Read Iyojwa'ja Chorote Apocalipsis 17 Bible Online

Apocalipsis 17 - Iyojwa'ja Chorote bible

Apocalipsis 17

¹Siojopo ijwienjli sikio' itij'we times tom'niji injlojwajnas poli jlele ti itiu'un siojowa inat jijwa'al, 'yina ijwienjli siojo ijiok'i ti iyo'ate: —Jomet, ja'winki'na'm siunie ja tiwonaja jlaja asejnia siujlieja ti ijiate ti ijiuski'la'n, ti ja tisiejek'i, ti yiji'n ape'e niwa i'niatis ti je jlase'.

²Ti siunapo anechiyasas yi' ape'e 'ni ajnat no'we ti 'yuyisi'ni, siu'neje ti siunapo i'nio' yi' ape'e 'ni ajnat ijiumisi ni siunie jloski'la iyo.

³'Yina siuti je atajli siupi jijweye japaka Sinia' jikimet ti 'es, siojo injlojwanik poli jlele soyiji ni ajnat ti laj i'nioye'e. 'Yina a'wena ja pinitiok isiatk'i ijwienjli sikio' itij'we times tom'niji jawa jlete'l, jlampet siojowa jik'iulis itijwa'm 'niwa sik'ioye ja nojwa'm, 'yina itijwk'i ti t'etajak'i jawa ineyis siunie tiwonaja ni Sinia' ti je 'esk'i siunie tiwonaja. Asejnia jlaja yi' ape'e,

⁴ji'wu' ja lasa'ni wat ape'e siu'neje ja isiat. Siuti inilesa'n wikinie maja ti 'najliyeyik'i jawa jikijmatis, siojowa t'ijyi'l jawaka pet siojowa sisajas siuniwa isis ti laja po'. 'Yina isi'me siujlieja inat jiwe ti kia'iyo wikinie maja ti 'najli tipoyi siojowa yiji niwaka siuniwa iyoyi ti wuj ti je isis insot ti tajle ni siunie iyo ti ijiuski'la'n.

⁵'Yina inamtis jawa yi' ja jitiokiots'i ti t'etaja'ak'i, siunapo i'nio' 'yijene wek ti yamtijie'n jlam'ne siunie ijio'we ti je 'yijene paka iwonisi. Siojowa inamtis iyo'ate: YA'AM TI BABILONIAK'I'M[2] TI SIWUJ, JLETK'I'M SIUNAPO ASEJNIA IJIUSKI'LAJNE'N, SIU'NEJE NIWA WASK'I'NELAJA TI IJIAT TI JE ISISI YI' APE'E 'NI AJNAT.

⁶Sekyi'i ti jiwekie'aja ti atejnisie jlajak i'nioki ti jitiej je 'esi, ti ijiume pa ji'woyis siukiapo Sinia' jilis t'ipi, siu'neje kiapo ti tenaja ape'e ni Jesús ti iyoyi jlamtikie' ti tilianaja'n. Ka iyojliyi pa ti a'wenayi.

⁷Sekyi'i injlojwanik poli jlele iyonk'i'ne 'ate: —¿Yot'iyi'ni ti kiak jiwoyi ti ijnots'iniji'ni? 'Yejne'n, jajwilik'iji'n siunie iyoyi jla'aka asejnia, siu'neje 'na pinitiok ti jlete'l ijwienjli sikio' itij'we times tom'niji, siu'neje ti jik'iulis itijwa'm 'niwa sikioye, siu'nie yi' ape'e.

⁸Siu'nie pinitiok ti ji'we'en, naka ni siunie ti kia'iyo ti ji'wenape ti 'wanjlijli'yi kiu', 'yina 'nakayi lajk'ipa, pajk'i ti netia'n. 'Yina ja ke iwojliyinie'e ti jano kisie'e ti jantalk'i siunie kiawe ni je ti'wena pa jlaj yi'i pa jik'ioyi, naka ni injlak'ali 'wet pet, siuti kiak jawo ja ke inejliyi kiu' siunie jane'yi jlaj ti janetia'n ka sek jlaja'ayina'a. Jak je iyoyi siunapo i'nio' ji'wet pet siunie ajnat yi'i, napoka ti jleyis laja naka imp'esinik siunie jleyis yiji napok ji'wasankiye ti t'o'n po', talk'i'ni pakayi ti Sinia' k'iejli ilisanayi siu'niwa wask'i'nelaja yi' ape'e 'ni ajnat, ka iwojliyinie'e pa ka i'wenista naka pinitiok. Kajeyepa ti i'winispe ti siuti 'wanjliyi kiu', 'yina 'nakayi lajk'ipa, netia'n, naka 'neje siunie ti janapi pijia'm.

