Read Iyojwa'ja Chorote Hebreos 3 Bible Online

Hebreos 3 - Iyojwa'ja Chorote bible

Hebreos 3

¹I'lijwas, asa'am ti Sinia' pajk'i ti ta'nase jla'yi ti i'notata', astaj enayi 'ate pa Jesús, ti jla'am ti Sinia' jijliujwanik siu'neje ti jla'am ti pa'yijis jika anechiyas wuj, ni siunie sitiej awomaja.

²'Yina Jesús ini'notatiji k'iye pa Sinia' siupa jikijmaye ti ijniejiet'e, iyo'ate pa Moisés ti ini'notatiji k'iye pa Sinia', ti yikiajle papo ji'wet jlele kan'yena.

³Jesús 'yu'we ka tonitie 'yina ti 'yaka'm ape'e pak Moisés siupa tiwonajat'iyipi pet ti tonitie. Iyoye 'ate siunie i'nio' 'wukiu'ul jiwo; siojona 'wuk jilisanki je janaka ka tonitie, 'wenajliyi siunie 'yotate.

⁴Siojona 'wuk ti wakal kajeyepa ti po' ni siunie ilisane. 'Yina jlam pet siuniwa wask'i'nelaja ti po' Sinia' naka pet ti ilisane.

⁵Kiak jini iyopi pak Moisés, ti jla'am ti Sinia' jikawo, wuj ti inilesaniji jitieyi'i pa Sinia' ti i'yena papoka ji'wet jlele, jikijmaye t'ipi ti 'yakajanit siupa Sinia' iyoyi ti tamti.

⁶'Yina Sijwajieti, ti jla'am ti Sinia' jlas, je tiwonajataja jla'am jiwek k'iye siunapo ji'wet jlele ni Sinia', ajwe'el ti sa'am, ka je initiajnata siunie ti je anikiwita, siu'neje na ka ini'netie, 'yaka po' siunie sinijijwiye ti yits'e.

⁷Jak je iyoyiji ka je iwoyi 'ate siojona Sinia' jikimet ti 'es ti yi'i niwa inamtis t'ipi: “Ka pe'yayeyi 'nakayi pa Sinia' siupa jawo,

⁸'yina ká anit'onitie'yi k'iye, iyojinipi papok i'nio' ti teje'yi ilia'm pa Sinia', ti jikajejlasaye yi'ne yi'i pa ajnat laj i'nioye'e.

⁹Sek senisi'i ti sejlitis kiapoka astese'l,” iyo pa Sinia', “'wanjliyi i'winatajas siukia awoyi, siukiwa cuarenta najkapis.

¹⁰Tempi it'imina ti sijwesiajampe kiapoka i'nio', sekyi'i ti awoyepe 'ate: Paja paka iwoyisi ti je ijyiwitisi siunie sitiliaja ka iwoyisi.

¹¹Nak it'iminape ti pansak'i siukia awone, kajeyepa ti sijwesie, ti awo'ate: 'Wanjliyi ja ke 'yajlinitk'iye ka 'noyisi siunie ajnat a'yi ti aninop'it.”

¹²I'lijwas, joskiyeyi ma ja ke poyena'a pa ka ileyi pa Sinia' siuti kiak jawoyeyi, askiojwa'l 'wena jawonayi ilia'm, siu'neje ti ja ke ak'iuye naka Sinia' ti je paj ka inetia'n.

¹³Alenjlipa ti je yam'nijiye siunie Sinia' jlamtis ti iyo'ate, ‘Siu'nie jloma’, 'yina jlomas ti ja akelayi napo as'lejwas, ja 'nakayeyi ti ja lajak'i pa ka inkajmajne'n siunie jike', siu'neje ka int'onit ni jlosik.

¹⁴'Esiji ka ani'netie pijia'm siunie iyo ni astankiujnieye ti 'es, jatiajlataja ki iyo ti 'nelanjie'e paj ka iwiekieyina'a 'niji jlaja, japakayeyi ti jawiekiap pa Sijwajieti.

¹⁵Jak je iyoyiji siuniwa inamtis t'ipi ti iyo'ate: “Siu'nie jloma ti jape'yayeyi ni Sinia' iyo, ká anit'onitie'yi k'iye, iyojinipi papok i'nio' ti teje ilia'm pa Sinia'.”

¹⁶¿Tent'ipi papoka ti ipi'yayis pak Sinia' siupa iyoyi, sekyi'i tejeyets'i ilia'm? 'Yina papokajampe siupapo Moisés yame ti tajlaja'm japa ajnat Egipto.

¹⁷¿Tent'i'nejepe siupapo ti Sinia' jiwak yi'ne paj ti cuaréntaja puwa najkapis? Papoka ti iyo jikeyisa', papoka 'neje ti no'we ti 'yajle'n yi'i pa ajnat ti laj i'nioye'e.

¹⁸¿Ten 'neje siupapo ti Sinia' pansak'i siupi iyone, ti ijwijla'm ti je 'yajlinitk'iye ka i'noyi siupa yi'i ti ininop'it? Siupapo ti je its'iuye puwa jlamtis.

¹⁹Ijiatjliyi a'wena'ne papok i'nio' ti je i'yakanisi ka 'noyisi paka ajnat yi'i pa Sinia', lapakawo ti 'yakakiuyis puwa jlamtis.