Read Iyojwa'ja Chorote 3 Juan 1 Bible Online

3 Juan 1 - Iyojwa'ja Chorote bible

3 Juan 1

¹Ampey, isiecha ti yiminik Gayo. Ya'am ti kijilk'i'm, ti awo niwa Sinia' jlamtis, i'lij atate'a ti lajk'ipa ka int'emina ti emi'n, ti kasjwanjliyik'i siunie iyo ni ijiatk'i.

²Ijiatjliyi, ja isiecha, ajieye'a ti i'nesjliyi'ijne ti jiwoyi ni Sinia' jlamtis, ka jla'am kiajatajak'ina'a niwa jlomas ka at'oni poye, ka laja awet'iaye.

³Je jlase' ni awo ti ts'ajkaj'ni ti ajieye'a, ti ijwilk'im'ni siojopo ijiok'i ni siunie jiwo ti ataj je lie'ne ki iyo naka ijiatk'i.

⁴Lajk'ipa ka k'ieyeyi ki iyo ni inikanitieyi ti ajieyeyi japo ilis ti yame ki iyo naka ti ijiatk'i.

⁵Isiecha ti yiminik, 'esiji ti kia'iyo ti jinilesaniji k'iye napo si'lijwas 'yina ti jit'iu'we ti jiniuyeje pi Sinia', ejlojli jiwekie'e ti 'wena tajli.

⁶Ijwijla'm napo 'nak yi'i Sinia' jilis, ti injwelisi ki iyo ni emijnaye ti jle'ne. 'Esiji ka a'ye'n ilia'm napoka, kiak iniwone ja k'iejliyeyipe pa jansetianis ti t'iskiunk'ijin'ni, ti yamata'ni jawo pa Sinia' ti janemink'i ka tiwonaja.

⁷Ti yamata'ni ti iyoyisi ni Saka'niona jikimet, je k'iejliyi paka intajleje napo i'nio' kakiujnietas ka 'esieyi.

⁸It'imina ti awo'ate, je 'esijyi ka 'wenayeyi papo kan'yena, 'esijyi ka sama ka iniukieje, 'yaka iyo jika'niyeja' siunie ijiatk'i.

⁹Pope ja ip'isinik atajiete japo Sinia' jilis nak yiji, 'yina Diótrefes, ti yamjliyi'iji ni iniwone ti inikawisa'n, ti je its'iuts'e'm.

¹⁰It'imina siuka yiktiejna'a ti jajio'wase, jajwijla'm siunie iyo ni jike' ti wuj ti je 'es, siunie iyo ti kasamti siupi ijwi'il ka iyoki. Jika sintijieyis yints'e'm ti teje selia'm, jla'yi ti jeji'n i'yen'ni ilia'm papo si'lijwas ti 'nesata'ni. Je yine'ate papo ti i'yenta'ni ilia'm papo ijia, nak itiajlatayi'iji papo ti jlosik potie, ijliuye'eje kisie'e siupapo iyo ni Inamtik.

¹¹Isiecha ti yiminik, ká aki niwaka ti je isis, woyi jla'am niwaka ti isis. I'nio' ni iyoyi siunie 'es, nak tajle ni Sinia', jlampet ni iyoyi siunie je 'es, nak je itiant'ieje pi Sinia'.

¹²Jlampet ja sikiecha Demetrio, wikie'eyi napo i'nio' ti ape'yayik'i'ni ti ijwilis ti 'esjle' jla'am. Lajk'ipa ka inkajanit, ti naka siunie ijiatk'i ti iyo. Kiak awoki ti sa'am, jla'am je awoki ti ajwela pet.

¹³Je pini' siuniwa awotaja ka ijwijla'm, lapakawo ti je awo ka yi'ne siu'nie ip'isinik.

¹⁴Ajwelta ka je ipiejeniti ka ijio'wa ka yama'a, ka ini'wena ka ikamtijniena.

¹⁵Sek jla'a. 'Esijyi ka akama pi jle'yi. Siojopo ts'ajajnajwas itijwi'lase. Tej'we japo ts'ajajnajwas katejwile.