Read Iyojwa'ja Chorote 1 Juan 2 Bible Online

1 Juan 2 - Iyojwa'ja Chorote bible

1 Juan 2

¹I'lijwas, ajlo'wase 'niwaka, ki iyo niwa yamtis ti awotaja ka lajak'ipa ka inwo ni jike'. Siuti japoye ni i'nio' ni janwo ni jike', po'o ni i'nio' ni janoyijts'e'm; Sijwajieti Jesús naka ti jantamti sitipe'e, jla'am ti yi' jitieyi'i ni Sinia' jla'yi ti tijnajyi.

²Jla'am ti iniwe'n sitipe'e, ti 'ya'al, 'nakayi ti Sinia' janetiajnat niwa sakeyis, sekyi'i jiwak nojwi'ni. Je samkata, wikie'eyi 'neje napo yi' ape'e 'ni ajnat.

³Siuti jayoki niwa Sinia' iyo kayoki, sekyi'i je kast'ayiji'n pet ti kastant'ieje ti jla'am pa Sinia'.

⁴Siuti po'o ni i'nio' iyo'ate, “Sitiant'ieje pi Sinia'”, jlam'ne je iyoyi niwa jlamtis, naka ni i'nio' wuj ti iyo sintiye', 'yina siunie ti ijiatk'i je yiji.

⁵Jlam'ne pet siunie ti iyoyi niwa jlamtis, 'yakajanit siupi iniwone ti yimi'n pi Sinia'. Siuti kiak aniwonaja ki iyo niwa inamtis, it'imina ti kasts'ajane ti kasjwanjliyik'i ti jla'am.

⁶Siunie i'nio' ijwi'il ti ijwienjliyik'i pi Sinia', ka kiak iniwonayinie'e, iniwont'iyijipi pi Sijwajieti Jesús.

⁷I'lijwas, siu'niwa yamtis ti ajlo'wase je ajwe'el ka ink'iejyisa'. Siuti 'nelanjie'e jipe'yaye 'niwaka.

⁸'Yina 'wanjliyi'ne ka kia'iwo ti ajwe'el pajk'i, siuniwa yamtis ti atate'ase siunie Sinia' iyo ka tiwoki ink'ie', jak je iyoyiji siuti asa'am jla'yi pa Sijwajieti Jesús jikajanitie ti ijiatk'i. A'wena siunie ajnatiok ti janojwi, yamjliyi'iji pet siunie 'esi' ti its'iuye 'wet'e ti 'yakajanit'i ape'e 'ni ajnat.

⁹Po'o ni i'nio' ijwi'il ka nejyi na jla'al janak 'esi', jlam'ne ki iyo ti ne'waja'm ni jikiecha. Nak 'yaka ti ti'wena ti je tajli nak ajnatiok.

¹⁰Jlam pet siunie i'nio' ti 'namaja ni jikiecha, naka ti yiji ni jla'al janak 'esi, lajk'ipa ka k'iejliyeyi pa ka inkaj'la ka int'emina ka nejyi pi jikeye.

¹¹I'nio' ni ne'waja'm ni jikiecha, nak je tajli ni ajnatiok, jlam yikiajlaja'ni. Je 'yijenayi pi jantajyi, 'yaka ajnatiok iyojwa'n talokie'.

¹²Ilis, ajlo'wase 'ni i'lij lapakawo ti Sinia' pajk'i ti initiajnat ask'ioye ni aske', ka lajak'i pa Sijwajieti Jesús ti i'nesieyi.

¹³Asa'am ti inkijliyejyi'n, i'lij atate'ase ti pajk'i ti intant'iejayi siunie i'nio' po'o ta'a ti 'nelanjie'e, je wakaljli'ijyi niwa wask'i'nelaja yi' ape'e 'ni ajnat. Asa'am ti jwemik'iase'm, kia'iyojliyi atate'ase ni i'lij ti asa'am pajk'i ti jinilanayi ni imosik 'yina jitieyeyi.

¹⁴Ijiatjliyi 'napo ilis, atate'ase ti pajk'i ti intant'iejayi pi Sinia'. Asa'am ti inkijliyejyi'n, kia'iyojliyi ti pajk'i ti intant'iejayi siunie i'nio' po'o ta'a ti 'nelanjie'e, je wakaljli'ijyi niwa wask'i'nelaja yi' ape'e 'ni ajnat. I'lij atate'ase asa'am ti jwemik'iase'm, ti ast'oni poye jla'yi ti siuniwa Sinia' jlamtis iyo 'wetaja ni asosik, siu'neje ti siunie imosik ti je inkajlajyi'n.

