Read Iyojwa'ja Chorote Apocalipsis 22 Bible Online

Apocalipsis 22 - Iyojwa'ja Chorote bible

Apocalipsis 22

¹Siojo injlojwanik poli jlele i'winkink'i'm ja tewuk ti tajle siunie i'niat ti i'wasankiye, 'esi 'yiniye na intaj jla'al tijwayiji'ni, tajla'm siojo Sinia' siu'neje ja 'wolepo 'woma ji'wet ti 'es ti yijijyi'n.

²Iniu kiowik'i siojo jika'wu siojo jlameje jlajaka isi'. Jikiusk'i jak tewuk kia'iyojliyi ja tojmi 'wechaja, sek 'yita'ak'i siujlieja a'la' ti i'wasankiye. Wikie'eyi niwa najkapis, wikie'eyi niwa we'lajas ti iyo jlaye; siunapo i'nio' yi' ape'e 'ni ajnat 'esi niwa ji'wole ti iyoyisi jikakieye it'iminayi'iji ti isis.

³'Yina ja lajak'i'ne siunie Sinia' ine'ne paka jiwet'iaye. Lapakawo ti siojona ji'wet ni Sinia', siu'neje ni 'wolepo 'woma ji'wet ti 'es, sek jane'yi ti janejyi jlajak isi', siunapo jikawos janwunitis pet ni Sinia'.

⁴'Yina jani'wenis, sekjane'yi ja tip'esina'ak'i niwa jitiokiots'i'l ti Sinia' jle' ja tena'ak'i.

⁵Ja laja ajnaja'a, jak je iyoyiji siunapo sek janejyi ja ke jwesiejayisijyi'n k'iye japa katesa' ka inata'm ape'e, siunie kilie' kiak jawo ja ke insetianis, kajeyepa ti japoye ti jla'am ni Sinia' ti Saka'niona ni ja jlala ti janata'n ape'e. 'Yina jawoyeyisna'a anechiyasisa'a pet ti jajnok'i'ni.

⁶'Yina siojo injlojwanik poli jlele iyo'ne 'ate ti ijwilk'i'm: —Jla'm ijiate wek jla'am siu'niwa ka je inkakiunisi napo i'nio', 'yina ti je tak'emisie'n 'niwak inamtis. Saka'niona, ni siunie ti iyo ji'lijaye napo jijwejlanawos, naka ti ijliu' na jijliujwanik poli jlele ka in'wenkina siunapo jikawos siunie ti ja ke pajayi wat ti ja poye.

⁷Iyo'ate, “¡Ja ke paja its'ioye! ¡Ikap'ijliuskiye yiyi siunie ti its'iuye ni inka'niye ti yiji siu'nie imp'esinik!”

⁸Ya'am Juank'i'm, ya'am a'we'en siu'neje ti ape'ya 'niwaka. Jlampa atemayi siuki iyo kiwa a'we'en siu'neje kiwa ape'ya, sekyi'i ti awoyetaja ka 'yakose kiajwe jak injlojwanik poli jlele ti jota ka iyunit.

⁹'Yina je 'esiji jla'am ti iyonak'i 'ate: —¿Yot'iyi'ni ka kiak awonk'i? Kiak awo Sinia' jikawok'i'm pet jiwek iyo'ate jiwo ti a'am, 'ate iyo 'neje siunapo a'lejwas, siu'neje napo Sinia' jijwejlanawos, 'ate iyo 'neje wikie'eyi siunapo its'iuye 'niwak inamtis ti yiji 'nak imp'esinik. Jla'm ijiate ka wunit ni Sinia'.

¹⁰'Yina iyonk'i 'neje 'ate: —Ká ap'o'n ape'e ni siuniwa inamtis yi'i 'nak imp'esinik, ti 'niwak inka'niye ti tajle jla'am ni Sinia'. En kisie'e, 'yina je tojwa'a siunie jika jloma pet janeyi.

