Read Iyojwa'ja Chorote Hebreos 11 Bible Online

Hebreos 11 - Iyojwa'ja Chorote bible

Hebreos 11

¹Siunie ti ijiate ti titienkiunie, janaka ti tinijijwikink'iye ti ja ti'wena siunie jane inkiojyi. Jak je iyoyiji siuniwa je ti'wena tiwokie 'ate, “Ijiatk'i.”

²Siupapo sitise'l t'ipi, siuti Sinia' itime 'yina ti paka jla'am siupa jitienkiujnieye ti 'es ti je takakiu'n ti it'imina.

³'Yina naka jla'am ti siunie ti je akakiunie, naka ti kasts'esi, ti it'imina ti kasts'ajane pi awonaja ti jla'am pi Sinia' ti iyo ji'niayija' niwa jlamtis ti ilisanayi siunie poli, siu'neje 'ni ajnat, wikie'eyi siuniwa wask'i'nelaja ti'wena. Jak je iyoyi ti kia'iyo ni siunie a'wena siuniwa 'yaka niwak talt'iyipi pet siuniwa ti jet'i 'yakajpe.

⁴Siupa Abel t'ipi ti je 'yakakiu pa Sinia', jak je iyoyiji pet siupuwa yikiajle pi Sinia', iyoyi ji'wajieta', pakayi ti iliajne'n siupuwa jiliajwas ji'wole po' lis. Siupa takat'ine 'yaka'm ape'e siupa jikilia takat'intaja pet ti yikiajle pa Sinia'. 'Yina pakayi ti Sinia' kiak iyo'neje ti ijwi'il ti 'esi'n pi i'nio', sekyi'i je 'yuma ilia'm siupa itiu'un ti iyoyi ji'wajietayi pi Sinia'. 'Wanjliyi siupa Abel pajatak'i ti 'ya'al, 'yina 'yiniye ka pakaye ka injlots'i'ni, wuj ti kasts'esi siunie iyo ti je 'yakakiu pa Sinia'.

⁵Siupa Enoc ti kia'iyo ti je 'yakakiu pa Sinia', jak je iyoyiji ka Sinia' je inayi wita'm ti i'nio' ti yame, ti je iyo ka'na'al. 'Yina je ti'wena, kajeyepa ti jla'am pa Sinia' ti yame pijia'm. Siuniwa inamtis ijwi'il siuti Sinia' je yamjliyi'iji, wuj ti itime.

⁶'Yina awo'ate ti siunie i'nio' jikakiujnieye po' nak je 'yakajli pet ka ijnonit pa Sinia'. Kajeyepa ti siuti jawo ka ijnoyi pa Sinia', je 'esiji ka inkakiuni ti ijiate pi Sinia' ti po', siu'neje ti je 'wena paka intajle siunie 'es ti iwijna'm siunapo ti iyojonk'iye ka'we'en.

⁷Siupa Noé ti je 'yakakiu pa Sinia', sekyi'i its'iuye siupa Sinia' iyone ti ijwijla'm siupa jawo ti janeyi siupuwa ti jitiete je i'winjli'ijyi. Pakayi'ne pa Noé ti ilisane japa kasejkana ti iyo ka injwajiete'n papo ji'wet jlele. 'Yina siupa ti je takakiu'n, paka ti 'yakajanit'i ape'e papo i'nio' ti jitis po' 'ne ajnat'e, jlampet pak Noé Sinia' pak yiniji pet ti ilisajne'n siupa ti je 'yakakiu.

⁸Siupa Abraham ti je 'yakakiu pa Sinia', jak je iyo ka t'onieyi'i pet k'iye ti tanayi, sekyi'i iwise'ni siupa ajnat Sinia' pajk'i ti ijwijla'm ti yikiajle ka ne'yi. Jak je iyoyi siuti yamat'ipi ti janjlase japak ajnat tijwelaja'm, 'yina jlam ya'am jiwekie'e ti je 'yijene paka intajyi.

⁹Jak je iyoyi siuti yi'i japak ajnat Sinia' yikiajle ti iyo ji'weta', siuti je 'yakakiu pa Sinia', iniwone 'ate iyo siunie i'nio' ti je 'wet'ise'. Siupuwa iyot'iyijpe ji'wukila puwaka 'nejes, iyot'iyipi'iji pak jlas Isaac, siu'neje pa jikiyas Jacob, siupapo ti kia'iyo ti ja jikimita siupa Sinia' pajk'i ti ijwijla'm.