⁹Siojo injlojwanik poli jlele iyo'ate: —Ja 'nakaj'ne siuti ja poye pa ka 'naja'an, ti janjwelik'iji'n kiaka. 'Yejne'n, ijwienjli sikio' itij'we times tom'niji jlete'l jak pinitiok, puwak ti'yenajap puwa tikijnakiyis ti kia'iyo 'nak nojwa'm, siujlieja i'nioki yijink'i ape'e. Kia'iyo ijwi'il 'neje ti papoka 'neje siupapo ijwienjli sikio' itij'we times tom'niji anechiyasas.

¹⁰Ijwienjli sikio' itij'we pa siupapo ti pajk'i ti tajli ni siunie iyo ti anechiyasisa', ijwienjli pa siupa ti isijme'n, jlampet siupa jikiecha pak je 'nesjli'ijyi pet. 'Wanjliyi ka 'nes, 'yina ji'niayi ja ke intoyi'yi.

¹¹Jaka ja siojo pinitiok ti ti'wena ti 'wasanjli kiu' 'yina 'nakayi ti lajk'ipa, jaka pet siupa anechiyas ijwienjli sikio' itij'we najape niwa tom'niji. 'Yina ti tajla'm papoka ijwienjli sikio' itij'we times tom'niji anechiyasas, je 'wena paka intayi japakaye pa siupa jiliaye ti tomi pijia'm paka pa jlaj jane'yi.

¹²Jlampet siojowa sikioye times itij'we jik'iulis ja pinitiok, papoka pet siupapo anechiyasas ti je yijli'yiji ka wo anechiyasisa'. 'Yina ijwienjli siojona inetinki janeyi jana kiliekie' jantomk'iji ka ineye'ena'a ti jawo anechiyasisa' k'iye napo i'nio'. Siojo pinitiok kia'iyojliyi 'ate iyo papo anechiyasas.

¹³Papoka sikioye times itij'we anechiyasas janikiul ti jijweye jawejna'm siu'neje ni jawo ti jatonitie jaka pinitiok.

¹⁴'Yina papoka'ne ti janilanisi ni 'wolepo 'woma. Siunie 'wolepo' ji'woma, siu'neje napo je iliyi ni Sinia' jla'yi ti pajk'i ta'a ti isi'mik'i, siu'neje ti tanits'i, kantojmatayisijna'a isia'm papoka. Lapakawo ti siunie 'wolepo 'woma naka ti yi' ape'e papoka inka'nionas, siu'neje papo anechiyasas, kia'iyo jika anechiyasis pet.”

¹⁵Injlojwanik poli jlele yine 'neje ape'e ti iyonk'i 'ate: —Jlampet siuniwa i'niatis ti ji'we'ejne ti siujlieja asejnia ijia jwa'yis jiwoki yijin 'neje ape'e, janapokaye pet siunapo i'nio' yijits'i niwa ajnatis, siunapo ti je jlase' ti jloniye je ijwienjli k'iejliyik'i, siu'neje ti ji'lija 'wenayik'i.

¹⁶Siojo pinitiok siojowa jik'iulis itijwa'm niwa sikioye ja nojwa'm ti ji'we'en, jane'wajasia'm jlajak i'nioki ti ijia jwa'yis jiwoki. Jajnalajanna'a siuniwa yiyi paj ka i'najliyejenna'a. Sek jane'yi ka intojwayisna'a siunie t'isie'n, sekyi'i kantatayisiajamna'a ni jwat.

¹⁷'Yina ti jla'am jla'am ni Sinia' ti kiak iyone ti yijni ni jlosik ti siupi iyo ka woyi ka pak iwoyeyipi. 'Yina it'imina ti kia'iyoyisi 'ate, “¡Naja'ni ti sijweye jawinaja'm naka pinitiok!” 'Yina kiak jawoyi paj ka ineyeyinie'e siunie Sinia' iyont'iyipi pi ji'lij.

¹⁸Siujlieja asejnia ji'we'en, janak pet siojona isi' wuj ti iyo jika wosa' siunapo anechiyasas yi' ape'e 'ni ajnat.