Read Iyojwa'ja Chorote Hebreos 7 Bible Online

Hebreos 7 - Iyojwa'ja Chorote bible

Hebreos 7

¹Pak siupa Melquisedec ti ajwel'ni anechiyas wujjimpe ti tijna'yi siojopa isi' Salem, siu'neje ti Sinia' siupa ti lajk'i pa ka ijnojli jika pa'yijimpe. Siupa jle' t'ipi ti iyo'ate Melquisedec siuniwa inamtis ti iyo'ate, “Anechiyas ti tijnajyi”. Siojopa ajnat yi' ti iyo anechiyasa' jle' iyo'ate Salem siuniwa inamtis ti iyo'ate, “Inkamankiye”. Jak je iyoyi 'neje ti jle' iyo 'ate “Anechiyas ti inkamankiye tajle”. 'Yina lajk'ipa ka 'najane paka iwone siupa jinia' t'ipi, siu'neje japa jlet t'ipi, siu'neje papo jika kijilas t'ipi, ka janakaye wek siojopa jloma yit'iyijimpe, siu'neje japa jloma 'yalt'ijyipi paka. 'Yina kiak iyoyi siunie Sinia' jlas, talk'i'ni ti jla'am ti pa'yi, 'yina jajnotk'i'ni 'neje ti kiak jawoyi. Ti Abraham itimat'iyijpe ti inila'an pakayi ti siupapo ijniujlits'i anechiyasas wus je itieyi, 'yina Melquisedec yisitat'ipi k'iye ti jikio' yi'n ape'e ti iwijna'm pa 'es. 'Yina Abraham iwijnam'ne pet pa Melquisedec siojopa ti ijiuti ti iyo ji'wajieta' ti tajla'm siupuwa tajlane papok anechiy(...)

⁴Ataj kiam kiu' enayi 'ateje paka Melquisedec t'ipi ti ijiate ti i'nioyi, 'yakajlitieje pet paka siupa ti ijiate pet ti sitise Abraham, 'yina iwijna'm pa Melquisedec siojopa itijwa'm niwa sikioye ti tajlaja'm siojopa 'yakajli ti inila'an ti iyo ji'wajieta'.

⁵'Yina lapakawo ti kia'iyo siupa Moisés jika'neyasajnaye 'esiji siupapo pa'yijis t'ipi pet ti tajla'm pak Leví t'ipi ti t'ajla papo i'nio' siojopa itijwa'm niwa sikioye ti tajlaja'm siojopa i'yakanis'ni, je 'wenayeta paka intajlisia'm pakayeta Abraham.

⁶Jlampet ti jla'am pak Melquisedec ijiate ti tojwapen'ni, je tajla'm pak Leví t'ipi. 'Yina je iyojliyi ti t'ajla pa Abraham japak itijwa'm niwa sikioye tajlaja'm pet siojopa i'yakan'ni, sekyi'i ti jikio' yina ape'e ti iwijna'm pa 'es, siu'neje ti Abraham pajatak'i ti Sinia' ji'lij yiyi siupa ijwijla'm.

⁷Siunie ti jikio' yi'n ape'e ni jikiecha ti iwijna'm ni 'es ja ke inets'e paka inlaki, kajeyepa 'yaka ti naka ti ijiate ti i'nioyi ti jle' t'a'n ape'e siunie jikio' yi'n ape'e.

⁸Jlampet 'nakayi ti kas'wasajne'n ape'e 'ni ajnat, siupapo pa'yijis t'ipi ti tajla'm pet pak Leví kia'iyo jlaj po' pet. 'Yina paka Melquisedec t'ipi je kia'iyo jla'am iyo niwa inamtis ti je paj ka inetia'n.

⁹Pakayi ti Abraham iwijna'm japa itijwa'm niwa sikioye tajlaja'm siojopa i'yakan'ni ti Melquisedec t'ajla ti yisitk'iye, 'yiniye ka kia'iwo siupa Leví siu'neje papo jilis ka iwejna'm siojopa itijwa'm niwa sikioye tajlaja'm siojopa i'yakanis'ni pet, 'wanjliyi je ti'wenajata ka poye ta'a pakayi, 'yina lapakawo ti 'yiniye ka inejyi jla'am pa Abraham siupapo jantajla'm.

¹¹Papoka siupapo pa'yijis t'ipi ti tajla'm pak Leví, siupa ti tajla'm pet pa Aarón, papoka ti tajle pak inka'neyasajnaye ti it'imina yi' kiojyi papok Israel jika kia'lis. 'Yina siupa jikijmaye iyot'iyipi pak inka'neyasajnaye 'yaka ti je 'yakajle'n paka i'nioye ka kiak iwone ka ilesajne'n, it'imina ti asetiana pa kanwo 'ate pa Melquisedec, je iyoye 'ate siupapo tajla'm pa Aarón t'ipi.

¹²Jak je iyoyiji ti 'wenayeta papo pa'yijis ti isimk'iji'n, 'yina kia'iyoyeyi'ijyi pet siupa inka'neyasajnaye t'ipi ink'ieye'eje pet.