¹⁰Kajeyepa ti Abraham japak its'iujwap siojopa isi' je k'as pijia'm, Sinia' jilisanki, 'yina ti jla'am ti jiwo ti yi'nik'i niwa imp'esijna' siu'neje ti jiwo ti ilisane japak isi'.

¹¹Abraham 'yina ti je 'yakakiu pa Sinia', jak je iyoyi 'wanjliyi kijilata, siu'neje japa jik'iemjla kia'iyo kijilayeta, lapakawo ti Sinia' yikiajlayi'iji ti iyo jweyeja', jak je iyo jilis poye'eje. Lapakawo ti jitienkiujnieye ipijlaniti siupa Sinia' iyo, ijiatk'i.

¹²Abraham ti majleyet'iyijpe ka netia'n, jlampa itimayi siupapo jilis t'ipi ti je jlase', ti ti'yenajap siuniwa katese'l ts'iji poliyi, siu'neje na jolo' jikiusk'i ni i'niat lajlik'i, ti je titieyeje ka tetitinak'i.

¹³Pi k'iet'iyik'i'nipe siupa Abraham, siu'neje pa Isaac, siu'neje pa Jacob, nojwat'ipi ajnata'm. 'Yina 'wanjliyi ape'e siunie ti je 'yakakiu pa Sinia', ejlo wek ti je yamik'i siupa Sinia' ijwijla'm. 'Yina 'yiniye ka jitiej iname wek pi 'lajni, sekyi'i iyoyits'i 'ate, “Seka'a siusie 'yakaja.” Ka kia'iwo ka 'najwelis jitipe'e ti je 'wet'ise', sekyi'i iyoyits'i 'ate, “Je ijiat ka i'wita' siu'nie ajnat, ja ke sipa'a ka itiajla'ana'a.”

¹⁴Ijiate ti siunapo ti ji'lij kiak iyone 'yakajk'i ti ijialas ape'e siojopa ka ijiatayi ti ja jika ajnata.

¹⁵Jet'i istietajpe ka jikiowe inapili'ni siojopa ajnat tajlisi, ka inapiliet'itiek'ipe isia'm ka inapilisi siojopa tajlits'i.

¹⁶'Yina jla'am jitiej yamitjliyisi'ni pet siojopa ti ijiate jla'am ti 'es ti itiliajasi, ka iyot'e 'ate siojona ji'wetis ti yi' poliyi. It'imina pet ni Sinia' ti je 'najwejle ti kiak tiwonaja ti iniwone Jiniaye' papoka, 'yina ti pajk'i ti itime ti iwiakajlanit k'iye siunie isi' ti ja ji'wetayis.

¹⁷Siupa Abraham ti je 'yakakiu pa Sinia', Sinia' ijyijlit pakayi ti isime pak jlas Isaac ti jota ka ila'an ti iyotaja ka inekiajle pa Sinia'. 'Yina jlam'ne Sinia' pajk'i ti ijwijla'm ti iyo'ate, “Jantajle napo Isaac jilis siunapo akichasa'”. 'Yina pajk'i ti inite'em ti kiak iyotaja ka woyi ka inekial pa jlas ijwienjli.

¹⁸

¹⁹Lapakawo pa Abraham ti jlosik itiej ape'e siunie jijweye ni Sinia' ti po'. 'Yina siunie ti ka inekial pijia'm siunapo 'yajle'n, je ijlie'en, 'yijene pi iyone. Ijiatjliyi, jak je iyoyi pa Abraham ti yikiajlayi'i ti jlas yijap, 'yiniye ka ijiatayi ka pakaye a'no' ka intajla'm ka ink'iewe ilia'm.

²⁰Siupet ti Isaac ti je 'yakakiu pa Sinia', sekyi'i ti ijwijla'm papo jilis Jacob, siu'neje pa Esaú, siupa jawone ti jane'ne siupa jikap'ijliuskiye ti 'es.

