Read Iyojwa'ja Chorote Apocalipsis 2 Bible Online

Apocalipsis 2 - Iyojwa'ja Chorote bible

Apocalipsis 2

¹'Yina iyone'ne 'ate: —'Ete'e siu'nie, sek jane'yi ka jloyeyinie'e siunie jijliujwanik pet siunapo Sinia' jilis yiji jana isi' Éfeso: “Jlamtis siojo ijwienjli sikio' itij'we times tom'niji jawa katese'l siuniwa yi' poliyi itiujmat 'niji jijweye ti isi'me, siu'neje ti yikiajlin'ni jikiowek'i siojowa ijwienjli sikio' itij'we times tom'niji katese'l ji'wetis ti wikinie maja ti 'najli.

²Iyo'ate wikie'eyi siunie jiwoyi, ts'ajane pi awone. A'we'en siunie akijmaye ti kiojieti, siu'neje ti akanowe jiniope siunie ti ajlak'ali ti yi'a, siu'neje ti ts'ajane pi awone ti je t'iujwam'ni pet k'iye siunapo i'nio' iyoyi ni jike', siunapo yi' aswa'm. Siu'neje na ti pajk'i ti jlejlit napoka i'nio' ijwil ka napokaye injlojwajnas jlam'ne 'wenayi, 'yina ji'we'en ti ijiate ti napokaye siunapo jlamtis je ijyiwitijits'i.

³Jlampet siunie ti jinia'm ijyik'i je jlase' siunie ti jinilayiti, 'yina je wojliyi wek ka intasite, siu'neje ti ataj je lie'ne wek.

⁴“'Yina ijwienjliyetaja siunie atajlat'a'm ti awoyi atesa', naka ti jiliyi siunie emijnaye ti yi'a ti jiwoyi ti 'nelanjie'e.

⁵It'imina ti awo'ate, ataj wunitk'i siupa jle'yi ti inoyeyiji'n,, 'yina wo ajosik ink'ieye, woyi siu'ujwe siukia jiniwone ti 'nelanjie'e. Siuti ja ke awoyiyi, jijwel ka je ijio'wa, ti ja'yikisa'na, sek jane'yi ka ijiala'ajna'a siojona aka katese'l ji'wet ti jatiajla'ne ni yi'i, siuti kiak jawoyi ja ke inkajlaja ka wats'ilati siunie jiwoyi.

⁶'Yina i'nesi pet siunie ti jiwet'iane naka jikijmaye pet napo t'eyasajnas ni Nicolás siunie iyo, siunie ti kia'awo awet'iane.

⁷“¡Siunie jik'iot tiojwa'l po', k'iuyi siunie iyo janak Sinia' jikimet ti 'es ti ijwijla'm napok Sinia' jilis! Jlampet siunie jant'an pijia'm nak jawinajamna'a pet siunie jantojw jla' janaka a'la' ti i'wasankiye tajle yiji ni Sinia' jiwasok ti 'es.”

⁸Iyonat'iyi'iji 'ate: —Lesane kiu'ujwe siu'nie ti jajloyi pet siunie jijliujwanik siunapo Sinia' jilis yiji jana isi' Esmirna: “Ni siunie inia'an siu'neje ni jlaj, siunie ti 'yalpe sekyi'i ti yikiajlayi'i ti 'wasa'n, ji'lij jla'am siu'nie,

⁹ti iyo'ate, A'we'en siunie ti ijiat ti jinilayiti siu'neje ni ap'elisieye iyo, 'yina awo'ate ti ya'am 'nakayi je imp'elisie. Ts'ajane pi awone ni siunie tiwona'a ti injwela ka je i'nes siunapo ijwil ka Judíojosa, 'yina jla'm iyoyisi; sitiejiejwa imosik jilis nak jla'm ijiate jla'am.

