam ti initiajnat ni jijweye iyo jana 'najlati, 'yina ka lajak'i niwak Sinia' jlamtis ti isis ti tijwela, niwaka'ne ti ition kisie'e, janak in'wasankiye ti laj jlaja.

¹¹Ya'am ti Sinia' jikawok'i'm ka ijwil 'nak jika'niye, jla'yi ti jijliujwanik'i'm, jla'yi ti iyo ka'yiyasaneje'n niwa jlamtis ti isis napo i'nio'.

¹²Naka'ne ti it'imink'i siu'nie iyo 'ni iwit'ia ti wuj ti anilayiti. 'Yina je ts'ajwejle, kajeyepa ti ts'ajane pa awone siunie I'nio' ti itiej awomaja. Jlam ti janoyijk'i'm ti ja wujwa ti jan'yenik'i'm siunie ti yikialk'i, jlomas ti jan'yena paj ka ineyeyinie'e janak jloma ti yi' jlaja.

¹³Siuti jika'neyasanata, woyi siukia ti awoyi ti 'es, ti pajk'i ti 'eyasane. Ja ke inets'e japa kajlomaye ka leyi siunie 'es ti awoki, siu'neje ni iyo ni semijnaye ti yits'e ti ani'nopijietaja pa Sijwajieti Jesús.

¹⁴Po' siojona jikimet ti 'es ti tajle pi Sinia' ti janoye'a'm. Lesaniji naka ni 'es ti tekiajla'a.

¹⁵'Najane ala pi jiwone ti pajk'i ilik'i siojopo ji'wet jana ajnat Asia, ejlo'ne ka japokataja ja Figelo siu'neje ja Hermógenes.

¹⁶'Esiji ka Sinia' imp'elisimpe siojopo Onesíforo ji'wet jlele, jlam ti 'yuk'i 'neye ti yi'ni ijiap, ti ajyi jlaja insat jiwe, ka kia'awo ka 'najwel itipe'e ti ts'otie a'laja'm.

¹⁷Jak je iyoyiji ti yiyepe Rómaja, ka kia'iwo ka ji'wetjliyeyi'n'ni ti siwojyi'ni 'yina paj ti ijyiwitak'ipi.

¹⁸Kiak jiwo 'najane pi jiwone ti jla'am wuj ti iniuyits'e'm, ti awak Éfesojo. 'Esiji ka wujwape ka Saka'niona inoyeje, kamp'elisi'n pet, ka netieje janak jloma ti jana'am.