Read Iyojwa'ja Chorote Apocalipsis 20 Bible Online

Apocalipsis 20 - Iyojwa'ja Chorote bible

Apocalipsis 20

¹Sekyi'i ti a'wena'aja ja injlojwanik poli jlele ti na'm isia'm ti tal poliyi ti itiu'un siujlieja kiawe ti je ti'wena k'ioyi jip'ot jikie'e ti t'ajlinitieja'm, ijwie'ne siojowa wikijnies ti wusk'iji'n tijweniejek'i.

²Sekyi'i injlojwanik poli jlele isime ti ilie'nit'ne jaka siojo ajliutietiok, naka'neje 'ni injlatiok ti 'nelanjie'e t'ipi, naka Imosik siu'neje ti Sitiejiejwa. Ilie'niti siojo itiun'ni wikijnies, sekyi'i ti 'yumajak'i isia'm siujlieja kiawe ti je ti'wena k'ioyi, sekyi'i ip'ionayi ti 'yite ape'e ti 'yilina ape'e siojo je ik'asinit'i ape'e, kajeyepa ti ja ke inets'e paka inkajli ka i'najlinit'i ape'e jajnok'i'ni paj ka mílana'a niwa najkapis ni siuniwa tenaje. Jak je iyoyiji jankama'ne napo i'nio' yi' ape'e 'ni ajnat, ti ja lajak'i'ne paka ink'emijietk'i paj ka ineyek'ina'a siuniwa tenaje. Janek 'niji niwaka ka jiwekie'ajana'a ka tiwejnana kiu wat kisie'e, 'yina ja ke paja kisie'e.

⁴A'wen'neje siuniwa ji'wetis napo anechiyasas, 'yina siunapo yiyisijyi'n napoka ti Sinia' yikiajle ni jijweye kan'ye'en napo i'nio' siunie iyo. Sekyi'i a'wen'neje niwa jisiak'alis siunapo jlete'l tilienat'i'yijimpe ti titiajlataja naka ti je iliyi ti yame ki iyo niwa Jesús jlamtis, siu'neje niwa Sinia' jika'niye, siu'neje ti je iyunitis jaka pinitiok ka jitiej iwomisie, siu'neje ja jipe'el ti tewitanajak'i, siu'neje ka lajk'ipa ka inejyi siunie ti tiwok jijwukisa' ni jitiokiots'i, siu'neje ni jikio'. A'we'en ti 'wasanaja'neje mil niwa najkapis yiji ti iyoyis pet anechiyasisa', ti ijwienjli yiyisi'i ni Sijwajieti ti kia'iyo.

⁵Naka ni siunie inia'an ti 'nelanjie'e iniuk'i kisie'e napo ti tajli ni a'no'. Jlampet siunapo ijia je 'wejts'ik'iyi pet ka inapits'i pijia'm jajnok'i'ni paj ka ineyek'ina'a wek siuniwa mil najkapis.

⁶¡Sinia' jikap'ijliuskiye ti 'es yi'ne siunapo ti inian'ni ti yikiajle'e ti 'wasajne'n, 'yina ti napoka ti Sinia' jika kia'lis! 'Yina siojona 'najlati ti jantome pijia'm ja ke injlan'ni pet. 'Wenajliyijna'a ti janapokaye Sinia' naka 'neje ni Sijwajieti Jesús ti jawoyi jika pa'yijisa', ijwienjli janeyisi'iji'n ni Sijwajieti ti jawoyis anechiyasisa' ti jajnolk'i niwa mil najkapis.

⁷Janek 'niji siuniwa mil najkapis, ka jiwekie'ejana'a ka t'ajlinitieje ni imosik ti inkio' ja tiliena'a ti tiwoki inkipinikie'.

⁸Sekjane'yi ka inekiena'a ti janekk'i'ni napo i'nio' ti yijits'i niwa ajnatis ti jankajmank'iji'n. Jank'emijiet siojona Gog, siu'neje jana Magog. 'Yina jajnotiena'ak'i wita'm ti jantajietk'i wita'm ti janilajne'n, 'yina ja ke piniye napo i'nioye, jawo'ate ni jolo' yi'i ni i'niat lajlik'i.

⁹Itijwi'n ape'e 'ni ajnat ti yam'ni, sekyi'i ti jatant'ekijiam'ni siunie Sinia' jilis ji'wet ti iliakiyisi'i wek, lapakawo ti tijwayisiap jana isi' ti Sinia' jleminki. Jlampa iyoye pet 'ate ni jwat tal poliyi ti itij'we papoka ti 'yojwits'i.

¹⁰Jlajmiliet siojo imosik, ti ik'emijietk'i napo i'nio', titietajayija'm ni jwat siunie ti isa ape'e iyo ni i'niat lajlik'i, siu'neje na azufre, siunie ti kia'iyo ti titietaja'm ja pinitiok siuti jiliaye iniuj wita'm ja injwejlanik jiwo, ti je tal Siniayi. Jlomas ajnajas ti janejyi ni jijliak'ali 'yina jajnok'i'ni ti kiak jawo.

¹¹Jakayi'ne ti a'we'en siujlieja ji'wet ni anechiyas lemi, siujlieja ti jlamt'iyiji, siu'neje ja yi'iji'n. Sekyi'i siunie ajnat siu'neje na poli jlam sek netiana'a jitieyi'i, 'yina ka kia'iwo ka ti'wena paka inejyi wata'a.

¹²Sekyi'i ti a'wena siojopo ti 'yalt'ijyimpe, siojopo i'nio' ti jleyis ti pope ti 'wanjlijliyits'i kiu', siu'neje japo ti lajt'ik'iyipe pet paka iwoyi ti jiniliaja t'ipi pet, ti takasitk'i jitieyi'i siojo i'nio' ti yi'iji'n jlajak in'wet ti 'es. Sekyi'i ti tilienajamk'i siojowa imp'esijna' ti ineyis ji'wet, jaka 'neje jla'am siojo imp'esinik jikiecha, jleyis yi'i siunapo ti ji'wasankiye ti t'o'n po'. 'Yina siojopo ti 'yalt'ijyimpe, siuti Sinia' i'ye'en siupi iyoyi kiak iyonayiji siupa iyone ti yi'i jawak imp'esijna'.

¹³Sekyi'i siunie i'niat lajlik'i yikiajlayi ni Sinia' kan'ye'en siunapo ti 'yalt'ijyimpe ti yiji pet; siunie 'najlati jinia' kia'iyojliyi yikiajla pet siunapo jikas t'ipi pet, napoka napo yiji. 'Yina i'winajliyi siupa iniwont'iyijipi pet ape'e 'ni ajnat.

¹⁴'Yina siunie 'najlati jinia' sekyi'i ti titetajayi siunie jwat ti isa ape'e, 'ate iyo ni tewuk iliyi, janaka 'najlati ti tomik'i siojopa inia'an.

¹⁵'Yina sek titietaja'a wikie'eyi siunapo i'nio' jleyis je yi'i siunie imp'esinik ni jleyis ji'wet napoka ji'wasankiye po' ti t'o'n.