Read Iyojwa'ja Chorote Santiago 2 Bible Online

Santiago 2 - Iyojwa'ja Chorote bible

Santiago 2

¹I'lijwas, asam ti jitienkiunieyi pa Saka'niona Jesús ti Sijwajieti ti jiwunitieyi po', 'esiji ká a'yenijits'i siunapo ti ja emina', ja wikie'eyeyi napo i'nio' ti ja emina'.

²'Yejne'n, ataj enayi wek 'ate, ni'ne ka janojwats'i wita'm pi ja aye'yi, ji'wena'yi ilia'm siunie i'nio' ti jwajla i'wi'in, jijwukijnies niwa isis ti wikinie maja ti 'najli, ji'wuye kia'iyojliyi isis. Paj ti ja'nes pet ni i'nio' ti wuj ti p'ijliusie, ji'wuye ji'yusis pet kajeyepa.

³'Yina ja ajonitie ni jwajla i'wi'in, wuj ti ja'yena, jiwonayi 'ate, “Jnayi niwak in'wetis ti isis.” Sekyi'i ti ji'yasayi pit ni siunie p'ijliusie ti jiwone 'ate, “'Nak kasitk'ijin'ni”, ni'ne ka wone 'ate, “'Yen paka a'yi 'naka ajnat'e.”

⁴¿Ten siunie jiniwonayiji? Ka instayi wat siunie jiwoyeyi ti jlemi'n ni ijwienjli, 'yina siunie jikiecha ine'wajajia'm; je 'es ka kiak aniwonayi, je jlewitayiji.

⁵I'lijwas, asam ti yimijna'ase'm, k'iuyek'imna'a siu'nie jayo: jlam pa Sinia' siu'nie iyo ti ijniejiet'e pet napoka p'ijliusis ajnat'e ka inkasaja pet. Siuniwa jikijmatis niwaka siunie jitienkiujnieye ti 'es. Janekiajlayinie'e pet ni siunie ti pajk'i ti ijwi'il, ti ijwijla'm siunapo ti yimi'n ni Sinia', naka ti ja jikimitayis siunie jikimet ti iyo anechiyasa'.

⁶¡Jlam'ne pet ti asa'am jijniejietats'i ti je jiwoye lajaye napoka p'ijliusis! Jlam'ne je 'wena 'neje napoka jwajla'a i'wi'in ti inlakiye, ti intonayi napo i'nio' anechiyasas pi k'iejlitieje pa itiajlat'ase'm, siu'neje ti ijnalajyi'n.

⁷Napoka 'neje ti iliakiyis ni Saka'niona jle' ti 'es, ti insisieyi it'imina ti jijwaye.

⁸Siuti je kalakijiena ti jiwoyeyi niwak Sinia' jlamtis ti 'yaka'm ape'e niwa ijia, ti iyo'ate, “Emi'n ni akiecha, wone 'ate iyo ti jininemi'n”, 'esiji ti kiak jiwo.

⁹'Yina jlampet ti ji'yenijits'i napo as'lejwas, ti jijwela' ka asemijnaye poye, jlemina' pi jikiecha, jikiecha pi ine'wajajia'm, jiwoyeyi ni aske'. Astes yiyeyi'iji ilia'm niwa Sinia' jlamtis.

¹⁰Siunie i'nio' itij'we niwaka Sinia' jlamtis ti iyoyi, 'yina ijwienjliye siunie inia'yi kawoyi, ja ke ijwe'el ka laja jitisa'. Jitis po', 'wanjliyi ka injwanjli. 'Yina jitis poyeyi ilia'm wikie'eyi niwa Sinia' jlamtis, ti 'yijientats'e'm ka iyoki.

¹¹Sinia' jlam ti iyo'ate, “Ká 'o'ni”, siu'neje ni iyo'ate, “Ká akalanki”. 'Wanjliyi je t'iuyeta'ni, 'yina ti jikalanki, jiliaki kiwa Sinia' jlamtis.

¹²'Esiji ka anilesanayiji, siu'neje niwa asamtis ni jiwonayi, kajeyepa ti asama ti Sinia' jan'yena ti jankajanitie siunie jiwoyeyi ti 'es, ni'ne ka je 'esie ni jiwoyeyi, niwakaye jla'am niwa jlamtis, jlam ti 'yakajli ka inlajnits'i niwa t'aka napo i'nio'.

