Read Iyojwa'ja Chorote 2 Juan 1 Bible Online

2 Juan 1 - Iyojwa'ja Chorote bible

2 Juan 1

¹I'lijwas atejwi'lase, asa'am ti Sinia' jilists'ase'm ti jleye as'wetits'ijk'i, ti Sinia' pajk'i ti int'ayejyits'i. Ya'am ti kijilk'i'm ajlo'wase siunie yamtik ti yimijna'yase'm ti kasjwanjliyik'i siunie ijiatk'i. Je yamkata, 'yina wikie'eyi 'neje siunapo pajk'i ti itiant'ieje siunie ijiatk'i ti wuj ti 'nama'ase.

²Siunie it'imina ti emina ka lajak'i naka siunie ijiatk'i ti yisajap jla'yi ti jlam kiajatajak'i'ni ti janesajap.

³'Esiji ka Sinia', jla'yi pi Sijwajieti Jesús ti Sinia' jlas siunie 'es, 'esiji ka insayis astepe'e ni jikap'ijliuskiye, jla'yi ni jikamankiye, kasjwanjliyik'i siunie ijiatk'i, jla'yi ti aninemina.

⁴Wuj ti ts'ajkaj'ni ti ajieye'ase ti po' siunapo ti je tajli siunie ijiatk'i, iyo ni Sinia' ti iyotaja ka iyoki.

⁵Ajalaskinta'ase pet ka ininemina. Ti ajlo'wase je ajwe'el ka ink'ieye siunie awo, naka ti 'nelanjie'e ape'yakie.

⁶'Yina siuti jayoki siunie Sinia' jlamtis iyotaja ka iyoki, ja'nakaja pet ti semijnaye japoye. Iyo siunie ti 'nelanjie'e jininekiajlayi pi Sijwajieti, ti iyo'ate, “Ká aleyeyi siunie asemijnaye ti jiwoyeyi.”

⁷Je jlase' siunapo i'nio' ti iniu ape'e 'ni ajnat ti je ijiat paka injwelis, ka inekisi kanjwelis pi Jesús ti 'nes t'ipi ajnat'e ti iniwojwa'n i'nioye. I'nio' ni kia'iyo, nak i'nio' ti ijiuski'la'n, Sijwajieti jitiejiejwa.

⁸Joskiyeyi, ja'nakayeyijna'a ka je inkajyina, ja ke injlankinayeyijna'a siunie jakajlayi ti jantajle ni Saka'niona Jesús.

⁹I'nio' ni iyo ka inkajmat ape'e siunie iyo ni Sijwajieti t'eyasajnaye, Sinia' je yijap. Jlampet siunie i'nio' ilisa'n nak inamtik ti 'es, siunie Sinia' jla'yi ni jlas yijap.

¹⁰Siuti po'o ni i'nio' ijio'wase ti je yiyiji ka inamtiyi nak inamtik ti 'es, ká a'yena'yi ilia'm, ká atejwilayi.

¹¹Siunie jantejwila, nak i'nio' iniuyeje siuniwa iyo ti je isis.

¹²Je piniyeta siu'niwa wask'i'nelaja ti awotaja ka ijwi'lase'm 'nakayi, lapakawo ti je awo ka yi'ne siunie ip'isinik. Ajwelta ka yama'aseyi ka ijio'wase, sek jane'yi ka ijiatayijijna'a ti jampots'e siunie sinikanitiejeye siuti kiak janwo.

¹³'Najata. Sinia' jilis siu'napo yi' pet ijiap, ti jla'am ti tijna'yi 'neje pet ti it'iajts'i, itijwi'lase.