Read Iyojwa'ja Chorote Apocalipsis 14 Bible Online

Apocalipsis 14 - Iyojwa'ja Chorote bible

Apocalipsis 14

¹Itiej atate 'neje 'niji, sekyi'i a'wena ja 'wolepo 'woma ti takasiti'n ape'e jlaja tikijnaki Sión, ijwienjli takasiti'iji'n japo ciento cuarenta y cuatro mil i'nio' ti tip'esina jawa jitiokiots'i'l jle' ja 'wolepo' ji'woma, siu'neje ni jle' ni Jinia'.

²Jakayi'ne pet ti ape'yayi pa ina'lap ti tojma'm ni poli, ti iyo'ate ni jla'lap ni i'niat ti itiyak'i isia'm siupa iniu'we ti taj'l ape'e na tikina, iyot'i 'neje 'ate ni isiumtijni, 'yinit'iye 'neje siunie jla'lap iyo niwa 'woso'l t'aka' 'lojk'iji'n ti je jlase' ti tiliena.

³Jlajmiliet siojopo i'nio' ciento cuarenta y cuatro mil yilisisk'i siukia jika'le ti ink'ie' ts'e yi'i siujlieja ji'wet 'ni anechiyas, yi'i 'neje siojowa pini' Sinia' jilisajna' jitiete 'lo'weje'n, siu'neje japo i'nio' siojopo jwajla'a iyots'i'ni. 'Yina lajk'ipa ka inets'e ka 'najank'i ka inene siukia inka'le ink'ie' 'wenajliyi jlamis siojopo ciento cuarenta y cuatro mil i'nio' ti Sinia' pajk'i ti ijwiejiete'n ti tajla'm napo siunapo i'nio' yi' ape'e 'ni ajnat.

⁴Japoka siunapo ti je inikajyine napo asejnia, kajeyepa asejnia t'ale' je yi'ik'i, 'wenajliyi jla'am ti yamisk'ijin'ni naka 'wolepo 'woma siupi iyo ka ijnojwi. Lapakawo ti jikiowe'e napo i'nio' yi'i 'ni ajnat, Sinia' itime ti ijwiejiete'n, 'yiniye ka napokaye, Sinia' siu'neje ni 'wolepo 'woma, ti tiwoki ji'wajieta' siunie inia'an.

⁵Japoka ni siunapo ti laj jika sintijyisa', 'yina ti 'najli ni jlosik.

⁶Sekyi'i a'wena ja injlojwanik poli jlele ti ijwi'ya jikiowik'i ni poli, ti name ni siunie Sinia' jlamtik ti je paj ka inetia'n, ti janjwela ape'e wikie'eyi napo yi' ape'e 'ni ajnat, i'nio' ti jloniye je ijwienjli k'iejliyi, siunapo i'nio' ji'lij 'wenayi.

⁷'Yina jla'lap ijiok'i'ni ti iyo'ate ti pesie ilia'm: —¡Joskiyeyi ni Sinia' siu'neje ti jawunitie, 'yina ti yiyi siojona jika jloma ti kiak jawo ti jan'yen'ne napo i'nio' ni siunie iyoyisi! ¡Jonitie ti jla'am ti 'yotate ni poli siu'neje ni ajnat siu'neje na i'niat lajlik'i, siu'neje niwa i'niat ti jlam sek taj'lik'i'ni isia'm!

⁸Siojo injlojwanik poli jlele 'neje ja tomik'i ja jikiecha jlampa timesie japo 'nes'ni iyo pet 'ate: —¡Je k'iejeyik'i'ni ti netiajne'n, netia'n siojokia isi' ti wuj Babilonia;[1] siunapo i'nio' yiyits'i niwa ajnatis ijiume naka ni jloski'la ti ijiate ti je 'es!

⁹Jlampet siojo injlojwanik poli jlele tomi pijia'm ti najapeja kia'iyo jla'lap ijiok'i'ni ti iyo'ate: —Siunie i'nio' ja wunit naka pinitiok, naka 'neje jla'am ni jipe'el, siu'neje ti je inite'en ti tena'a siojona jijwukis ts'e jitiokiots'i'i ni'ne ka tena jikio'yi,

¹⁰jan'yaje siunie at'es ti i'niat je tisiayeje ti naka Sinia' jiwak ti jla'am pajk'i ti iwiakajlanit ti isiajia'm siojona inat jiwe. 'Yina janejyi ni jijliak'ali yi'i ni jwat siu'neje ni azufre, jitieyi'i napo Sinia' jijliujwajnas poli jlele ti isis, jitieyi'i 'neje ni 'wolepo 'woma.

