Read Iyojwa'ja Chorote Apocalipsis 21 Bible Online

Apocalipsis 21 - Iyojwa'ja Chorote bible

Apocalipsis 21

¹Yam'niji kiaka, sekyi'i a'wena ja poli ink'ie', ajnat 'neje ink'ie'. Kajeyepa ti siupa poli ti paj, siu'neje pa ajnat paj, i'niat lajlik'i ti kia'iyo paj, lajk'i puwa, netia'n.

²A'wena siujlieja isi' Sinia' t'otatki, ti jlajaka p'an Jerusalén ink'ie', ti na'm isia'm ti tajle pi yi'i pi Sinia' poliyi. Itime ta'a ti inilesan'ni ti 'yuts'iji'n ji'wuye ti isis, 'ate iyo jana i'nioki ti janjwa'yi ti janeyi'ne siupa initeme.

³Sekyi'i ti ape'yayeyi siupa jla'lap pa ti 'yakets'ijiap ti tom ts'e yi'i jlaja in'wet ti anechiyas ji'wet, ti iyo'ate: —'Yejne'n, Sinia' iyoye'ne pet ji'weta' jikiowe'e napo i'nio'. Sinia' janejiape'n, siupet ti jla'am jawoyi jika kia'lisa'. Siupet ti jlamis jawoyisi Jiniaye' ti jitiej jawomisie, kajeyepa ti ja ke intajla.

⁴Sekyi'i jitiet t'e' ja lejak'ina'a k'iye, siojona 'najlati ja lajak'i japa, siunie injlak'ali kia'iyojliyi. Siu'niwa inajlas ti tapaja'n, siu'neje ni ti tinilayitieje, siu'neje na a'tiejiek'i. Ja lajak'i, lapakawo ti netia'n siuniwa ti k'iejliyi ti kia'iyo ti po', 'yaka no'we.

⁵Sekyi'i siojo yijijyi'n jlajak in'wet ti 'es iyo'ne 'ate: —'Ye'en, awojwa'n ink'iejyisa' wikie'eyi niwa wask'i'nelaja. 'Yina iyonk'i 'neje 'ate: —'Ete'e 'niwaka, 'yina jla'm ijiate wek jla'am ka je inkakiuni napo i'nio', kajeyepa ti je tak'emisie'n.

⁶Sekyi'i ti kiak iyonak'i'ijyi 'ate: —¡Wakal! Ya'am siunie iniant'ipi, 'yina yam'neje siunie yi jlaja. Ya'am siunie ti 'nelanjie'e, 'yina jajiok'i'ni. Siunie ti na'la ilia'an jawijna'm siunie i'niat ti jlam sek tajle wek ti jayoyi ji'wajieta', siunie i'niat ti i'wasankiye.

⁷Siunie ti jantate isia'm niwaka ti teje'yi ilia'm naka janeyena'a jikiojyi wikie'eyi siuniwa ti jla'am ti jikijmatis. 'Yina ya'am ti ja Jiniayek'i'm, jlampet ti jla'am ja yasa'.

⁸Jlampet siunapo ti t'otale je t'ojni'n, siu'neje napo kakiujnietas, siunapo ti ijiat ti 'yakama ape'e niwa jikeyis ti je isis; siunapo i'nio' kalankijietas siu'neje napo ijia jwa'yis jiwos, siu'neje napo ti iniwojwa'n aye'wulisie', siu'neje napo ti jitiej iyoma niwa k'iejliyi ti iyoyi jika diosisa'; siunapo ti sintijyis, 'yina wikie'eyi napoka ti jajnoyi siunie jwat ti isa ape'e ti iyo'ate ni tewuk iliyi ti yat'e azufre. Naka jana 'najlati ti tomik'i siojona inia'an.

⁹'Yina siojopo ijwienjli sikio' itij'we times tom'niji injlojwajnas poli jlele, siojopo ti itiu'un siojowa ijwienjli sikio' itij'we times tom'niji inwet'ia yijits'i jawa jijwa'al ti tipoyijk'i siojowa tomik'i pijia'm, jaka'ne siojo ijwienjli ti ijiok'i ti iyo'ate: —Jomet, ja'winki'na'm siojona initeminijin'ni, ti janeyi ni 'wolepo' ji'woma.

