Read Iyojwa'ja Chorote Santiago 5 Bible Online

Santiago 5 - Iyojwa'ja Chorote bible

Santiago 5

¹¡Asa'am ti jwajla 'wena', nisiama ka ajwiyets'iji'n; apajyi'n 'yina ti jane'yi astepe'e ni aswet'iaye!

²Siuniwa askijmatis ti ji'wena' insotits'i, siuniwa as'wuye jiwos itiujw.

³Siuniwa aska wikinie maja ti 'najli, siu'neje niwa aska wikijniest'ejes, ijliamk'i pijia'm. Ijiatjliyi siunie jawo ti janjlamk'i pijia'm nak jant'emina ti jankaja'yi astepe'e ti astes po', jawoyena'a 'ate ni jwat ti jantejwak'i'ni. Siu'nie jloma jlajmi wonayeyi'ni 'ate ti jlotie wita'm niwa askijmatis, jlam'ne yiyi janak jloma ti yi' jlaja.

⁴Siunapo askawos t'ipi ti je tisk'i ti ilie'ne pi asak, naka'ne ni siunie ti iyunitisi astepe'e ti injwelis ti astes poye. 'Yina Saka'niona ti lajk'ipa ka ijnojli ipi'yayi ki iyo ti tank'i wita'm napoka inkijmaye wos.

⁵Inkasayiji'n ti jleye ape'e 'ni ajnat, jla'yi ti jiwoye asamayi. Jiwoye'yi 'ate niwa ti k'iejlitie puwa ti yatis kajeyepa ti 'es ti ti'yekiujni'n. Jiwoye 'ate niwa wakiajas ti yiyi jana jloma ti ja tilianaja'm.

⁶Jlena'yi pi jitis jijwela ka iwo, sekyi'i jilianajyi'n kiapoka ti isis jitieyi'i pi Sinia', ka kiak inwo ka intayit'iase.

⁷Siupet ti asa'am, i'lijwas, ká awoye asjlak'aliye. Kamaja paj ka awayeyinie'e siojona jloma Saka'niona ja'nesi. Niwonayi 'ate siunie i'nio' ti takawijna'n. Yi'i jiwek ti its'iujwap ka wakajla pa jlak ka inkima siupuwa jla' ti isis, jlamk'e'm ti yiyi siunie pejla ti inia'an, sekyi'i ti nakaye'eje pet ni tomik'i.

⁸'Yina kiak jawoyeyi ti asa'am, ká awoye asjlak'aliye. Nit'onitieyi pijia'm niwa Sinia' jlamtis ti jiwoyeyi, 'yina ti je tojwa'a jana jloma jana ja'nesi pi Saka'niona.

⁹I'lijwas, ká aninamtiye, 'nakayi ti astes ja ke poyena'a. Sinia', ti jlam ti jan'ye'en napo i'nio' pi jitis iyo, je tojwa kisie'e.

¹⁰I'lijwas, ja ke inkiwaliyeyi'i siupapo injwejlanawos t'ipi iyoyi jlamtikie' pa Saka'niona. Naka jla'm ijiatayi ka'yena ka kiak aniwonayi pi iyot'iyipi, ti wuj ti inilayitisi jla'yi ti iniwont'iyisipi ti 'yakama.

¹¹Siunapo i'nio' ti to'm ilia'm ni siunie iyo ti inilayiti, napok ti a'wenajata, awokie 'ate wujwat ti 'es. Jla'yi ti 'najanayi siupi iyot'iyipi pa Job ti kia'iyo ijiate ti jla'am ti 'yakajli ti wuj ti inilayiti siupi iyo pi yiyi, kajeyepa ti je ini'manit. Jla'yi ti 'najanayi siupi iyo pit pa Saka'niona, ti jlam wuj ti 'es ti iniuyeje ts'iji jlaje ti its'iuye 'wet'e siupi jiwet'ia iyo. Tepa jawo ka kiak je iwo ti jlam kia'iyo pi Saka'niona ti je paj ka je imp'elisijne'n napo i'nio'.

¹²Nak ijiateje ti je 'es, i'lijwas, ti jletinajiape ni poli pi k'iejliyi pi jiwoyeyi, 'wena iyo ti 'naka ajnat, siu'neje niwa k'iejliyi. Siuti jiwoye 'ate “Ji'yu”, jlam ka awoyeyi; siu'neje ti jiwoye “Je'e”, ká aleyeyiji siunie jiwoyeyi. Ja'nakayeyijna'a ti Sinia' ja ke iwoyeyi astesa' naka.

¹³¿Tepi jiwoyeyi, ma po' pa ti jijliak'ali po'? 'Esiji ka iwo t'ajlayeja'. ¿Ma po' pa ti inkaj'ni? 'Esiji ka inenits'i niwa inka'laja, ti jawunit ni Sinia'.

¹⁴¿Ma po' pa je 'es ti asa'am? 'Esiji ka t'ajle siunapo kijilas Sinia' jilis ka int'aj'l ape'e, ka impe' 'nelink'i, ti janetijnape ni jle' ni Saka'niona.

¹⁵Siuti jitienkiujnieye po' napo t'aj'l ape'e ni jikiecha, ijiate ja 'esie ni i'nio'. Sinia' janejien pijia'm. Siuti iyo jikeye, Sinia' jlam ti janetiajnat k'iye.

¹⁶Ijiate, 'esiji ka wikie'eyi janijwela' siuti po' ni je 'es. Mayeyi ni'najlanapi. Siuti kiak janiwonayi, ja ajwayejyi ni aswet'ia iyo. 'Yina siunie 'es ti inipejlanit'i ape'e ni t'ajlaye, jijweye po' pet ni t'ajlaye.

¹⁷Siupa injwejlanik jiwo Elías kia'iyo i'nio' iyo'ate awoki. 'Yina ti inipejlanit'i ape'e ti iyo t'ajlayeja' ka laja pejlaye. Ijiatjliyi najkapis najape ijwienjli 'neje japa yisitaja'm ti laj pejlaye.

¹⁸Ti t'ajlat'iyipi'iji pa Sinia' ka nekiajle'e ka intomet, ijiate pejla poyet'ijyi puwak jlomas, sekyi'i ti jiwomik po' papo i'nio' ape'e 'ni ajnat.

¹⁹I'lijwas, siuti japoye ni ijlie'en ki iyo ni iniu'we niwa Sinia' jlamtis,

²⁰'esiji ka 'najanayi siunie ti po' ni iniuyeje ni jikiecha ka ileyi ni siunie je 'es ti iyoyi, 'yina jlam ti ijwiejiet siunie jiliaye ti ijiotaja. It'imina ti je piniyeta siuniwa jikeyis ti iyoyi, lapakawo ti je tiwoki jitisa', kajeyepa ti tip'elisina.