Read Iyojwa'ja Chorote Hebreos 6 Bible Online

Hebreos 6 - Iyojwa'ja Chorote bible

Hebreos 6

¹Ijiatjliyi, je 'esiji ka 'yasak'isia'm, paj ka ts'ajwes i'neye'ejenna'a. Je 'esiji ka je itiajlaje siunie inka'neyasajnaye siunie ti 'nelanjie'e ani'neyasanaja ape'e ni Sijwajieti. Ká apilieyiji siuniwa wask'i'nelaja pajk'i ti 'najanayi pi jiwonayi, iyoye 'ate siunie inka'neyasajnaye ti ijwi'il siunie ti k'iejli awok sosik ink'ieye, siunie ti aleki siuniwa wask'i'nelaja kassoyiji ni siliaye. Iyoye 'ate siunie ti 'nelanjie'e atankiujniejayi ni Sinia'

²siu'neje ni inka'neyasajnaye ape'e pet siunie inajiejnaye, siu'neje na ti inkio' tena ape'e napo Sinia' jilis, siu'neje napo 'yajle'n ti janok'i kisie'e, siu'neje ni ti jitis jajnotk'i'ni ni i'nio' ka kia'iwotajanie'e ka Sinia' i'yenta.

³Je 'es ka int'onitie'yi niwakaye, 'yina 'wenajliyi ti jlajma najlinie'e pet siuti Sinia' jawoyi.

⁴Kajeyepa siunapo ti pajk'i ti iyo jlosik ink'ieye, jloma 'yakaja'n k'iye, siu'neje ti ijyijlita'm siunie t'ajka iyo siunie Sinia' tajle. 'Yina yi' kiojyi siojona Sinia' jikimet ti 'es, siuniwa Sinia' jlamtis kia'iyojliyi, ijyijlita'm siunie t'ajka iyo ti 'es, siu'neje ti itiant'ieje ta'a siunie jijweye jawo janaka siojona jloma atayeje. Jlampet ti janapilisiji'ijyi siunie je 'es, 'yina je ti'niejenaja pa ka tiwonaja ka talasa ka tiwok kiu'ujwe jlosik ink'ieye. Siuti kia'iyo 'yiniye ka inekiajlisi'ni pijia'm ti its'iejwatits'i japa cruz pak Sinia' jlas, sekyi'i ti yinayis jitiejk'i wikie'eyi papo i'nio' ti iliakiyis.

⁷A'wena siunie jot, ti neki'n 'yina i'niat yajmi isia'm. Jak je iyoyiji siunapo takawijnajni ti'yekiujni'n, 'yaka Sinia' isiayi ape'e siunie 'es.

⁸Jlampet siuti niwakata jlel po' ti talk'i na ajnat niwak laj lajaye pet, kajeyepa yi kiajwe ni Sinia' jiwak, ja jlajayi ti ja tiwunieja'm.

⁹I'lijwas ti yimijna', 'wanjliyi sitiej ajotiejataja ejlo wekie'e 'yina jlam pak je woyeyi wek, lapakawo ti jiniuyets'i siunie 'nayi ti 'es. Jak je iyoyiji siuniwa isis ti jitiajlayiji siojona asjwajieti yi' askiojyi.

¹⁰Kajeyepa ti siunie Sinia' je ka je ijnajyi, ja ke inkiwaliyi'i siunie jiwoyeyi, siu'neje ni asts'amankiye ti jlena'yi. 'Yina pajk'i ti jinikajanitieyi siunie asemijnaye ti jiniuyeyeje siunapo jika kia'lis, jikiniejliyi ti kiak jiwoyeyi.

¹¹'Yina awotajan pet k'iye ka injwanjliyek'i'ni, ká aleyeyi ka niwa'asitiejyi'n siunie jiwoyeyi ti janikajanitieyi paj ka awayeyinie'e ni jlaj yi'i, 'nakayi ti ja wakajla siunie iyo ni asnejejwiye.

