Read Iyojwa'ja Chorote Hebreos 13 Bible Online

Hebreos 13 - Iyojwa'ja Chorote bible

Hebreos 13

¹Siuti as'nayi ijwienjliyik'i ape'e pi Sijwajieti, jlomas ti jakinieyi siunie asemijnaye ti jlena'yi napo as'lejwas.

²Ke inkiwaliyeyi'ipe siunie ti 'esiji ka 'ye'n ilia'm ni askiecha ni jajno'wa ti ijio isik'i, awo kajeyepa ti pojompe pa kia'iyoyi ti siupapo ijioyi je itiant'ieje, 'yina 'yijenjlitieje pi iyone ti paja ti injlojwajnas poli jlele papoka.

³Astaj wunitieyijpe siunapo yi' insat jiweje, askiowe wonayi 'ate ti ijiateje ti aslaye iniuyi wita'm ti jleyejyi janak insat jiwe. Astaj enayijpe 'ate siunapo ti ijia ne'wajamk'i ni siunie tiwonaja kajeyepa ti ent'a ja kiak tiwona'ase ni siunie tiwonaja.

⁴Apejlanit'i astepe'e ti awo'ate ká awoye aslakikie siunie injwa'ajieyi; ká akajyine siojona ask'iemjla siunie aske' ti jit'iuye'ni. 'Yina Sinia' jan'ye'en siunapo kiak iniwone ni jitis, siu'neje napo iliyik'i napo jijwa'yis.

⁵Askiowe ká ajowatayi siojona wikiniet'aj, 'etsaka siunie yi'ase; ká ajalasa'yi ape'e ka wujwa paka 'wena 'yina kamaja. Jlam'ne Sinia' iyo'ate, “Ja ke paja ka sikiwali'yase'm ni'ne ka ili'ase.”

⁶Jak je iyoyiji ti 'yaka ti ijiatk'i siunie ti iyo'ate: “Saka'niona nak iniuyijk'i'm, je sots'ina, kajeyepa ti lajk'ipa ka 'najane paka iwonk'i ka iwo isieye.”

⁷'Yina naka ti ja astaj enayi 'ate, siunie iniwone napoka ti 'eyasanayi siunie 'es ka wonayi niwa asosikis, siunapo ti ijwi'lase'm niwaka Sinia' jlamtis. 'Yina mayeyi naka siunie iniwont'iyisijipi, paj ka awayeyinie'e siupa ti jlaj yit'i'yijpe. 'Yina ja ke anetiajnata siunie astankiujnieye ti 'es iyo siupa iniwont'iyisipi ti je 'yakakiuyis pa Sinia'.

⁸Sijwajieti Jesús paka siupa ti pajt'ik'ipe, siu'neje ti 'nakayi, siu'neje ti jajnok'i'ni.

⁹Nit'onitiek'iye siuniwa inka'neyasajnayejes ka ne'yi pa siunie 'wenayiji ka pakaye ka intonajyi'n. Nak sitiliataja pet ka je akinieyi siuniwa jikeyis iyone napo i'nio' ape'e ni siuniwa inkas, 'yina siuniwa asosikis jawoyi jijweyeja' pet naka siunie Sinia' jikap'ijliuskiye iyo, kajeyepa ti siunapo i'nio' yame pet niwa ajwel'ni, je iniuyeje.

¹⁰Jlampet ti sa'am, 'wenayiji siu'nie yits'e, je iyo'ate ni siunie ti 'yaka ti tiliana pa k'iejliyi niwa wask'i'nelaja. Jak je iyoyiji pet siunapo pa'yijis jika anechiyasas wus ti isijme'n kiajwe siojona Sinia' ji'wuk ti pajk'i ti 'esiji pet ka intojw naka.

¹¹Siupa pa'yijis jika anechiyas wuj, ti yamataja kiajwe japak Sinia' ji'wuk t'ipi siupa 'woyis ti yikiajle pi Sinia' ape'e puwa jikeyis papo i'nio' ka netiajnat. 'Yina je tenaja jikiowe'e papo i'nio' pa ji'wetis ti kia'iyo ti tilianajataja'n siu'neje ti tiwuniejataja'n.

¹²'Yina kiak iyo'ni pet siu'nie, ti Jesús jijliak'ali ti je jlase' ti 'ya'al tojwapen'ni siupa yi'i pa isi', ti iliji papo i'nio' puwa jikeyis, it'iminayi ti kia'iyo ti isis, siupa ji'woyis ti isia'ni.

