Read Iyojwa'ja Chorote 2 Pedro 3 Bible Online

2 Pedro 3 - Iyojwa'ja Chorote bible

2 Pedro 3

¹I'lijwas ti yimijna', 'nak timesieyiji ti ip'isinik atajiet'ase'ni. Siu'nie ip'isinik, siu'neje ki anajnat ti ajlo'ase, je k'iejliyi pi jikiechaye ka iyo'nase naka ti awokta pet asosikie' ka ijiatayi ti jajnajyi ni astankiujnieye.

²Ja 'nakayeyijna'a ti ja ke inkiwaliyeyi'i siuniwa inamtis ijwil t'ipi papo injwejlanawos t'ipi Sinia' jikawos ti isis, siu'neje niwa jlamtis pi Saka'niona ti Sijwajieti ti ijwil pet papo jijliujwajnas, ti kasts'eyasane.

³Najnata ka ataj enayi 'ate siu'nie: siuniwa jlomas jane jlaja, jana'am siunapo i'nio' ti jankalakijie'n ti janamti napo ijia, ti jawoyisi siunie jitienkiujnieye jlomas ti je isis,

⁴ka iwoyena'a 'ate ti jankalakijiejne'n, “Jlam'ne tijwela janapimet pi Sijwajieti, ¿yot'iyi'ni ti je 'nes? Nojwak'i'ni jiwek kiapo atajlaja'm ti mawat je 'nes, kiajata iyojliyi ki iyo ti 'nelanjie'e poye 'ni ajnat.”

⁵'Yina ka wo wat ka jitiej nenisi 'ate ti 'nelanjie'e siunie poli po' ta'a, 'yina Sinia' jlam ti ji'lij ka kiak iwo ni siunie ajnat ka nak intajle ni i'niat, 'yina ti kiak iyoyi, it'imina ti po' ni ajnat.

⁶Jla'yi ti je 'wena paka inetiajnat papo i'nio' t'ipi yi' ape'e 'ni ajnat, pakayi ti Sinia' jla'am ti tajle ka je inleyi ti tonamet.

⁷Siunie poli, siu'neje 'ni ajnat, ti je tetitiejli'ijyi ka tinitiajnataja'n. 'Yina ti jla'am pi Sinia' ti ji'lij ka kiak iwo ti itiejietape, ka 'yenta napo i'nio' ni jitis iyo ti jankiene ni jwat napoka siunapo ti 'yakakiu pi Sinia'.

⁸Naka 'neje, napo i'lijwas ti yimijna', ka je pajana'a ka inkiwaliyeyi'i pa Saka'niona ti ijwienjli ni jloma iyo'ate ti mil puwa najkapis, 'yina jlampet ti mil puwa najkapis iyo'ate ti jloma ijwienjli.

⁹Ká ajwela ka jla'm iwo pi Saka'niona siupi iyo ti ijwi'il, siunie jitienkiujnieye iyone pa yi'i papo i'nio'. 'Wenajliyi ti its'iu'wasap ka k'iejliyeyi wat paka awoyeyi, 'yina ti je iyojonk'iye ka netia'n paka jane'yi pa, 'wenajlitieje ka wikie'eyeyi ka napilisi pa Sinia'.

¹⁰Siunie jawo pi Saka'niona ti janapimet jawo'ate ni i'nio' kajlajnata ti yisi'liet napo i'nio'. Siuti janetiajne'n ni poli, ja ke jlasiye ni jla'lap janwo, janakayena'a pet ni jwat ti jantejwk'i'ni wikie'eyi siuniwa yiji ni poli, jwat jantojwits'i. Sekjane'yi 'ni ajnat, siu'neje niwa yiji, Sinia' ja ke injla'an ti jan'ye'en pet.

¹¹'Yina siuti kiak jawo ti ja wikie'eyeyi ti janetiajne'n, ¿ten siupi 'es ti janiwonayi? Sinia' iyotajank'iye ka asa'm ijiatayi ka insisie jitieyi'i, ka 'wena je 'asajiap'e ni ji'niayi.

¹²Nejejwijiejyi'n k'iye janak Sinia' jika jloma, ti janemit etitiejyi'n pet k'iye janak jloma. Janak siojona jloma, siuniwa wask'i'nelaja yiji ni poli jwat jantejwits'i, paj kanwakiyejamk'ina'a.

¹³'Yina jlam pet ti sa'am, nak anejejwiyejen k'iye ni poli ni ink'ie', siu'neje ni ajnat ink'ie', ti Sinia' pajk'i ti ijwi'il, ji'wet wikie'eyi siunie tijnajyi.

¹⁴Ijiatjliyi, napo i'lijwas, siuti niwaka ti jinijijwiyejyin k'iye, jwajla'a paka woyeyi ni'netie, 'nakayeyijna'a ti jan'wena ti ijiate ti jikamaja ti jlam ti it'imina ti kia'iyoyi, ka lajak'ina'a paka intajlat'a'm ka je 'esie, 'yina ti insisie.

¹⁵'Esiji ka ataj 'enayi 'ate siunie iyo ni Saka'niona ti inilayiti ti its'iujwsajap ka k'iejliyeyi paka iyoki ka sosik itiejenitie, kajeyepa ti iyota ka ijwieye. 'Yina sikiecha Pablo ti kasts'amaja kia'iyo niwaka pajk'i ti ijwilts'e'm, tajle siojona 'najankijnieye ti Sinia' iwijna'm.

¹⁶Wikie'eyi siukiwa jip'esijna' ijwienik'i niwaka ti ijwi'il, ijiatataja wek ti po' siuniwa jlamtis ti wuj ti istieyijits'i, k'iye napo i'nio' ti je 'yijejne'n, siu'neje napo k'iejli iyota jlosik ink'ieye. 'Yina iwiets'ilatisi, iyone'ate iyone niwak ijia Sinia' jlamtis yi'i ni ji'wet. Ti nakaye'eje ti it'imina ti ijioyi jana siojona 'najlati ti tisiejek'i'yi.

¹⁷Jak je iyo, napo i'lijwas ti yimijna'yase'm, asa'am ti 'najanayi ta'a niwaka, nilesanayiji 'nakayijna'a siunapo i'nio' je isis ja ke ink'emijieta, jla'yi ti ja ke akiniek'isia'm ti iniuyets'i ni Saka'niona 'niayi.

¹⁸Ja 'wenajliyi ti asa'am ja ijiatayi ti ja intant'iejayi ni Saka'niona Jesús ti Sijwajieti, siunie jikap'ijliuskiye janoye'ase'm 'nakayi ti jakinieyi siunie 'es ti jawoyeyi. ¡'Esiji ka jlam kiajatajak'i siunie ti tena'a ti ijnonitieyi jajnok'i'ni! Amén.