¹³'Yina Saka'niona, siunie ti ijwi'il niwa inamtis, ti tajla'm siupa Israel jika kia'le ti lajk'ipa ka pa'yija' ka intajla'm.

¹⁴Iyo ni siunie ti kasts'ajane, siunie Saka'niona ti tajla'm siupapo Judá jika kia'lis. 'Yina siupa Moisés t'ipi je ijwi'il papoka ti kia'iyo ijwila papok pa'yijis.

¹⁵'Yina 'yakaj niwaka, lapakawo ti 'nakayi po' siunie pa'yi ti iyo'ate pak Melquisedec t'ipi.

¹⁶Siunie pa'yi ti ink'ie' je tajle napo siunie iyo ni inka'neyasajnaye ka titiajlataja'm, 'yina tajle siunie jijweye iyo jana in'wasankiye ti t'o'n.

¹⁷Jak je iyoyiji siuniwa Sinia' jlamtis iyo'ate ti ijwi'il naka: “A'am ti jajok'i'ni ti ja pa'yija'm, jiwo'ate pa Melquisedec t'ipi.”

¹⁸Ijiatjliyi siukia inia'an in'lej tiliki, lapakawo ti laj jijweyeja', jla'yi ti laj lajaye.

¹⁹Kajeyepa ti i'nio' je ilisajne'n ka 'esieyi, naka Moisés jika'neyasajnaye. Sekyi'i its'iuyeja 'wet'e nak sinijijwiyeje ti je jiniliak, siu'neje ti si'niayi poye ti ajoki pa Sinia'.

²⁰'Yina kiaka'ne siukia ti Sinia' ji'lij iliyi, siunie ti jla'am je iyoyi siunie iyo. Jlampet siunapo ijia pa'yijis Sinia' lajk'ipa ka ji'lija' ka inleyijap ka kiak iwone,

²¹'yina jlampet pi Jesús je kia'iyo. Jla'am Sinia' ji'lij iliyijap siupa jawoyi, jak je iyoyi ke inwone 'ate: “I'lij aleyi ajap, 'yina ja ke pajana'a ka iwiets'ilati siu'nie jayoyi. Jajok'i'ni ti ja pa'yija'a'm.”

²²Ijiatjliyi, Jesús jlam ijiate jla'am ti 'yakajanit k'iye siukia iyo pa Sinia' ti ji'lij iliyi, 'yina 'yaka'm ape'e siupa inia'an.

²³Jlampet siupapo pa'yijis ijia t'ipi 'loj jlamis, kajeyepa ti siuti 'yalata pa sekyi'i its'iuyeja'aja pi jikiecha.

²⁴'Yina ti Jesús je kia'iyo ka jlaj poye, it'imina ti siunie jikijmaye iyo ti pa'yi lajk'ipa ka ne'yi paka ink'iuyeje.

²⁵It'imina 'neje ti kia'iyo ti laj jlaja ti 'yijene pi iyone ti ijwiejiete'n siunapo i'nio' ka iyo ka ijnoyi ni Sinia', 'yina je lajk'i ti jla'am ti iyo ji'niayija'. 'Yina ti jla'am ti 'najlati je ikalk'i, siu'neje ti pok'iye napo i'nio' ti 'yejlani'ni pa Sinia'.

²⁶'Yina pa'yi jika anechiyas wuj siunie kia'iyo, naka ti awoktajan pet k'iye. Jla'am ti 'es ti laj jikeye, 'yina lajk'ipa ka k'iejliyeyi ka je 'esie ka iwoyi. Sinia' je jnanjliyi siunie ijioyi'i ti itionitiape'n napo i'nio' ti inkeyis jiliajnis, ti 'yaka'm ape'e ni poli.

²⁷'Yina je iyo'ate siunapo pa'yijis jika anechiyasas wus ti kiakatak'i'ni ni jlomas ti iliajne'n pa yi'i pa puwa wask'i'nelaja, ti takat'ini ape'e puwa jikeyis jlamis, sekyi'i ti papokaye pet siupapo i'nio'. Siupa Jesús 'wenayi pet siupa iyo, jla'am ijwienjliyiji jiwekie'e ti kia'iyo iniwe'n ape'e puwa jikeyis papo i'nio' pajataje.

²⁸Siunie Moisés jika'neyasajnaye, siunapo pa'yijis jika anechiyasas wus ti tajla'm pet naka, napoka siunapo ti kia'iyo ti je t'o'n pet. Ti tojmi 'wechaja nak inka'neyasajnaye, sekyi'i ti Sinia' po' pi ji'lij ti iliyi ti ijiatk'i, pakayi ti isi'me pet pa jlas ti iyojwa'n pa'yi jika anechiyas wujwa', paka pi Jesús. Pakayeyi ti Jesús yina wita'm siupa iyo ti iyoyi ni jikijmaye, 'yina jajnok'i'ni ni jawo ni t'oniye ti ja 'esie.