Read Iyojwa'ja Chorote Hebreos 2 Bible Online

Hebreos 2 - Iyojwa'ja Chorote bible

Hebreos 2

¹Tempi it'imina ti je 'esiji ka jla'm iliakiki'i jiwek siunie ti ajwela ka 'yena, siunie ti pajk'i ti ape'yak, 'nakayi ti 'wena ja ke 'yasapa'a siunie si'niayi.

²'Yina ataj kiam kiu' enayi 'ate siupa Moisés jika'neyasajnaye, ti injlojwajnas poli jlele siupapo takajwejlane pa Moisés t'ipi. 'Yina jlam pak je iyo jiwek, jak je iyoyiji siunie ti 'yakakiu siu'neje na ti je its'iuye, nak jla'am je tisiejek'i jiwek lapakawo ti 'yu'we,

³'yina, ¿tepit'e awokt'iyi pit sa'am ti po' siojona sijwajieti ti je jlase', ti Saka'niona iniane ti ijwile pijia'm? 'Yina siunapo ipi'yayis ti kia'iyo, i'winis ti ijiatk'i, sekyi'i ti ijliasatats'ejyi pet. Siuti Sinia' ikajanitieyi pet, siunie iyoyi ji'niayija', ti po' siuniwa i'winkina napo i'nio', siu'neje niwa kassesi'lietk'i'ni, siu'neje ti i'winkints'e'm siunie ti je jlase' ni jijweye iyo. Siu'neje niwa in'wajietis ti tajle jana Sinia' jikimet ti 'es, siojona Sinia' iwijna'm siupa iyo jla'am ka wejna'm. 'Yina awo'ate, ¿siuti kia'iyo tepa awokt'iyi pit? ¿Tepa jawo ka ijwieyeje siunie siwet'ia, 'yina ti je alesanajaje siujlie'e sijwajieti ti je jlase'?

⁵Sinia' je papok injlojwajnas poli jlele ka nekiajle pi jijweye kan'yena paka ajnat ink'ieye, siunie ajwela'ni.

⁶Jlam'ne siunie iyot'iyipi siupa, pa yit'i'yijpe pak i'nio' ti yi'i niwa inamtis, ti iyo'ate ti 'yakajanitk'iyi: “Sinia', ¿tent'i'ni siu'nie i'nio', siuti ijiate ti je inkiwaliyi'i? Jlam'ne kia'iyo i'nio', 'yina ¿yot'iyi'ni ti jiwoyi ajlak'aliyeyi?

⁷'Yina siukia jiwone, je itioyi'i ti jijliasat isia'm jak je iyoyiji siunapo injlojwajnas poli jlele 'yakama'aja wat ape'e. Jlam'ne pet siukia jiwone ti jle'n ape'e siunie jiwunitieyi ti jiwojwa'n anechiyasa'.

⁸Sekyi'i ti jlekiajlayi siunie ka iwo anechiyasa' k'iye wikie'eyi niwa wask'i'nelaja ti alesajna'.” Siuti kia'iyo puwak inlesajna' ti ijwi'il ti Sinia' yikiajle kan'yena wikie'eyi puwak wask'i'nelaja, 'yina lajk'i puwa ka injlane ti ti'yenkinaja. Ijiate kiakt'i pa iyoyetaja, 'yina 'nakayi je a'wenajli'ijyi siuniwa wask'i'nelaja ka wikie'eyeyi kane kiajwe ni i'nio'.

⁹Jlam pet pi Jesús a'wena ni siunie Sinia' iyone ti jwajla'a ti ijliasat isia'm, jak je iyoyiji siunapo injlojwajnas poli jlele t'ana wat ape'e. 'Yina ts'ijiye initojmat jla'm ape'e napo i'nio' ti ijioyi ni jiliaye. Ka lajk'i na jikap'ijliuskiye ti yints'e'm, nak it'imina ti 'ya'al pa Jesús. Jak je iyoyiji siuti kiak iyoyi ki inilayiti, sekyi'i Sinia' yin'ne ape'e siunie jiwunitieyi siu'neje ti iyojwa'n anechiyasa'.

¹⁰Wikie'eyi siuniwa a'wena Sinia' jla'am ti jilisajna', siu'neje ti jla'am ti tijna'yi, 'yina iyotaja'n pet k'iye ka wikie'eyeyi napo jilis i'noyi siunie yi'i ti anechiyas. It'imina ti Sinia' kiak iyone pa Sijwajieti Jesús ti iyojwa'n 'ate ni i'nio' ti yin wita'm siunie ti ijiate ti 'es, 'yina paka jla'am siupa iyo ti inilayiti, jijwajieti woyis jla'am napo i'nio'.

¹¹Siunapo Sinia' 'yotat, siu'neje pet ti jla'am pa Jesús ti 'yotat, ijwienjli siunie jiniayis. 'Yina naka it'imina ti Jesús ji'lij je jnechi'yi ti iyo'ate, “I'niayi ijwienjliyi napoka.”

¹²Siuniwa inamtis t'ipi iyo'ate: “Inia', jajwijla'm japo i'niayi ijwienjliyi siunie jiwoyi, 'yina siuniwa 'yaka'leja niwak jayuniti ka yita jikiowe'e napo ales ti janitotk'i wita'm.”

¹³Iyo'neje 'ate: “Itiej jayoma pi Inia'.” Sekyi'i iyo'neje 'ate: “A'ne ti ijwienjli akasiti'iji'n siu'napo jilis jla'm pa Inia' ti iwink'i'm.”

¹⁴Siuti kia'iyo ti si'niayi ijwienjliyik'i, 'yina Jesús kiak iniwone pet 'ate iyo awoki ti sa'am ti i'niolts'e'm. Jak je iyoyiji 'yuye'e, 'esieyiji ti 'ya'al, jak je iyo siojokia t'ajlati iyo itiete'ne isia'am ki imosik. Sekyi'i initiajnati siukia jijweye iyo, ti isiene'ni napo i'nio' ti iliajne'n.

¹⁵Jak je iyoyiji wikie'eyi siunapo 'najlati iyo jikipijnasa', kajeyepa wikie'eyi niwa jlomas ti je ijwiyisink'iye ti yi'i 'ni ajnat, 'yina 'yaka jla'm iwo ti isiwaliyisie'e.

¹⁶Ijiate ti je napoka injlojwajnas poli jlele ka iname ka noyeje siuti 'nes, 'wenajliyi sa'am, ti sa'am ti Abraham jilists'e'm.

¹⁷Siuti k'iejliyi pa jijliak'ali napo ji'niayi ijwienjli, sekyi'i kiak iniwonayi pit iyo jlamis. Sekyi'i ti 'esieyiji ti kiak iniwone 'ate iyo ni pa'yijis jika anechiyas wuj, siunie ti je tiwonaja jla'am, siu'neje ti takap'ijliuski ti iniuyeje napo i'nio' siunie Sinia' itiliaja ka woyi. Jla'yi ti initiajnat niwa jloski'la ti iyoyi jikieye ki jiliaye iyo ti 'ya'al.

¹⁸Ti jla'am ti jitiej 'wanjle'e ni jijliak'ali siu'neje ni inkajejlasaye, 'yina tepa jawo pit 'nakayi ka je 'najane paka iwone ka noyeje siunapo kia'iyo ti inkajejlasaye tena'a.