¹⁵Awoma wita'm ti awo'ate: ke emina' ni ajnat, jla'yi niwa wask'i'nelaja yi' ape'e. I'nio' ni yimi'n nak ajnat, jlemijnaye je yi'ne pi Sinia'.

¹⁶Lajk'ipa ka neyi niwa wask'i'nelaja siuniwa taj'le ni ajnat ka nakaye pi Sinia' ka intajle, 'wenajliyi ti taj'le ni ajnat. 'Yina niwaka'ne siuniwa itiliaja ni i'nio', siu'neje ti itiliaja niwak jitiete i'wi'in, siu'neje ti initoniti siuniwa jikijmatis ti i'wi'in.

¹⁷Siunie ajnat ki iyo yamjliyi'iji ti jano'we, siuniwa tajla'm kiak janwo. 'Yina jlampet siunie i'nio' iyo niwa Sinia' iyo kanwo, nak ja ijnok'i'ni ti ja'wasana.

¹⁸Ilis, yiyi ni jlaj siojona jloma. Pajk'i ti 'najanayi pi jiwonayi siunie jana'am, naka siunie inineyine pa Sijwajieti. Ijiatjliyi a'wena 'nakayi ti je jlase' napo jitiejiejwas pi Sijwajieti. It'imina ti je kast'ayiji'n ti ijiate ti yiyi ni yi'i ni jlaj siojona jloma.

¹⁹Ti talts'e'm japok i'nio', sekyi'i'ne ti 'yakajayi ti je wikie'eyi ka intal siwa'm. Jlam'ne ka ijiatayi ka intal siwa'm, je kia'iyotaja'ni ka intal'ne saka kiowe'e jakayi.

²⁰Lapakawo ti Sijwajieti pajk'i ti iwi'nase'm jana Sinia' jikimet ti 'es it'imina ti ajosik jitieja.

²¹Ti i'lij atate'ase, je ajwe'el ka je 'najanayi. Intant'iejayi siunie ijiatk'i. Je int'ayeyiji'n siuniwa wask'i'nelaja je ijiatk'iji'n, je tajle siunie ijiatk'i.

²²¿Ten ni i'nio' sinti'? Ajwel'ni nakajle siunie iyo'ate ti takakiuni pi Jesús, “Jesús je nak Injwajieti ka intajle pi Sinia'”. Nak Sijwajieti jitiejiejwa 'yaka 'yakakiu pi Sinia' jla'yi pi jlas.

²³I'nio' ni 'yakakiu ni Sinia' jlas, tepa janwo ka Sinia' inejiap pet. Jlampet ni i'nio' ni ijiate ti je 'yakakiu ni Sinia' jlas, tepa janwo pet ka Sinia' je inejiap.

²⁴Lesana siunie inamtik ti 'es, siunie ti 'nelanjie'e jipe'yaye. Siuti kiak jawoyeyi siunie Sinia' jla'yi ni jlas kiak janwo'ijyi pet ja injwanjliyeyik'i.

²⁵Janaka'ne siojona Sijwajieti Jesús ijwilts'e'm, jana in'wasankiye ti t'o'n.

²⁶I'lij atate'ase ka 'najanayi ti po'o siunapo ti iyojonk'iye ka inkajmanats'iji'n.

²⁷Pajk'i ala ti yi'ase siojona Sinia' jikimet tajle pi Sijwajieti ti iwi'nase'm. Ja ke injwesiejayiji'n pa ka i'neyasana ja k'iejliyeyipe siupi jawoyeyi, lapawo ti po'o janak Sinia' jikimet ti janoye'ase'm. Siunie ja'neyasanayi, naka ni ijiatk'i, jlam je iyo ti 'es. Ká aleyeyi siunie jiniwonayi ti injwanjliyeyik'i'ni pi Sijwajieti, siunie iyo ti 'neyasanayi jana Sinia' jikimet.

²⁸Ilis, siukia awo'ojyi ti ajwe'lase'm ti awo'ate: ke ekiyejiap pi Sijwajieti Jesús, 'nakayeyijna'a siuti janapimet ja ke anikiwitanie'e, ja lajana'a ts'ajwejliye ilia'm jitieyi'i.

²⁹'Esiji ti 'najanayi pi jiwonayi pi Sijwajieti ti tijnajyi jla'am. Kiak iyo'ni pet siunapo iyo ni 'es, je int'ayiji'n ti napok Sinia' jilis.