Read Iyojwa'ja Chorote Apocalipsis 19 Bible Online

Apocalipsis 19 - Iyojwa'ja Chorote bible

Apocalipsis 19

¹Yam'niji kiaka, sekyi'i ti ape'yayeyi pi jla'lap ji'yusie ti tojma'm ni poli papo i'niot'e ti je jlase', ti iyoyists'i 'ate: “¡Aleluya! ¡Sinia' ti jla'am ti injwajieti! ¡Wuj ti jijweye po' siu'neje ni jiwunitieyi ti 'es!

²Tijnajyi siunie ti i'ye'en ni i'nio' pi iyoyi, siu'neje ti je tak'emisie'n jiwek, 'yina isie'e siojona asejnia ti ijia jwa'yis jiwoki ti ijiuski'la'n, ti siunie ajnat init'ojliniti ni jloski'la iyo; iyoyi pet lajaye siukiapo Sinia' jilis mases ti iliajne'n.”

³'Yina yikiajlayi'iji ti iyo'ate: “¡Aleluya! ¡Siunie tosie ti tajla'm ja ke pajna'a ka inleyi ti yam pijia'm!”

⁴Siojopo veinticuatro i'nio' ti jwajla iyots'i, siu'neje jawa pini' tal Siniayi ti jitiete 'lo'weje'n, sekyi'i t'akosjlete'l itiyejayik'iji'n ti iyunitis pi Sinia' ti yijijyi'n siujlieja ji'wet ti 'es anechiyas ji'wet, ti iyoyits'i 'ate: —¡Amén! ¡Aleluya!

⁵Sekyi'i ti ape'yayeyi pa tom ts'e yi'i jlaja Sinia' ji'wet ti iyo'ate: “¡Wunitie ni Sinia', wikie'eyi asa'am ti aseyis po' ti jiwoye anechiyasisa', siu'neje napo ti lajk'iyi pet paka woyeyi, siu'neje napo ti jiniuyeyeje jla'yi ti je injweyeyi!”

⁶Sekyi'i ape'yaye'eje pa jla'lap iyo napo i'nio' ti 'lojta, iyot'i 'neje 'ate ni i'niat pa jla'lap ti taj'l ape'e jana tikijnaki ti itiyajak'i isia'm, iyot'i 'neje 'ate 'ni isiumtijnits'i ti 'loj, ti iyo'ate: “¡Aleluya! ¡Saka'niona, ti Sinia' 'neje, ti lajk'ipa ka ijnojliji, yi'i ti iyo anechiyasa'!

⁷¡Janikanitiek'i wita'm, sinikanitieyi janiponitieje, jla'yi ti jayunitie, lapakawo ti yiyi siojona jloma ti siunie 'wolepo 'woma ti ti'yenajap 'ni i'nio' ti tijwa'yi! Itime siojona janeyi ti ini'notat'ni,

⁸'yina Sinia' iyone 'ate, “'Ots'i siunie lotakinie ti lemi siunie je t'ojli, siunie ti intaj jlal je ijwi'yi, 'yina naka ti ti'yenajap siunie askijmaye ti 'es ti jiwoyeyi ti asa'am ti ika kia'lits'ase'm.”

⁹Sekyi'i injlojwanik poli jlele iyonk'i 'ate: —'Ete'ena'a siu'nie: Sinia' wuj ti jikap'ijliuskiye yi'ne siunapo ti jla'am ti i'yasits'i ka ijnoyi siunie jiliakijnieye ni 'wolepo 'woma, ti iyo'ate siunie i'nio' ti tijwa'yi. Sekyi'i injlojwanik poli jlele yine ape'e, ti iyo'ate: —'Niwak jla'm ijiate ti Sinia' jlamtis.

¹⁰Sek 'opiyeyi kiajwe ja injlojwanik poli jlele ti ajwelta ka iyunit, 'yina je sen'na 'ate. Sek iyonk'i 'ate: —¡Kiak ká awonk'i! Sinia' jikawok'i'm jiwek pet, awo'ate jiwoyi, iyo'neje siunapo a'lejwas ti je iliyi ti ijwi'il ni Jesús. Jla'm ijiate ka awunit ni Sinia'. Kajeyepa ti siunie Jesús ji'lij iwijna'm, napoka jijwejlanawos pet iyoyisi pet jlamtikie' siunie Sinia' tajle.

¹¹Sekyi'i ti a'wena ni poli ti inilajna'm, 'yakaja 'ni a'lenta lemits'i, jle' iyo'ate siojo i'nio' yi' ape'e ‘Ijiatk'i jla'yi ti Je Tak'emisie'n’, kajeyepa ti tijnajyi siunie ti 'yakajanit'i ape'e ni i'nio', siu'neje ti inila'an.