¹²Ká anoyeyeje siunapo i'nio' jiniliaja ti 'netaja'n, 'yina 'yena jla'am siunapo ti je tajli siunie jitienkiujnieye ti 'es ti iyoyi, siunapo ti pajk'i ti yi' kiojyi janaka Sinia' ijwilt'ijiampe, napok jla'm ijiate jla'am ka ni'yenajiap.

¹³Ti Sinia' iwijninampe pa ji'lij pa Abraham, ti ijwijla'm ti iyo'ate, “Ijiatk'i siunie awoyi ti ja ke inwo piniye siunie jayo'na ti jasiayi atepe'e ni siunie 'es, 'yina paj ka 'lojwana'a siunapo ti jantaj'l awa'm ti ja alesa'.” 'Yina siuti lajk'i pa ka int'a'n ape'e ti jla'am ka intaj tiwomaja, siu'neje kan'wenaja siupa iyoyisi, jak je iyoyiji'ni ti jlam jiwek jla'am ti yapi'li ti kiak iniwone ti ininetijnape.

¹⁵Abraham yi'i jiwekie'e ti inijijwijyink'iye paj ti jiwekie'aja t'ipi ti yi' jikiojyi siupa Sinia' ijwilt'ijiampe.

¹⁶Jlampet ti sa'am ti i'niolts'e'm ti po' pa ji'lij iliyijap pa jikiecha ti jlam ja ke inwoyi siupa ijwijla'm ti jawoyi, 'yina tanayisi ni'ne ti yitijnape pi jikiecha ti jle' t'a'n ape'e papo ijia pa jle' iyo ti anechiyas. Jak je iyoyiji siuti je isisk'i ti je inikiul ape'e siunie jota iwoyisi, 'yina pakayeyi ti tanisi ni'ne ti yitijnape jiwek siupa jle' ijio'we ti anechiyas, sekyi'i ti isisiek'i iliyeyisi ti iniewit ape'e siupa jawoyisi 'yina sek jla'a.

¹⁷Naka ti a'wena ti siunapo ja jikimita janak siojona Sinia' ijwijla'm, lapakawo ti iyo ka 'nakajanitiame ti ijiatk'i siunie iyoyi, 'yina je pajna'a ka iwats'ilati siunie iyo ka woyi ti ijwi'il. Tempi it'imina ti jlam jla'am ti yapi'li ti kiak iniwone ti isime ni jle' ti ji'lij iliyi.

¹⁸'Yina times siuniwa Sinia' iyoyi. Inia'an siunie ti ji'lij iliyisajap ti po' siojona ijwilts'e'm, sekyi'i ti tomayik'i ti jlam jla'am ti yapi'li ti kiak iniwone ti isijmajne'n ni jle', ti ijwi'il siupa jawoyi. Jak je iyoyi siuti a'wena ti ijiatk'i niwaka siu'neje na ti Sinia' je jlamtisjliyik'i jiwekie'e siunie iyo ka woyi naka'ne ni siunie ti wuj ti iniuyits'e'm, sa'am ti a'yiltanaja'ni, siu'neje ti sitiej awoma, ti ja ijiatayi ti janents'e'm siunie iyo ka inijijwiyejen k'iye.

¹⁹Siu'nie sinijijwiye, 'naka ti 'yit pijia'm niwa sosikis, 'yina je tikiwitajayi. Iyoye 'ate siojona kasejkana ti po' siojona tejeye pet ti yajapajne'n 'yina janaka ti 'yit pijia'm ti titietajatajaja'm ni i'niat. Siunie sinijijwiye enaja naka ni Jesús, jla'am ti tojmap ts'iji ji'wechaja siupa tip'onajaja'm siojopa 'najla 'wet yi' poliyi. Jla'am ti iyo si'niayija' 'nakayi, kajeyepa jla'am ti pa'yijis jika anechiyas wuj ti ja ke paja kant'eki, iyot'iyipi pak Melquisedec t'ipi.