¹⁰'Yina ti ajyi siupa jijweye japa Sinia' jikimet ti 'es, sekyi'i siojo injlojwanik poli jlele soyeyiji jlaja tikijnaki ti wuj siojo yi'i ja ti ijiat ti toj pijia'm, ti i'winkink'i'm jlajak Jerusalén, isi' ti 'es Sinia' ji'wet, ti na'm isia'm ti tal poliyi yi'i pa Sinia' yi'i.

¹¹Intaj jla'al je ijwi'yi, kajeyepa ti Sinia' jla'am siupa jla'al ti itie'e, siu'neje ti intaj jla'al tijwayiji'ni, ni k'iejliyi siojona sisaj ti jle' iyo'ate jaspe ti 'es.

¹²Po' ja inwasok iniujwape'n toj pijia'm, itijwa'm niwa sikioye times tom'niji jawa jika 'wuk kiwitawa. Injlojwanik poli jlele ijwienjlijamk'i jawa 'wuk kiwitawa ti iyo 'nayiwosa', 'yina inamtis yi'ik'i jawa 'wuk kiwitawa, jleyis t'ipi papo Israel jika kia'lis siupapo itijwa'm niwa sik'ioye times tom'niji t'ipi.

¹³Najape jawa 'wuk kiwitawa iti'niji taj'le ni kilie', najape 'neje jawa iti'niji wikinaja, najape 'neje jawa iti'niji iniwuki, najape 'neje jawa iti'niji 'yu'yi ni kilie'.

¹⁴'Yina siojo inwasok tip'onajajap jlajak isi' itijwa'm niwa sikioye times tom'niji jawa sisajas jawa tiwoki jijwetisila' ti 'yit pijia'm. Po' jawa inamtis yi'i jleyis napo 'wolepo 'woma jijliujwajnas siunapo itijwa'm niwa sikioye times tom'niji.

¹⁵Siojo injlojwanik poli jlele ja i'yask'i'ni itiun'ni jikiojyi ja a'la' siojo tikienaja'ni ti tijniujlietajak'i pa k'iejliyi pa, 'yina siojo k'ie jlajak isi', siu'neje jawa jika 'wuk kiwitawa siu'neje ja inwasok ti tip'onajajap.

¹⁶Siujlieja isi' ijniul wita'm siojo k'iejliyiji ti itiojyi siu'neje ti isajk'i, ti ti'yena ja k'ie. Jak je iyoyiji siojo injlojwanik poli jlele ti ijniujlietk'i siojo jika a'la' ti i'ye'en ja k'ie siunie ti itiojyi jlaja isi' dos mil doscientos (2.200) kilómetrojos, kia'iyojliyi ti toj pijia'm, siu'neje ti isajajyi'n, lajk'ipa ka int'ane pijia'm.

¹⁷Jlampet siuti ijniujlietk'i siojo inwasok tip'onajajap, sesenta y cinco (65) métrojos ni k'ieja'm iyo ni ti ijiate ti i'nio' ti ijniujlietk'i pa ti iyo kan'ye'en, 'yina kiak iyone ja injlojwanik ti i'ye'en.[7]

¹⁸Siojo inwasok siojowa sisajas siojowa isis jle' iyo'ate jaspe 'najlik'i, jlampet siujlieja jlame isi' wikinie maja ti 'najli pet, ja k'iejliyi ni taj jla'l tijwayiji'n ti ijiat ti t'otataje ti tilisana ape'e 'yina 'es.