¹³Siuti sa'am 'yiniye ka kiak iyoki, ti awaki japak isi', sekyi'i ka inaja'ni ti atajlaja'm japaka ti ajoki pa Jesús. 'Yina wuj ti anilayitieje siunie ti tiwet'ianats'e tiwonat'iyijipi pet.

¹⁴Kajeyepa ti siu'nie ajnat awak'i lajk'ipa ka isiye ka si'weta ka ji'niayi into'yi ka ijnok'i'ni. 'Yina nak it'imina ti jajialasa ape'e ka iwieki jana isi' siojona ts'ijiye.

¹⁵Lapakawo ti naka ti it'imina ti ja jlomasa ti jayunitie pi Sinia' ti jayoki pet ji'niayija' pi Sijwajieti Jesús ni sonitieyi ti jayikiajlaja. ¡Jayunitieje siupuwa samtis jayonaja!

¹⁶Astaj wunitieyijpe siunie ti janoyeyeje napo as'lejwas, nikat'inieyi siunie ji'wena. 'Yina ti naka ti Sinia' inka'a ti i'winata ti kiak iyoyi, siu'neje ti jla'am ti jlekiajlayi ti 'yaka'm ape'e siunie iyo pit siuniwa tilianajan'ni.

¹⁷K'iuyeyipe siunapo tijna'yase'm pet ti i'ye'nase'm, 'yina ká ani'najnata'yi ape'e napoka ti je yajapape ti i'ye'n astepe'e. Lapakawo ti je iyo'ate ka je 'najanisi paka iwonisi ti Sinia' jan'ye'en napo i'nio' ts'iji jlaja niwa jlomas. 'Yina 'esiji ka k'iuyeyi 'nakayi ti ja inkasaje'n ti kiak jawo. Jlampet ti kiak jawo ti ja ke ak'iuyeyi, jijliak'ali ja poye pet, 'yina jijwelat'e ka poye paka i'nesieyi.

¹⁸'Esiji ka kasts'ajlan'ni, 'yina ti je k'iejliyi pa ka je 'esie ka iyoki ts'ajwejliye ka nejyi'ni ni sitienkiujnieye, alenjlipa ti ajwela ka ijiatayi ka 'esieyiji siu'nie aniwonaja.

¹⁹Wuj ti anip'elisi'niase ka kasts'ajlanayi'ni pa Sinia' 'nakayi ka je pajayi ka yi' kiu'ujwe aska kiowe'e.

²⁰'Esiji ka Sinia' siunie inkamankiye tajle ka noye'asempe pet, ka we'nase'm ni siunie 'es 'nakayi ti jawoyeyi siunie iyo ka woyi. 'Esiji ka woyi siupa iyo ka wonts'e jla'am, 'yina jawoyeyipe ji'niayi siupa Sijwajieti Jesús iyo. Sinia' siunie ti kia'iyo iniujwa'n kisie'e ti tajli pi a'no' ti yikial pijia'm pi Saka'niona Jesús, siunie ti ijiate ti sontas jiwo, ti iyoyi pet ji'niayija' ti 'yakajk'i ti jla'am ti iniwe'n siupa iyo pi jiwet'ia ti 'ya'al. Sekyi'i siupa ji'woyis ti tisa'ni paka'ne ti 'yakajanitk'i ti jlam je iyoyi siupa iyone pi ji'lij ti iliyi ti iwiets'ilati siupa iyo ti pajk'i, 'yina siuti ink'ie' ni iyoyi nak laj'ne jlaja. ¡'Esiji ka laja jlaja siunie jiwunitieye ti tena'a! Amén.

²²I'lijwas, anip'elisi'niase, 'esiji ka nilayitieyi ka kima'yi ilia'm siu'niwa yamtis ti je itioyi'i ti ajlo'wase, ti awotaja ka noye'ase'm ka woye asjweyeja'.

²³Ajwe'lase ni sikiecha Timoteo ti tiniujwana kisie'e, ti kia'iyo t'otiepe a'laja'm. 'Yina ka netiejk'i, ka ya'asiyena'a ti nak jajiojwi.

²⁴Wikie'eyi ti atejwile siojopo ti i'ye'nase'm pet, siu'neje japo ijia Sinia' jilis. Jlampet siojopo Italia jlele itijwi'lase.

²⁵'Esiji ka Sinia' siunie jikap'ijliuskiye intej'w astepe'e ti asa'am.