Read Iyojwa'ja Chorote 2 Pedro 2 Bible Online

2 Pedro 2 - Iyojwa'ja Chorote bible

2 Pedro 2

¹Ti pajk'i kiak jini iyopi pojompe'eje papo yiji papo Israel jika kia'lis, ti kia'iyo je ijiate ka injwejlanawosa'. 'Yina kiak jawoyi, japoye napo napoka inka'neyasajnawos ti ja ke ijiatayi paka injwelis, ti jane aska kiowe'e. Janama'ase ni siunie jika'neyasajnaye, 'yina sek ja'not'i siuniwa ti wuj ti je isis, ti jankajyina. Janleyeyisijna'a 'nijiye ki iyo ni Saka'niona ti naka ti ijiate ti ijwiejiete'n. Ja jlamisie jla'am, ti janinetitis ni siunie ja tiwonaja ti ja tisiejek'i.

²Ja ke piniye siunapo janekk'i siunie iyo ni jloski'layis, jant'eminayijna'a ni siunie 'nayi ti ijiatk'i ti japoye napo janlakiyis, ti jawo'ate, “Ijiate wat ti je 'es.”

³'Yina ti jwesiejayisink'iye ka 'wena jana wikiniet'aj, napoka i'nio' jawo jlamayisi siuniwa askijmatis ti ji'wena ti jajna'lase, kajeyepa ti ja ke jwajla'aja siunie jawoyi ni jika'neyasajnaye. 'Yina ke injlak'alak'i wita'm, kajeyepa ti ja jlaj poye siunie iniwonisi, 'yina pajk'i ta'a ti wakal siunie inijijwijyink'iye, naka ti Sinia' jan'ye'en siunie jitis iyo. 'Yina ja lajak'i pa ka iniwonisi, ja ke injwayisi siunie jiliaye.

⁴Siupapo injlojwajnas poli jlele ti kia'iyo siupi je 'es, Sinia' je najwi'yite. Itieteje siupi imosik ji'wet pet ti wikijnies ilie'niti yi'i pa ajnatiok, ti itiejiete siojopa jloma ka Sinia' i'yenta napo i'nio' ni jitis iyo.

⁵Ka kia'iwo pa Sinia' ka imp'elisi'n siupapo i'nio' t'ipi inian sik'ioye, 'yina ijliuyi pi pejlatiok ti itijwk'i'ni papoka i'nio' t'ipi ti ijiate ti je isis. 'Yina ijwienjli jla'am pa Noé ti ijwiejiet, ti jla'am ti iyoyi jlamtikie' siunie 'esk'i, siu'neje papo ijwien sikio' itij'we times tom'niji ji'wet jlele.

⁶Kia'iyo pa Sinia' je ip'ilisi'n papok i'nio' t'ipi yi'i japa isi'i Sodoma, siu'neje japa Gomorra, 'wenajliyi ti initiajnat papo i'nio' jwat isiene japa isi'i. 'Yina jwat itiuwits'i puwa yiji japa isi'i, paj ti jilioye 'nejie'e wek paka 'yaka, 'yaka 'yojwits'i. Lapakawo ti 'yaka ta'a k'iye siunapo i'nio' tomi pijia'm, jla'yi ti ti'wenkinaja napo ti iyo ni je 'es. Je napokata, siu'neje napo yiji pet siu'nie jloma awaki ka 'nakaja ta'a k'iye siunie jawo ni jlaj jawoyi.

⁷'Yina kia'iyojliyi, Sinia' ijwiejiete siupa jiwet'ia iyo pa Lot jlam ti 'es, jla'yi ti iyo'ni jijliak'aliye papok i'nio' ti iyoyi siupuwa jikeyis ti ijiate ti je isis.

⁸Pak i'nio' t'ipi ti 'es jiwek jla'am ti yiji papoka, jlomas ti i'wi'in jla'yi ti ipi'ya siupuwa iyo papoka, 'yina jitienkiujnieye iliane.

⁹Ijiatjliyi, 'yina a'wena ti Saka'niona ijwiejiete napo jilis siuniwa wask'i'nelaja ijioyi, siuniwa inkajejlasayejes. Jlampet napoka ti je isis, iwiakajlanit k'iye siunie jawone ka netieje janak jloma ti jan'ye'en ni jitis iyo ni i'nio'.

¹⁰Jlajma ijiatayi siunapo iyoyi siuniwa wuj ti je isis ti tajle ni i'nio' jitienkiujnieye, ti iyoyi ni siunie ti ijiate ti ti'niachiki, jla'yi ti je its'iuye pi Saka'niona ti jla'am anechiyas, iliaki kiwa jlamtis, ti Sinia' ja wujwa ti jansa'ak'i. Siunapo ti netia'n ni jlosik ti 'es, siunapo ti initoniti'n, je jnots'ina siupuwa yiji ni poli ti jijweye po'.

¹¹Siunapo injlojwajnas poli jlele, 'yakajlitieje pet ti kia'iyo jijweye poyeta 'yakamata ape'e siunapo ajwel'ni ti je ijiat ka inka'neyasajnawosa', ka kia'iwo ka injweyits'i ape'e ka inlakiyis niwaka. Ka kia'iwo ka inkasiti pijia'm ka injwe'el jitieyi'i pi Sinia'.