²¹Siupa Jacob ti je 'yakakiu pa Sinia' ti je tojwa'a ka'na'al, sekyi'i ijwijla'm siupa jikap'ijliuskiye ti 'es ti jane'ne papoka jikichas José jilis ti times. Sekyi'i 'wes jiwek ti 'yit isia'm pa jikiajat ti iyunitiet'ipi pa Sinia'.

²²Siupa José ti je 'yakakiu pa Sinia', ti je tojwa'a ka'na'al 'yina ta'a ti ijwijla'm papo Israel jika kia'lis ti japoye japa jloma ti jantajlisia'm japak ajnat Egipto, sekyi'i ti ji'lij iliyi ta'a ti ijliuye ta'a siupa ja tiwonaja puwa t'ajwes.

²³Siupapo Moisés jiniewot ti je 'yakakiuyis pa Sinia' pakayi ti Moisés najape puwa we'lajas pa yi'i ti jiniewot ijwiki'n, 'yina ti i'winis ti 'es pi kia'le, siu'neje ti je jnots'inisie pa anechiyas siupa ti takajlunie ka tilianaja'n papo kia'lis papokata ti i'yenijijyi'n papo ayijnies jilis.

²⁴Ti Moisés ti je 'yakakiu pa Sinia' siuti isijliye t'ipi, 'yina je iyojonk'iye ka impe'ya papo ka tijwela ti japak anechiyas Egipto jlele jlase' ti itioyit ti iyo jlasa'.

²⁵'Yina je iyo ka inkatate ka woyi siuniwa wask'i'nelaja siuniwa je t'o'n siunie iyo pit ni inke', 'wenajliyi ti tijnats'i siunie ti iyo ka jiliaye inoj wita'm siupapo Sinia' jilis t'ipi siupi iyo ti inilayiti.

²⁶'Yina ti 'yiniye ka wo'ate, “Siunie ti i'nio' siliakiyetaja ti nak akk'i'ni ni Sijwajieti, awo'ate siunie jwajla'a i'wi'in.” 'Yina jikiowe je yapili'ni siuniwa wask'i'nelaja isis yiji jana Egipto, lapakawo ti kia'iyo jitiej iyoma siunie Sinia' jawoyi jikajaye ti janwejna'm.

²⁷Siupa Moisés ti je 'yakakiu pa Sinia' it'imint'iyijpe ti ya'am ti taj'le japa ajnat Egipto, ti je jnots'ina pa anechiyas ti ijiat ti jwesie. 'Yina jla'am ini'netjli ape'e siupa ijialas ka woyi, lapakawo ti 'yiniye ka 'wene siupa Sinia' ti je ti'wena pa k'iejliyi.

²⁸'Yina ti je 'yakakiu pa Sinia', Moisés ilisanat'iyijpe siojopa Pascua, sekyi'i ti ijliuyeyi papo i'nio' ka 'nelinits'ijk'i puwa jika 'wuk kiwitawa pa 'woyis, 'nakayi ti siupa injlojwanik poli jlele kalankijieta pet ja ke i'noyits'i ka inlajne'n siupapo Israel jika kia'lis jilis siupapo isijlijyi'n.

²⁹Siupapo Israel jika kia'lisjimpe siuti je 'yakakiuyis pa Sinia', siuti yikiwaja'm pak i'niat lajlik'i jle' iyo'ate ‘I'niat lajlik'i isiati'ni’, ti 'yinit'iyijpe ka 'noyisk'i siupa ti ijiateje ti yi'liak'i. Jak je iyoyiji pet siupapo tokis inwak jiwos Egipto jlele, ti yikiwatajasia'm pet, 'yina no'we ti yimk'anaja'n.

³⁰Siupapo Israel jika kia'lis ti je 'yakakiuyis pa Sinia', jika jlomas ijwienjli sikio' itij'we times tom'niji ti yikiajlisiapen'ni siojopa isi' Jericó, 'yina paj ti yamat'ipi isia'm siupa inwasok iniujwape'n.

³¹Jlampet siojopa i'nioki ijia jwa'yis jiwoki siojopa jle' iyo'ate Rahab, ti kia'iyo je 'yakakiu pa Sinia'. 'Yina jiliaye je iniuyi wita'm siupapo no'we ti tilianaja'n ti kakiujnietas, lapakawo ti jla'am i'mieniti'n siupapo Israel jika kia'lis ti ijwikk'iji'n siupapo Josué jikawosjimpe.