¹⁰Ke ijnots'ina siunie jawo ni janilayiti ka netie'anie'e, 'ye'en siunie imosik jajnotie kiajwe jana insat jiwe pa ja inojwajia'm ti asa'm, sek jane'yi ti ja'nakaja siuti ja ijiatayi ti astankiujnieye japoye ti ja ke akakiuye ni Sinia'. Times niwa sikioye jantej'we niwa janojwaja'm ni jlomasa' ti kiak jawoyeyi ti ja ayejyi ni asjlak'ali. 'Yina ká aleyi, ataj ká ala'ne, 'wanjliyi ka ajyi siunie alayeja', 'yina ajwe'la'm ti jawi'na'm siojona a'wasankiye ti t'o'n jawoyena'a 'ate siunie i'nio' t'an pijia'm ti tiliaki'n siojona tena'a jana jletik ti 'yakajli.

¹¹“¡Siunie jik'iot tiojwa'l po', k'iuyi siunie iyo janak Sinia' jikimet ti 'es ti ijwijla'm napo Sinia' jilis! Jlampet siunie jantate isia'm ni siunie jitiejiejwa, nak ja ke inekiajle'eje ka 'na'al.”

¹²'Yina kia'iyoyejyi'iji 'ate: —'Ete'e kiu'ujwe siu'nie ti jatajiete ni jijliujwanik napok Sinia' jilis yiji jana isi' Pérgamo: “Iyo ni siunie i'nio' ni jitisajnat tiok ni jikiwitawa timesi ti 'yakajlamk'i.

¹³Ts'ajane pi awone ti jle'yi siunie ajnat sitiejiejwa imosik jika anechijiayas yi'i. 'Yina jlekjliyi wek ti je liyi siunie atankiujnieye ti je sakakiu, ejlowek ti yamata ti at'emi'na, siukiwa jlomas ti Antipas, siukia ikawo ti 'es ti tilianajape, ni yi'i ni sitiejiejwa imosik.

¹⁴“'Yina po'neje ni siuniwa ti atajlata'm, naka ni siunie ti jle'najap siunapo ti yame pet siunie Balaam jika'neyasajnaye iyo, ti ijliut'iyipe pet pa Balac ka intajnap'ni ni siunie je 'es, ti ijwijla'm siunapo Israel jika kia'lis ti ijwil ka 'esieyiji ka titiuwa siuniwa ti pajk'i ti titimaja ti tiwok inlakijnieye ape'e puwaka siu'niwa ti tiwoki diosisa', ja 'nakayeyi pet ti janejia'm ni siunie inke', siu'neje na ti 'yakama ape'e siunie jota iwo napo siunie ayinie, siu'neje jana asejnia ti jlosik ijyiwiteje.

¹⁵'Yina po'neje siunapo ti jle'najap ti yame pet siunie inka'neyasajnaye tajle pet napo Nicolás t'eyasajnas.

¹⁶Tempi it'imina ti awo'ate, wats'ilati siunie ajosik iyo, 'lojwinie'e ka iyik, 'yina ja lajak'ipa ka sijwatani'ni ti jajio'wa, siunie itisajnat jitiok siunie tal isiwitk'i nak jasie'nase ti janila'nase.

¹⁷“¡Siunie jik'iot tiojwa'l po', k'iuyi siunie Sinia' jikimet ti 'es iyone napo Sinia' jilis ti ijwijla'm! Siunie i'nio' ni jant'an pijia'm ti jantate isia'm ni jitiejiejwa, nak ja'yakojniene jana maná ti je takajanitie, sek jane'yi ka iwinajamna'a siojona sisaj lemi'ni ti yi'i siunie ine'e ink'ie' ti t'etaja'a, siunie ti je yits'e paka 'najane pa ka iwone 'yina 'wenajliyi jla'am siunie tena jikiojyi ti 'yijene pi iyone.”

¹⁸'Yina kiak iyoyi'ijyi 'ate: —'Ete'e kiu'ujwe siu'nie ti jatajiete ni jijliujwanik napok Sinia' jilis jana isi' Tiatira: “Iyo ni siunie Sinia' jlas, siunie ti jitiete niwa iyo'ate ni jwat ti yat'e ni jla'al, siu'neje niwa jisietis ti intaj je ijwi'yi, iyo'ate siunie wikinie maja ti t'onk'i ti tiliena ape'e siunie jit'iojli.