¹²Jlamtis jiniliaja ti iliaki siuniwa ti ijiate ti je 'yijeneje paka iwone. Lapakawo ti ijiate ti netia'n pi jlosik, iyoye'ate niwa pini' yiji ni 'la'an, ti laj jlosikie'. 'Yina kiak jawoyiyi napoka siojona 'najlati teje'yi, jla'yi ti inijijwijyi'n k'iye ts'ijiye ti jano'we. Kiak jawoyiyi iyo niwaka, ti tikiowajlajank'iye ti ja tiliana.

¹³'Yina siunie iyo ti inilayiti napo ijia ti jlamis ti iyo jijliak'aliye, niwaka'ne ti janapili ape'e siunie jawo ti janilayiti pi jijliak'aliye. 'Wanjliyi ka jlomayeyi ti iyo siunie, ti ijwilis ka 'esie. I'najwejlanatats'i wita'm asa'am ti jikijwanayi, taka'ajwejlasajne'n jla'yi ti je mamijia'm ti ijioyisi jana aslakijnieye. Inkasak'i wita'm ti insakana ti jiwoyeyi siunie iyoyisi, 'yina ti jikamajiam'ni ni je 'es ti iyoyisi.

¹⁴Siuti jitiej ijyiwitk'i japa asejnia, je 'es wat ka inkiwalisi'i ti imiewojne'n. Je 'yome ti iyoyi ni je 'es. Ik'emijiet siunapo ti k'iejli ijiatak'i siunie ti jitienkiujnieye po', itiojna'm siunie iyo ni jike' ti wuj ti je 'es. 'Yina ti ikayanayisi ti iyoyisi siunie iyo pi jikijmaye ti i'nio' itiliaja puwa jikijmatis pi jikiecha. ¡'Wanjliyi je tijwajyi ni siunie ja jiliayeja'!

¹⁵Ikajyi'n, kajeyepa ti iliyi ki iyo ni 'es, 'nayi ti tijnajyi. Yame siupa iyot'iyipi pa Beor jlas, injwejlanik jiwo Balaam, ti ijiate ti itiliaja japa wikiniet'aj ti tajleje siunie je 'es.

¹⁶'Yina tiwok jlosikie' ka lek'i siupi jike' iyone, pakayi ti siupa malekiatiok ti tamti, ti je ti'wena paka malekiatiok ka kia'iwo ka intamti.

¹⁷Siunapo inka'neyasajnawos, niwak 'yiniye niwa tokiyis ti yimata'ak'i, siu'neje niwa polis ti jlajwu itiete'ni 'niji pi ijiojwi pi jlajwu. 'Yina Sinia' pajk'i ti iwiakajlanit k'iye siunie ja ji'weta, naka ni ajnatiok ti ja laja jlaja.

¹⁸Wuj ti initoniti'n jlam jiwek ti je pini' puwa jlamtis, 'yina ti lajk'ipa ka 'esie ka intajle. Wuj ti iliaki napo ijia ti ik'emijietk'i, ti itiojna'm ni siunie je 'es, iyo pit ni jikijmaye ni ts'isie'n siunapo ti k'iejli iyota jlosikis ink'iejyisa', ti i'yiltantak'iye siuniwa iyo pit ni jikijmaye.

¹⁹Ijwijla'm napo ijia ti iyo'ate, “Mawat jikio' je ilie'nase'm ni je 'es je jwaye, 'yina sa'm ijiate wek ti kasts'ajane pi awonaja ti ajwajieta pa ti kiak iyoyi.” ¡Ijiate ti jla'm iyoyiyi siunie ijwil ka woyisi, jlam'ne jla'am ti inijwelis ti je t'ekiyisiyi siunie iyoyi ti wuj ti je 'es, ijiate jla'am ti inkipijna', je tijwayisi! Kajeyepa ti siunie inke' ti 'yakajli ni i'nio', 'nakaye'eje pet ti 'yiniye ti ilie'nit.

²⁰Siunie i'nio' ti itiant'ieje ni Saka'niona ti Sijwajieti Jesús, naka pet ti tijwajyi siuniwa iyo pit 'ni ajnat ti ijiateje ti je 'es. Jlam pet ti ininene 'ate ti yapiliyi naka 'yina 'yakapajli'ni, sekyi'i siunie jike' ti ijiate ti je 'es. 'Yaka'm ape'e lapakawo ti je to'm ilia'm, it'iminayi ti 'yakaja ape'e siunie iyo ti 'nelanjie'e ni jiwet'ia iyo.

²¹Jlamt'i ijiatt'itiejepe ka je intant'iejesi siunie Sinia' ji'niayi ti tijnajyi nak 'estiejesi, 'yina je 'esiji ti itiant'iejesi nak 'nayi iliyisi niwak Sinia' jlamtis ti ijiate ti isis ti tekiajlaja, sekyi'i ni jiwet'ia iyo.

²²Sekyi'i ti 'yakajak'i ti yiyi siunie iyot'iyipi niwa inamtis ti iyo'ate, “Siunie alena itiujwk'iji ni jikojiet. Siojona ijnisiet'io yapilieja'me ni isat ti itiwojni'ni, jlam'ne itime ti inie i'niati.”