³²Ajwel'ni 'etsaka, 'yina 'wanjliyi ka iyo ka ijwi'il siu'neje ni iyot'iyipi papok Gedeón, siupa Barak, Sansón, Jefté, siu'neje pa David, siupa Samuel, 'etsakaja 'neje siupapo ijia 'neje Sinia' jijwejlanawos t'ipi, 'yina laj ji'wetayi.

³³'Yina naka 'neje, siuti je 'yakakiuyis pa Sinia' it'imint'iyijpe ti ijia je itieyi siupapo yijits'i puwa ijia ajnatis, 'yina siupa iyone papo ijia tijnajyi, siu'neje ti yi' jikiojyi siupa Sinia' ijwijla'm, siu'neje 'yitiamk'i siupuwa jikiwitawa puwa k'iwajlas t'ipi,

³⁴'yina 'yojmat'ik'i siupuwa jwatis ti pansists'ik'i, siu'neje ti je tijliena'ni ti tiwoktaja ka tilianaja'n ti sijnatis jitio' jota ka tikienaja. 'Yina siuti je iyo pet 'ate siunapo jwajla iyots'i'ni, nak tajleje'ne pet ti jijweye poyeyis pet it'imina ti yokios'ni siunapo jitiejiejwas jika tokis 'lo'weje'n.

³⁵'Yina pot'i 'nejepe papo asejnia ti tekiajla jikiojia'm papo ji'wet jlele, siuti kia'iyo 'yalt'ijimpe kajeyepa ti yapits'i pijia'm. Ijia siupapo inine'nate k'iye siupapo ti yejesk'i'ni, 'yina je inikakiuyi siupa titiajlataja ti tilianaja'n, lapakawo ti iyo ka napits'i pijia'm ti jlajma ijiatayi jla'am ti ja 'esie siojona ji'wasankiyeja'.

³⁶Siupapo ijia inkalakijnieye tena'a, siu'neje ti tisiejek'i'yi ti tak'ajaki'n, siu'neje ti wikijnies tilie'nitieje, siu'neje ti t'otiek'i a'laja'm.

³⁷Siupapo ijia sisajas tikienaja ti tilianaja'n, siu'neje ti a'lakie' tikienaja ti tesitajamk'i ti tewitanajamk'i jikiowe'e, siu'neje ti sijnat jitiok tikienaja ti tilianaja'n. Ji'wet je ikajas jla'yi ti iyo 'wuyeye pet siupuwa 'wole po' t'ejes siu'neje puwa sontas jitio' t'ejes; jla'm ijiatayisi jlam ti p'ijliusis, ijiat ti tiliakiki ti je tilisanaje siupa tiwonaja ti je 'es, ijiat ti 'yaka'm ape'eyi siupa tiwonaja.

³⁸Ijiat ti isist'iyijpe papoka i'nio', jlajmiliet siu'nie ajnat siu'neje napo ti yiji ijiate ti je 'yu'weyi ti kia'iyo. Iniuyisk'i'ni ape'e ni ajnat laj i'nioye'e, yi'i niwa tikijnakiyis, iyo ji'wukila' siuniwa wase'l, siu'neje niwa tikijnaki ti 'yiniye ka titijikiamk'i.

³⁹'Yina wikie'eyi papoka ti ijiatt'iyijpe ti itienkiunisi pa Sinia' ti je 'yakakiuyis, 'yina 'yejne'n siunie jayoyi ti, 'wanjliyi Sinia' ijiatataja ti itime siupa ti je 'yakakiuyis, 'yina yot'iyi'ni ti kia'iyo ti Sinia' je yin jikiojyi siupa pajk'i ti ijwijla'm.

⁴⁰Lapakawo ti jlam pajk'i ta'a ti itime ni siunie ti jla'm ijiate jla'am ti 'es ti 'yiniye ka k'iujwsajap. Jak je iyoyiji siuti kia'iyo ti yiye siwa'm, sekyi'i ti jiwekie'aja pet ti yin wita'm siunie ti ijiate ti lajk'ipa ka inetia'ne.