¹²Siojowa jitiete iyot'e 'ate ni jla'al ni jwat ti yat'e, 'loj siojowa tena jletik'i siujlie'e 'yakajanit ti t'an pijia'm pa'a. Poyeta ja jle' ti yi' ape'e, 'yina lapakawo ti lajk'ipa ka 'najane siupi iyoyi, ijwienjli jla'am ti 'yijene pi iyone.

¹³'Woyis t'elinajak'i'ni siojo ji'wu', 'yina siojo jle' jak i'nio' iyo pet 'ate Sinia' Jlamtis.

¹⁴Sekyi'i t'asayijk'i siojopo tokis 'loj poli jlele, ji'wuye jawa lemi ti laj jit'iojliye, siojowa jiliajwas a'lentas ti yik'i ape'e kia'iyo lemits'iji'n.

¹⁵Siojo iniajne'n k'iye japo jika ijiawos, siojo jitisajnat jitiok ti 'yakajla'm itiajlat jikiwitk'i, ti jankiene napo i'nio' yi' ape'e 'ni ajnat ti ja'netamk'i, siu'neje ti jawo anechiyasa' k'iye, je lajk'i ki jijweyeja' ti je jlase'. 'Yina siunie jawoyi ti jan'ye'en napo i'nio' jawo'ate siunie i'nio' 'yak'asajamk'i ti ikajwonits'i niwa ts'ejnietio' ti tiwok t'eye, ti jant'asi'ni. Kajeyepa ti siunie janwone, jan'yayijni siunie at'es siunie Sinia' ti lajk'ipa kajnojliji, jiwak siunie ti ijiate ti a'tiejek'i.

¹⁶Po' niwa inamtis yi'i ja ji'wu', yi'neje ts'e jlekijna'a jawa ijia, ti iyo'ate, JIKA ANECHIYAS NAPO ANECHIYASAS SIU'NEJE JIKA'NIONA NAPO INKA'NIONAS.

¹⁷Sekyi'i a'wena ja injlojwanik poli jlele ti takasiti'n 'niji taj'le 'ni kilie', jla'lap ijiok'i'ni ti tajnink'iye puwa ajwejnas ti iyo'ate: —¡Ajwejnas siuniwa itiuj'we'ni na insoti, ti yi' jikiowik'i ni poli, jonie'ni, kapajlayi ni asak ti je jlase' ti Sinia' iwi'nase'm!

¹⁸¡Tojwa'yi kiapo anechiyasas mases, ti tijna'yi niwa ajnatis, siu'neje kiapo tokis jika anechiyasas mases, siu'neje kiapo i'nio mases ti je k'ase, siu'neje kiwa a'lentas mases, siu'neje kiapo jika'nionas mases, wikie'eyi 'neje kiapo i'nio mases: siukiapo inkipijnas, siu'neje kiapo je inkipijnas, siu'neje kiapo jleyis po' ti iyo anechiyasisa', siu'neje kiapo ti lajk'iyi paka iwo ti jiniliaja pet!

¹⁹Sekyi'i a'wen'neje siojo pinitiok siojo tajla'm ja i'niat lajlik'i, siu'neje japo anechiyasas ti i'yena niwa ajnatis, siu'neje napo jika tokis pet ti 'loj, ti ijwienjliyiyits'i pet siojo nojwisi'i, ti tejeyisiap ti janilanisi siojo yi' ape'e ja jiliajwa a'lenta lemits'i, siu'neje japo jika tokis 'loj pet.

²⁰Sekyi'i ti tikimaja'a siojo pinitiok tijwanaja'a siojo jijwejlanik jiwo jla'am, ti je ijiat ka Sinia' jijwejlanik jiwoye', ti i'nisat'ni siuniwa ti 'yakelitk'i napo i'nio' ti yine'ni jitieyi'i ti jla'am. Ik'emijiete siuniwa i'nisatk'i siunapo i'nio' ti 'yaka ti isimits'i ilia'm jaka pinitiok, it'imina ti iyo jijwukisa' ti yi'n jitiokiots'i'i ni'ne ti yi'n jikio'yi, siu'neje ti iyunit ni jipe'el ti tewitanajak'i. Sekyi'i titietajayiji ni jwat ti ti'wasankitieje'n ja pinitiok siu'neje ja injwejlanik jiwo ti je tal Siniayi, jwat siunie ti isa ape'e ti iyo'ate ni tewuk iliyi ti yi'i ni azufre ti yat'e.

²¹Jlampet siukiapo ijia, jaka pet siojo i'nio' jiliajwa ja a'lenta lemits'i ti itij'we ti iliajne'n ti isiene siojo jitisajnat jitiok ti tal jikiwitk'i. 'Yina wikie'eyi siojowa ajwejnas ti itiuj'we'n na insoti yip'isi ki t'isie'n kiapo i'nio mases.