¹⁹Siojowa sisajas ti 'yitk'i pijia'm ti tomk'i isia'm k'iye ja inwasok ti tip'onajajap, wikie'eyi siojowa sisajas ti isis ti laja po' ti'nialkitak'i. Siujlieja inia'ne jla'al siujlieja sisaj jle' iyo'ate jaspe; jlampet siujlieja tome'e jlaja inia'an jlajak pet siujlieja jle' iyo'ate zafira, ti lasasi ape'e ni k'iejliyi; jlampet siujlieja jijwukis najape'e jlajaka pet siujlieja sisaj jle' iyo'ate ágata; siujlieja jijwukis ijniujlits'i sisaj jlajaka pet siujlieja ti jle' iyo'ate esmeralda, siojona jiwats'o'ni;

²⁰siujlieja ijwienjli sikio' itij'we jlajaka pet siujlieja jle' iyo'ate ónice; jlampet siujlieja ijwienjli sikio' itij'we ijwienjli jlaja tom'niji jlajaka pet siujlieja sisaj jle' iyo'ate cornalina, ni k'iejliyi niwa 'wosta' jlokie ni k'iejliyi; siujlieja ijwienjli sikio' itij'we times tom'niji, 'yina jlajaka pet siujlieja jle' iyo'ate crisolito, ti maja; jlampet siujlieja ijwienjli sikio' itij'we najape tom'niji jlajaka pet siujlieja sisaj jle' iyo'ate berilo, ti lasa ape'e siu'neje ti jiwats'o ni k'iejliyi; siujlieja ijwienjli sikio' itij'we ijniujlits'i tom'niji jlajaka pet siujlieja sisaj jle' iyo'ate topacio, ti maja; 'yina jlampet siujlieja jijwukis itijwa'm niwa sikioye janaka pet siujlieja ti jle' iyo'ate crisaprosa; siu'neje jlaja itijwa'm niwa sikioye ijwienjli jlaja to'm ape'e jlajaka pet siujlieja jle' iyo'ate jacinta; jlampet siujlieja itijwa'm niwa sikioye times tom'niji jlajaka pet siujlieja jle' iyo'ate amatista, lasasi isiowayejam'ni ape'e.</t(...)

²¹Siojowa itijwa'm niwa sikioye times tom'niji 'wuk kiwitawa jip'otis, niwaka siuniwa pérlajas[8], ti itijwa'm niwa sikioye times tom'niji, kajeyepa ti niwaka ti tikimaja ti tilisanaja. Siojo jlameje ti 'es jika'wu wikinie maja ti 'najlik'i, 'ate iyo ni taj jla'l tijwayiji'ni ti 'es pet.

²²'Yina je a'we'en japa 'najla'wet japa ka inejyi jlajak isi' ti 'es, kajeyepa ti siunie Sinia', ti lajk'ipa ka ijnojli, siu'neje ni 'wolepo 'woma, napoka, siojona 'najla'wet.

²³Isi' ti je isitia'n paka kilieye, ni'ne ka we'laja pa ka jla'al ine'yi ape'e, lapakawo ti Sinia' jla'al jla'am siunie ti 'es yi' ape'e ti 'yakajanit'i ape'e, 'yina siojona isi' iyoyi pet jika katesa' ni 'wolepo 'woma.

²⁴'Yina wikie'eyi siunapo i'nio' ti tajlits'i niwa ajnatis jat'iskiunieyisijyinna'a ni jla'al ni Sinia' ti yiji jlajaka isi'. Siunapo i'nio' anechiyasas ja intonieyisinie'e siuniwa i'wi'in jikijmatis ti janekiajle jlajak isi'.

²⁵Jawa jika 'wuk kiwitawa ja ke tip'onajamk'i ti jloma, kajeyepa ja laja ajnaja'.

²⁶Siunapo i'nio' yi' ape'e 'ni ajnat inekiajlayinie'e niwa i'wi'in, siu'neje ni jiwunitieye ti 'es.

²⁷Siunie ti t'ojli ja ke ijnojwa'm, ni'ne ka nakaye ti ti'niachiki, ni'ne ka nakaye siunie ik'emisijnaye. Ja napokataja jla'am siunapo ti jleyis yi'i siunie imp'esinik ti 'wolepo 'woma jip'esinik, jleyis yi'i napo ji'wasankiye ti t'o'n po'.