Read Iyojwa'ja Chorote Apocalipsis 15 Bible Online

Apocalipsis 15 - Iyojwa'ja Chorote bible

Apocalipsis 15

¹Sekyi'i a'we'en 'neje siojo iniank'iye siojo japoye ts'ijiye ti ijiat ti sakelit, ti 'lan poliyi. Po' japo ijwienjli sikio' itij'we times tom'niji injlojwajnas poli jlele itiu'un niwa inwet'iaye ti ijwienjlijamk'i, siuniwa tome jlaja, 'yina ti yiyi ni jika jloma ti noj kisie'e ni jiwak ni Sinia'.

²'Yina a'we'en ja siojo iyo'ate ni i'niat lajlik'i ti ijiat ti 'esi' ti intaj jlal tijwayiji'ni siojo ti jwat ijlijni'ni. Jlam'ne pet siojopo ti pajk'i ti itietisi isia'm jak pinitiok, jaka 'neje jla'am ni jipe'el titewitanajak'i, siu'neje jlaja jijwukis ni jle', takasitk'i ape'e jaka siojo i'niat lajlik'i ji'woso'l siojowa t'aka 'lojk'iji'n ijwienjlijamk'i ti pajk'it'ipe ti Sinia' yikiajle.

³Takelisiejne'n, 'yina yilisisk'i siukia Sinia' jikawo Moisés jika'le, jika'le 'neje ni 'wolepo 'woma, ti iyo'ate: “Saka'niona, Sinia' ti lajk'ipa ka ijnojliji, wikie'eyi siunie jiwoyi je jlase' ni iyo, siu'neje ti ijiate ti 'es. A'm ti siuniwa ajnatis jika anechiyasts'a'm, 'yina siuniwa a'najia tijnajyits'i siu'neje ti je tak'emiyeje wek.

⁴¿Tent'ipa i'nio' kanjwe'ya'm, Saka'niona? ¿Tent'ipa i'nio' ja ke ijnonit? Lajk'ipa jikiechaye ka wo'ate jiwoyi ti i'nes, injwanjli a'm. 'Yina jankapaj'la wikie'eyi napo i'nio' yijits'i 'niwa ajnatis, ti jant'opiyi akiajwe ti janwunit, lapakawo ti 'yaka ti tijnajyi siunie jiwoyi ti ji'ye'en ni iyo ni i'nio'.”

⁵'Yina yajmiwek 'nijiye kiaka, sekyi'i ti a'yena pijia'm poliyi, a'wena jlaja Sinia' ji'wuk ti 'ajla'm, siujlieja 'wuk ti 'nejes 'najli, siujlieja yit'i'yi'nipe pa Sinia' ti inikiutietaja papo jika kia'lis yi'i pa ajnat laj i'nioye'e.

⁶Siojopo ijwienjli sikio' itij'we times tom'niji injlojwajnas poli jlele tajlis kiajwe siujlieja Sinia' ji'wuk ti itiunisi'n siuniwa inwet'ia ti ijwienjlijamk'i. 'Yina ji'wuye jawa ijiat ti lemi siu'neje ti intaj jlal je ijwi'yi, siojowa t'ot jip'otis wikinie maja ti 'najli.

⁷'Yina ijwienjli'ne siojowa pini' Sinia' jilisajna' jitiete 'lo'weje'n ti ijwienkitamk'i siojopo injlojwajnas poli jlele ijwienjli sikio' itij'we times tom'niji jawa inat jijwa'al ti wikinie maja ti 'najli, ti tipoyijk'i na jiwak ni Sinia', ti je paj ka inetia'n jajnok'i'ni.

⁸'Yina siojo tosie ti tajle ni Sinia' jijweye siu'neje ni iyo ni Sinia' ti je jlase' ni iyo, itijwe'n kiajwe jlaja Sinia' ji'wuk, 'yina je 'esjliyiji kiu' ka poye paka 'no kiajwe siuti je nojli kiu' pijia'm siuniwa ijwienjli sikio' itij'we times tom'niji inwet'ia siojopo japo injlojwajnas poli jlele name.