¹¹Jlam'ne pet siunie tosie ti ijliak'alisi'ni je iliyi ka paja ti yam pijia'm jajnok'i'ni pet ti kia'iyo. Niwa jlomas ajnajas, 'yina je yi'its'ilia'm siunie iyo ni jijliak'ali napoka ti iyunit naka pinitiok, siu'neje ni jipe'el, siu'neje ni isi'm ilia'm ni jle' jana jijwukis iyo.

¹²Naka ti it'imina napo ti Sinia' jika kia'lis ti 'esiji ka ini'neti'n siunapo iyoyi niwa jlamtis jla'yi ti je itionit ni Jesús.

¹³Jakayi'ne ti ape'yayeyi pa ina'lap tom poliyi, ti iyonk'i 'ate, ti ijliuyijk'i'm: —'Ete'e siu'nie: 'Nakayi, jajnok'i'ni ti kiak jawoyi ti Sinia' jikap'ijliuskiye janeyi napoka ti 'yajlap ni Sinia'. 'Yina siojona Sinia' jikimet ti 'es iyo'ate: —Ijiate, lapakawo ti niwaka jla'am niwa iyoyisi ti je niliaja, 'yina niwaka'ne ti jant'emina ti janinop'itisi ni jikijmaye.

¹⁴Siuti itiej ekiajla'aja pijia'm, a'wena jlaja poli ti lemi, 'yina po' siojo yiji'n ape'e, ti 'yiniye pa i'nio'. Yi'ne jlaja jletik siojo tena jletik'i na i'nio' ti t'an pijia'm ti wikinie maja ti 'najli, 'yina po' 'neje siujlieja yin'ni jikiojyi ja sijnat soyojia'm ti 'yakajla'm.

¹⁵Sekyi'i tal'ne 'niji siojo jikiecha injlojwanik ti tal kiajwe siujlieja Sinia' ji'wuk yi' poliyi. 'Yina ka kia'iwo ka inlakiyi'i ti iyone 'ate siojo jikiecha ti yiji'n ape'e jlajak poli ti lemi: —¡Jlam woni'ni 'ate jwa isia'm naka inwomik ti tajla'm 'ni ajnat!

¹⁶Jak je iyoyiji'ni jak injlojwanik poli jlele ti yiji'n ape'e jlaja poli sekyi'i ijwiejk'i'ne, sekyi'i ti iliena'a ni siunie wakal ape'e 'ni ajnat.

¹⁷Paj ti 'nesa'aja ja injlojwanik poli jlele jikiecha ti kia'iyo yin'ni jikiojyi siujlieja jikie' ti 'yakajla'm jla'am ni inwomik ti tijwajakieta isia'm, ti tal kiajwe jlaja Sinia' ji'wuk yi' poliyi.

¹⁸Sekyi'i ti 'nesa'aja ja injlojwanik poli jlele jikiecha ti tajli pit jana altar, 'yina tijna'yi pet ni jwat ti isie'e. Ka kia'iwo kanlakiyi'i ti iyone 'ate siojo jikiecha ja yin'ni jikiojyi ja jitisajnat ti 'yakajla'm: —¡Nisiamaja, jwajats'i niwa jik'ase'l ni yi'i niwa jla' niwa ts'ejnietio', kiene ni atesajnat ti 'yakajla'm, 'yina ti wakal, 'yo'we, siuniwa tajla'm pet 'ni ajnat!

¹⁹Jak je iyoyiji ja injlojwanik poli jlele ijwiejayi ape'e 'ni ajnat, ijwiejk'ilia'm niwa jla' yi' niwa ts'ejnietio', sekyi'i tokieyi kiajwe siujlieja ji'wet jla'am ti je jlase', ti ja tak'asakits'i ti tiwok t'eye. Nak 'yakajanitk'i siunie jiwak ni Sinia' ti yi'ne napoka i'nio' iyoyi ni je 'es.

²⁰Siuti tak'asakits'i jawak ts'ejnietio' ti tiwok t'eye, je jnanjlajape'n ni isi', 'yina jlampet siunie tajla'm jlajak tenaja'a'ni ti tiwok t'eye 'woyis pet ni tajla'm, iniuyits'e in'wo kiajwe ti isiejk'i, jlampet siuti yajme'n ape'e 'ni ajnat trescientos kilómetrojos pi k'iek'i pi itij'w ape'e.