Read Iyojwa'ja Chorote Santiago 4 Bible Online

Santiago 4 - Iyojwa'ja Chorote bible

Santiago 4

¹¿Tepa taj'le siunie aswak ti je paj ka leyeyi ti jitieyets'i wita'm? Lajk'ipa ka intajle ti niwaka jla'am siuniwa astankiujnieyejes ti je isis, ti jlalasajyink'iye ka woyeyi. Niwaka'ne ni siuniwa ti yi' astowiji ti jinilanayiji'n.

²Jlalasajyink'iye ka'wena' siunie inteliajayi, 'yina je ji'yakana'. Jikalankiyejyi'n, 'wena iyo ka woyejliyi pa ka'wena' pet niwa isis ti yiyi ni askiecha niwa i'wi'in. 'Yina siuti je siakana paka kia'iwo ka 'wena, sekyi'i ti nak tajlayiji'ijyi ti jitieyets'i wita'm. Je paj ka'wena' siunie jiwoyejyink'iye ka'wena', kajeyepa ti je t'iejlayi ni Sinia'.

³Siuti jit'iejlayi, je kajlajyi siunie jit'iejlayi, kajeyepa ti iwit'iane ni asts'ajlaye ti je 'es, kajeyepa ti 'yijene ti jiwoyeyi kawo aslakikie siunie jit'iejlaye.

⁴¡Ijiate wat ti asa'am ti je insisiek'iye ni Sinia'! ¿Jet'i 'najanayi ti siunie itiliaja niwak wask'i'nelaja yi'i 'ni ajnat teje'yi ilia'm ni Sinia'? Siuti po' ni iyo ka t'ajajnajwaye 'ni ajnat nak iyo pet ka inta'yi ilia'm pi Sinia'.

⁵Jak p'an je iyoyiji niwa Sinia' jlamtis ti kia'iyo: “Siunie sosik ti Sinia' yin siwa'm, nak wuj ti je iwi'in, 'yina ti 'namaja”.

⁶Ijiate siunie Sinia' iwints'e'm ti kasp'elisijne'n 'yaka'm ape'e naka. Iyo jlam niwa jlamtis ti iyo'ate, “Sinia' teje'yi ilia'm siunapo i'nio' initoniti'n, jlampet siunapo ti je initoniti'n napok wuj ti ip'ilisi'n pet”.

⁷Nip'elisina kiajwe ni Sinia'. Tayitieyi ni imosik, ja jotie.

⁸Jlasayi ni Sinia'; kiak jawo ja ke intonitie siuti kiak janiwonayi. ¡Leyets'i ni jiniwonayi asa'am ti inkeyis jiliajna'ase'm! ¡'Nalkita ni asosik ti 'es, asam ti jiwoyeyi ka emina' ni Sinia' jlam'ne ni jiwoyeyi ti inteliajayi ka woyeyi niwa wask'i'nelaja yi'i 'ni ajnat!

⁹¡Nikajanitieyi siunie iyo ni asp'elisieyi, ti asjlak'ali po', apajyi'n! ¡Leyeyi ti jit'iskiyets'iji'n, apajyi'n! ¡Leyeyi ti jinikanitiejyi'n, kajanit ni asjlak'ali!

¹⁰Nijlasata'yi isia'm jitieyi'i ni Sinia', ja jlama'aja ti jajlasata pijia'm.

¹¹I'lijwas, ká amtiye napo as'lejwas. Siuti po' ni yamti ni jikiecha ti ijwil ti je 'es, ket'ijwel ka je niwakaye niwa Sinia' jlamtis ti yamti ti ijwil ka je inses. Siuti jijwel je isis niwa Sinia' jlamtis, jlam'ne ka ama ka woyi siunie iyo kawoyi, jinitojmata'aja a'am ti jijwel ka'ye'en, ka ajweye poye ape'e niwa Sinia' jlamtis.

¹²'Yejne'n, ijwienjli jla'am ni Sinia', nak tajle siuniwa inamtis yiji ni ji'wet, jla'yi ti jla'am ti jan'ye'en ni i'nio' ni jitis iyo. Jlam ti 'yijene pi iyone paka nijwajiet, jla'yi ti 'yijene pi iyone ka inetiajnat pa. Siupet ti a'm, ¿tent'i a'm ti kiak jiniwone ti jiliaki ni akiecha, ti jlamti?

¹³'Nakayi k'iuyeyi'ne siu'nie, asa'am ti jiwoye 'ate, “'Nak janaja, ni'ne ka jlomata jane'yi japa ajnat jajioki. Najkap janjwanjli ti sek jawieki ti ja'yakawejnana, paj ka je jlasiyena'a japa ka 'yakajlaja wikiniet'aj”.

¹⁴¡Jlam'ne tiwet'ianaja ka 'najane paka wone, ka i'wanjle'e ni'ne ka jeye siojona jloma atayeje! Kajeyepa ti asa'am jiwoye'ate ni siniaka' ti poyeta, sekyi'i je paja ti netianaja.

¹⁵Jlam'ne as'lej jota wonayi 'ate, “Ka Saka'niona iwotajanie'e, ja kas'wasanajanna'a. Sek jane'yi ka iyokie yinie'e pi jayoki, siu'neje jana jloma ti jana'am”.

¹⁶'Wenajliyi siunie jiwoyeyi ti jinitonitieyi siunie jawoyeyi; wuj ti je 'es naka.

¹⁷Siunie ti 'yijenataja ti iyoyi ni siunie 'es, 'yina je iyo ka woyi, ket'ijwel ka je jikeye ti kia'iyo, iyoyi ni jike'.