¹⁹Ts'ajane pi awone wikie'eyi siuniwa wask'i'nelaja jiwoyi, siunie emijnaye, siu'neje ni atankiujnieye ti 'es ti je kakiu pa Sinia', siu'neje ni akijmaye, naka 'neje jla'am ni siunie ti ataj je lie'ne. Siu'neje ti 'nakayi ni siunie jiwoyi 'yaka'm ape'e siunie jiwoyi ti 'nelanjie'ajape.

²⁰“'Yina ijwienjliyeta siunie atajlata'm ti awoyi atesa': naka ti jlena 'ate ti iyoyi na je 'es janaka asejnia Jezabel, ti ijwil ka intal Siniayi siunie iniwone, 'yina ik'emijiet napo ikawos siu'neje ti 'yakajmaneje'n siunie iyo niwa jika'neyasajnayejes. Sekyi'i ni siunie ti ijiat ti je 'es ti iliaki siunie jijwa'ajiye, siu'neje ti itiujw siunie titiejietajape pet siuniwa tiwoki diosisa' ti tonitiejata.

²¹Jlomas nak nojwaja'm kiwa entaja ti ak'iutiejap ka pakajat'iyipe ka iwo jlosik ink'ieye, 'yina je takajlaja ka wo ka ileyi siunie inwone ti ijiuski'lan'ni.

²²It'imina ti ja ijia'neje'n ni jlo'wet ti ja'wijnank'i siunie ja jlajlasa, sekjane'yi ka isimayinie'e napo jilis ti jaliajne'n. Jlampet siunapo i'nio' ti iniuyeje naka ni siunie jloski'la iyone siuti kiak jawo ja ke inleyisiji, 'yina siuti ya'am ja a'tiejak'i siunie jayone. Ja 'nakayeyi ti siunapo Sinia' jilis jan'wenis ti je ajla'an naka siunie jik'ioyiyi ni siunie i'nio' jlosik a'we'en, jla'yi ti ts'ajane pi awone siunie jitienkiujnieye. Jak je iyoyiji siupa k'ie' pa iniwone, 'yina pak ijniujlietayijinie'e siunie jayone pit.

²⁴“Jlampet ti asa'am pa inojwajia'm pet ti jleye'yi janak Tiatira je jlekiets'i nak jika'neyasajnaye janak Jezabel, 'yina ti kia'iyo ti je intant'iejayi siuniwa ijwilis ti jlameje ti tajle ni sitiejiejwa imosik, 'yina ajwe'lase'm ti lajk'ipa jikiechaye ka itilki'nase ka 'yijie'nase'm 'etsaka. Najata jla'am ti awotajank'iye ka 'otatiji ni siunie yi'a, paj ka neyeyinie'e siojona jloma ti ja'nis ti jayapimet.

²⁶Siunie i'nio' jwajla'a iyo'ni ti jant'a'n ape'e ni siunie jitiejiejwa, siu'neje ti jitiej je ilie'ne ti iyoyi siunie ajloyeje ka iwoyi, 'yina jajnok'i'ni paj ka ineyeyinie'e siunie jlaj jane'yi, nak jayojwa'n anechiyasa' ti jan'yena pet wikie'eyi siuniwa ajnatis.

²⁷Iyo pet 'ate ni awo ti Inia' iwink'i'm siunie ika anechijiayas. Ijia jika anechiyasa' 'yina ja ke lajak'i siunie ja jijweyeja' ti je jlase', jawonayijna'a 'ate siuniwa ta'aski ti isat tiwok jijwala' ti tajakiamk'i. 'Yina jawijna'm 'neje siojona kates jloma jla'yiki.

²⁹“¡Siunie jik'iot tiojwa'l po', k'iuyi siu'nie iyo janak Sinia' jikimet ti 'es ti ijwijla'm napo Sinia' jilis!”