Read Iyojwa'ja Chorote 1 Juan 5 Bible Online

1 Juan 5 - Iyojwa'ja Chorote bible

1 Juan 5

¹I'nio' ni je 'yakakiu pi Jesús ti jla'am ti Sinia' ijliu' ti Jijwajieti napo i'nio', nak ijiate jla'am ti Sinia' jlas. Siu'neje ni yimi'n ni i'nio' jilis po'o, kiak janwone'ijyi pet siupapo jilis janjwane'e ti janemijne'n.

²Siuti awoki niwaka, emina pi Sinia' jla'yi ti awoki siunie iyo kanwo, niwak tajleje ti kasts'ajane pet ti emina napo jilis pi Sinia'.

³Siuti jlemi'n pi Sinia', it'imina ti jiwoyi siuniwa jlamtis. Siuniwa jlamtis je kiojieti pet,

⁴siunie i'nio' ti Sinia' jlas to'm ilia'm siunie je 'es ape'e 'ni ajnat. Lapakawo ti ka lajak'i siunie iyo ti je akakiuk pi Sinia', it'imina ti je kaskajli ki iyo ni ajnat.

⁵I'nio' ni je 'yakakiu pi Jesús ti jla'am ti Sinia' jlas, nak toma ilia'm pet ki iyo ni yi' ape'e 'ni ajnat.

⁶Siuniwa 'yakajanit pi Jesús ti 'nes ajnat'e, naka i'niat ti tiniejienaje, siu'neje pi ji'woyis ti tisa'ni. Je pakata i'niat, ji'woyis 'neje. Siojopa Sinia' jikimet japak ikajanit'ne naka, 'yina ti japaka Sinia' jikimet ti ijiatk'i.

⁷Najape siuniwa 'yakajanit:

⁸siojona Sinia' jikimet, siu'neje ni i'niat, siu'neje pi ji'woyis pi Jesús. Siuniwa najape ijniul wita'm siupa iyo ka inwoyisi.

⁹Ijiate je akakiuniejataja siunie ijwi'il napo i'nio'. Lapakawo ti siunie Sinia' ijwi'il 'yaka'm ape'e 'naka. Wuj ti laja po'o, kajeyepa ti ijwi'il siupi iyo pi jlas.

¹⁰I'nio' ni je 'yakakiu siupa Sinia' jlas, yijni ni jlosik niwa Sinia' jlamtis. Jlampet ni i'nio' ni 'yakakiu pi Sinia', ijwila ka jla'm iwo pi Sinia', ti 'yakakiu siupuwa Sinia' jlamtis ti ijwi'il pi jlas.

¹¹Siunie iyo nak jlamtik, ijwi'il pi Sinia' ti iwints'e'm jana in'wasankiye ti t'o'n. Siojona in'wasankiye ti yiyi ni jlas.

¹²I'nio' ni Sinia' jlas janejiap, kiak janwo siojona ji'wasankiye janejiap. Jlampet ni i'nio' ni Sinia' jlas je yijap, kiak iyojliyi siojona ji'wasankiye je yijap.

¹³Ajlo'wase siunie i'lij ti asa'am ti je kakiuye pi Sinia' jlas, ka 'najanayi ti po'o siojona as'wasankiyeja' ti t'o'n.

¹⁴Sitiej awomaja pi Sinia', lapakawo ti janwents'e'm siupi ja'yejlaja, k'iejliyi pi jasitiana. Siuti jantaja wita'm siupi iyo pi Sinia', janwents'e'm.

¹⁵Iyoye'ate ti kasts'ajane ti Sinia' its'iuts'e ti 'ajlaja, kia'iyo'ni pet siunie ti yiyetats'e siunie 'ajlajaja pi Sinia'.

¹⁶Jane'yi pi i'nio' siuti jan'we'en ni jikiecha ti iyo ni jike' ka jeye wata'a ka nejia'm siojona 'najlati, 'esiji ka'najlan'ni. Sekjane'yi ka Sinia' in'manitiena'a ni jikiecha siuti jakeye wata'a. Po'o siunie inke' ti yame siojona 'najlati ni i'nio' ni iyoyi, it'imina ti awo'ate je jikie' ni 'najlaye ape'e ni i'nio' ni iyoyi.

¹⁷Lajk'ipa ka je inkeyeyi siunie je 'es ti tiwoki, 'yina po'o ni inke' ti je ijiate ka kiojietaja ka nameje jana 'najlati ni i'nio' iyoyi.

¹⁸Kasts'ajane ti siunie i'nio' ti Sinia' jlas je yits'e japa jlomaye ka inwo keye, 'yaka Sijwajieti Jesús ti Sinia' jlas jla'am ti i'yena, it'imina siunie imosik je 'yakajle'n pet.

¹⁹Kia'iyojliyiji 'niji kasts'ajane pi awonaja ti atajlaja pi Sinia'. Jlam pet siunie ajnat yi kiajwe ni jijweye ni imosik.

²⁰Siunie ti 'nes t'ipi pi Sinia' jlas, ti kastant'iejeniti pi Sinia' ti ijiate jla'am ti Sinia' kiak iyojliyi. Kasjwanjliyik'i siunie ti ijiate, ajwe'el ni jlas Sijwajieti Jesús. Jla'am ijiate jla'am ti Sinia', siu'neje ti in'wasankiye ti t'o'n.

²¹Ilis, joskiyeyi siunapo je ijiate ka diosisa'.