¹³Kajeyepa ka netieje siojona jloma ti Sinia' jan'ye'en ni jitis iyo, i'nio' ni je ip'ilisi'n napo ijia kiak janwoyeyinie'e pit Sinia' ja ke imp'elisi'n. Jlampet siunie ti wuj ti takap'ijliuski, janakaye pet ti jwajla'a awo ti jant'an pijia'm.

¹⁴I'lijwas, ¿tempa jankajliji ni i'nio' ti ijwil ka ijiatayiji ka intankiuni pi Sinia', siuti je 'yaka pet pi jikijmaye ka poye? ¿Jot'e ka nakaye ka injwajiet ti po' ni jitienkiujnieye?

¹⁵Ataj kiam kiu' enayi 'ate ti akiecha pa, ni'ne ti janaka asejnia ti lajk'ipa ka ji'wuye, ni'ne ti lajk'ipa ka intojw.

¹⁶Jijliuk'i ti jiwo'ate, “'Esiji ka Saka'niona ine'yajap. 'Ots'i ni a'wu', tojw pi k'iejliyi ti jiwo ka atojw”. 'Yina ¿tempa ja 'nots'i, jla'yi paka intojw? Siuti lajk'ipa ka awejna'm 'yina ¿po' pa 'esi?

¹⁷'Yina kia'iyo ni jitienkiujnieye ni i'nio'. Ti ijwienjleje'n, jayo'ate ti lajk'ipa ka inkijmayeja' ka int'opiyiji, laj jweyeja' pet.

¹⁸Ni'ne ka poye pa ti jawo'ate, “Po' napo i'nio' ti jitienkiujnieye po', po'neje napo ijia ti po' ni jikijmaye ti 'es”. Nak jayonaja 'ate ti jasiujlieje, ¿tepi iyo pit siunie ti jitienkiujnieye po', 'yina laj jikijmayeja' kawoyi ka 'esie? 'Yejne'n, ja'winki'na'm pet siu'nie awoyi ti itienkiujnieye po', lapakawo ti 'naka isijmaye ti 'es ti tajleje.

¹⁹Ka jla'm awo wat ti jijwel pa Sinia' ti ijwienjli. Siuniwa imose'l kia'iyo 'yijene pi iyone, it'imina ti je 'yakakiuyis. 'Yina ti je ijwiyisie, kititiyeyik'iji'n.

²⁰Ajosik tajanit, intant'ieje ti siunie intankiujnieye ja ke int'opiyiji naka inkijmaye ti 'es ka woyi ni i'nio, ijiate jla'am ti laj lajaye.

²¹Ataj wunitiek'i pa sitis t'ipi Abraham siupi iyot'iyipi, ti yikial pa jlas Isaac ti iyoyi ji'wajieta pa Sinia'. It'imina ti yi'ne pa Abraham ti 'es, kajeyepa ti i'wi'in.

²²Ji'wen ki iyot'iyipi pa Abraham ti ijwienik'i siupi iyoyi 'yakajanit ti ijiate ti 'yakajli, jla'yi ti ya'm ape'e.

²³Sekyi'i ti yiye kisie'e pi iyot'iyipi pa Sinia' ti yi'i ni ji'wet ti iyo'ate, “Abraham je 'yakakiu pa Sinia', it'imina ti Sinia' jla'am yi'ne ti naka ti ya'm ape'e ti 'es”. Jla'yi ti kiak tiwonaja 'niji 'ate Sinia' t'ajajnajwa.

²⁴Ijiatjliyi, ji'wena ti je nakata ka jitienkiujnieye poye ni i'nio' ka Sinia' i'yene ka nak int'emina ka na'm ape'e ti 'es, 'yina kia'iyoyi Sinia' i'yene 'neje pet ni jikijmaye ti po' ti je niliak, 'yina kia'iyo ya'm ape'e.

²⁵Siojopa Rahab t'ipi i'nioki ti ijia jwa'yis jiwoki. Kia'iyo Sinia' pak i'yene siupi iyoyi ti ijiajne'n ji'wet'e siupapo Josué jikawost'ipi. Jak je iyoyi ti iyoyi ti iyoyeyi kanek'ni, i'winkinayi siupi 'nayi ti 'wena iniujwap'e japa isi'.

²⁶Iyoye pet 'ate ni t'ajwes ni i'nio' ti jisiak'al tajli, 'ya'al kajeyepa, 'yina kia'iyo 'ya'al ni jitienkiujnieye ni i'nio' ti je 'yupijieteje ni jikijmaye ti 'es kawoyi.