¹¹Ene 'ate siunie iyo ni siunie je 'es kawo siunie jloski'la; siunie ti ijiat ti t'ojli, ene 'ate ni siunie iyoyi. Jlampet siunie ti 'es ja ke inlek'i pet siunie ji'niayi iyo pit ti iyoyi ni 'es; kia'iyojliyi pit siunie ti ini'notatiji k'iye ni Sinia', 'esiji ka je ilek'i siunie iniwone ti ini'notatiji k'iye ni Sinia'.

¹²“'Ye'en, ja ke paja its'ioye ti jayapimet. Sek jane'yi ka iwinajamna'a siojona ja lajaye siunie iniwone ti ja tijniujlietak'i.

¹³Ya'am siunie ti iniant'ipi, siu'neje na ti 'wanjli isia'm, ya'am 'neje siunie ti 'nelanjie'e t'ipi, jajiok'i'ni.”

¹⁴Sinia' jikap'ijliuskiye yiyi siunapo ti itime ti iliji'n niwa ji'wuye, 'nakayi ja ke tenaja'm ka intojw siuniwa jla' janak a'la' ti in'wasankiye, ja 'esiena'a k'iye ka 'noyi siuniwa jika 'wuk kiwitawa jana isi'.

¹⁵Jlampet siunapo ti ijiate ti je isisi ti iyoyi ni siunie je 'es, ja 'wanjliyek'i kisie'e, siu'neje napo ti iniwojwa'n aye'wulisie', siu'neje napo ijia jwa'yis jiwos, siunapo kalankijietas, siu'neje napo ti jitiej iyoma siuniwa iyo jika diosisa', wikie'eyi 'neje siunapo ti yimi'n ti ik'emijietk'i napo ijia.

¹⁶“Ya'am ti Jesúsk'i'm, ya'am ti ajlo'wase ni ijliujwanik poli jlele, 'yina ti awojonk'iye ka injwe'lase siu'niwa wask'i'nelaja, sekjane'yi ti jajwelayi pit napo Sinia' jilis. Ya'am ti atajlaja'm siupapo David jilis t'ipi ti tomik'i pijia'm. Ya'am siojona kates jloma jla'yiki ti jlal po'.”

¹⁷Siojona Sinia' jikimet ti 'es, siu'neje napo Sinia' jilis ti ti'yenajap japa i'nioki ti janeyi siunie 'wolepo 'woma, iyoyits'i 'ate: —¡Jomet! Siunie jampe'ya, ka kiak iwoyenie'e pet 'ate: —¡Jomet! Siunie ti janki'im, ka inamayinie'e siunie i'niat ti i'wasankiye, sekjane'yi ka i'yayejenie'e, 'yina ja ke tiwok lajaye.

¹⁸Wikie'eyi siunapo ti ipi'ya niwak inamtis ti yi'i siu'nie imp'esinik, ja sipe'yayis ti jayo'ate, Siuti japoye siunie ti janene ape'e 'niwaka, Sinia' insayena'a pet ape'e siuniwa inwet'ia siuniwa yi'i siu'nie imp'esinik ti ajwe'el.

¹⁹Jlampet ti japoye siunie jiwa janlane siunie iyo niwa Sinia' jlamtis yi'i siu'nie imp'esinik, kiak jawo Sinia' ijnalayijna'a pet siuniwa wask'i'nelaja yiyi, ijwi'il siu'nie imp'esinik, janaka a'la' ti in'wasankiye, siu'neje janak isi' ti 'es.

²⁰Siu'nie 'yakajanit'i ape'e 'niwaka iyo'ate: —Ijiate, ja ke paja its'ioye ti jayapimet. Amén. Kets'ijyi'n, Ika'niona Jesús.

²¹'Esiji ka Saka'niona Jesús jikap'ijliuskiye inejiap wikie'eyi siunapo Sinia' jilis.