Read Iyojwa'ja Chorote Apocalipsis 10 Bible Online

Apocalipsis 10 - Iyojwa'ja Chorote bible

Apocalipsis 10

¹Sekyi'i ti a'wena'aja ja jikiecha injlojwanik poli jlele ti na'm isia'm ti tal poliyi siojo ijiatt'iyiji ti jijweye po', ti yiji jla'a poli. 'Yina ape'e jiwek jla'a jletik sek yiye'e jlaja jwats'ilkat, siojo jitiokio' iyo'ate siunie kilie' ti 'es, jlampet jawa jlekijna' iyot'e 'ate ni jwat ti tak'ayi pijia'm ti ijio pijia'm 'ne.

²'Yina itiujnin'ni jikiojyi ja imp'esinik jlas ti takapajlatak'i ti iliejna'm ta'a, 'yina siojo jisiet jijweye t'ase ape'e ni i'niat lajlik'i, siojo ji'lie'em t'ase ape'e pet 'ni ajnat.

³Sekyi'i siuti tana'a, 'yakets'ijiap 'ate iyo ni k'iwajla ti yapata. 'Yina tan jiwekie'e ti pesiejayi pit 'niwa ijwienjli sikio' itij'we times tom'niji isiumti'n, jla'lap iyo pit ti isiumtijnits'i.

⁴Jak je iyoyi siuti ape'yayeyi, awoyetaja ka 'yite'e kiwa jlamtis iyo. 'Yina je 'esiji ti ape'yayi'iji pi ina'lap tom poliyi ti ijliuk'i'ni, ti iyonk'i 'ate: —Je'e, ke 'ete'ena'a. Siojo iyo siojowa jipe'ya ti tajla'm niwa ijwienjli sikio' itij'we times tom'niji isiumtijniyis. Ká ajwel'nina'a. 'Otat.

⁵Jlajmiliet siojo injlojwanik poli jlele ti a'we'en ti t'as ape'e ja i'niat lajlik'i siu'neje ja ajnat sekyi'i jikio' siojo jijweye ijieye poliyi,

⁶ti iyo'ate: —Siunie i'nio' ti je 'ya'al ka paja, jilisanik 'ni ajnat siu'neje 'ni poli siu'neje 'ni i'niat lajlik'i, wikie'eyi siuniwa wask'i'nelaja ni jlele pet 'niwaka, ji'lij iwink'i'm kayo'ate, “Yik'i kiwa jlomas.

⁷Jak je iyoyiji siuti ja ji'woso' ilantana'a siunie injlojwanik poli jlele tomi jlaja ni nojwa'm ijwienjli sikio' itij'we times tom'niji, ineyeyinie'e siunie k'ie' Sinia' yint'ijyipi ka kia'iwo, iyont'iyipi ti ijwijla'm papo jijwejlanawos t'ipi.”

⁸Siupa ina'lap ti ape'yayi ti 'nelanjie'e ti tom poliyi ekiajlayi'ijyi ti ape'yayi, ti iyonk'i 'ate: —Maj, mayi siojo imp'esinik jlas siojo takapajlatak'i ti tilienajam ta'a, ti yi' jikiojyi siojo injlojwanik poli jlele ti t'as ape'e siojo i'niat lajlik'i siu'neje ja ajnat.

⁹Sekyi'i ti akie ti ajoyi ja injlojwanik poli jlele ti sijliuki'ni. Ayi ti awonayi 'ate: —Wenk'i'm ni imp'esinik jlas. 'Yina isiulk'i'm ti iyo'ate: —Siu'u, tojw. Ti ja 'ot akiwitk'i jalatk'i ti jawo'ate ni inkayik ti k'iemijyi, jlampet ti jane' atowiji ja payeje.

¹⁰'Yina akima ilia'm jak imp'esinik jlas ti injlojwanik poli jlele iwink'i'm, sekyi'i ti atojwa. Jak je iyoyiji ti siuti yiye isiwiti, 'yiniye siunie inkayik ti k'iemijyi, jlampet ti yiye itiowijiyi 'yina payeje'ejyi pet.

¹¹Sekyi'i ti kiak tiwonajak'i ti tijliukik'i'm: —Ekiajle'e kiu'ujwe ti jajwe'el siunie Sinia' iyoyi, ti itiejieta napoka i'nio' ti 'loj ti tajlits'i niwa ajnatis 'wenayi, siu'neje napo i'nio' ti ji'lij 'wenayi, siu'neje napo jika anechiyasas wus.