Read Iyojwa'ja Chorote Apocalipsis 4 Bible Online

Apocalipsis 4 - Iyojwa'ja Chorote bible

Apocalipsis 4

¹Jlampa pajayi'ni ti yam'niji kiaka, sekyi'i a'yen'ne poliyi, 'yina a'wenayi ti 'ajla'm. Siojo jla'lap ja i'nio' ti ape'yayi ti 'nelanjie'e ti 'yiniye siujlie'e 'woso' wakiak'iu', 'yina paka'ne siupa iyonk'i 'ate: —Jomet, 'wuj'li ape'e 'ni siu'nie, ja'winki'na'm siuniwa wask'i'nelaja ja'nakaj kanekta 'nijiji.

²Jakayi'ne ti kia'iyo siojopa Sinia' jikimet ti 'es ti ayet'ijyipi, sekyi'i ti a'wena siujlie'e anechiyas ji'wet ts'iji poliyi, jaka 'neje jla'am siojo yijijyi'n.

³Siojo jloniye iyo ti 'es, iyo'ate jla'a 'wosta' jlokie siu'neje ni ji'wole ti jiwats'o, ti intaj jla'al je ijwi'yi. 'Yina siujlieja in'wet ti anechiyas ji'wet siujlie'e jwats'ilkat siunie jla'al nak iniujwape'n, kia'iyojliyi ti 'es iyo'ate siujlie'e sisaj jle' iyo'ate esmeralda.

⁴'Yina a'we'n 'neje jawa veinticuatro siu'niwa ti kia'iyo anechiyasas ji'wetis ti iniujwape'n jlajak anechiyas ji'wet, yiyits'ik'iji'n siunapo i'nio' ti jwajla iyoyits'i'ni ti ji'wuye lemi 'najli, 'yina jlete'l 'yutiamk'i siuniwa tiwenajamk'i siunapo ti kia'iyo t'ank'i pijia'm ti ji'wajiet wikinie maja ti 'najli.

⁵Siojowa ti tak'ayetajats'i sek taj'le ni yi'i jlajak anechiyas ji'wet, siu'neje jawa jla'lapis papo ti 'loj i'nio', siu'neje jawa isiumtijnits'i; 'yina jitieyi'i jlajak in'wet anechiyas ji'wet sekyiye'e siu'niwa ijwienjli sikio' itij'we times tom'niji jwatis ti tiwoki katesila ti yatamk'i, jawaka siunapo ti kia'iyo ijwienjli sikio' itij'we times tom'niji Sinia' jikimet ti 'es.

⁶'Yina jitieyi'i jlajak in'wet sekyi'i 'neje siu'nie, 'yiniye ni i'niat lajlik'i ti 'esi ti intaj jla'al tijwayiji'ni. Jikiowe'e siojo yi'i jlajak in'wet anechiyas ji'wet, jikiusilk'i 'neje, sekyiye'e jawa ijniujlits'i pini' Sinia' jilisajna' ti jitiete'l ijniulk'i tom 'niji jitieyiji jawa jitiete, tom 'niji ji'wechaja jawa ijia.

⁷Siojo inia'an 'nak 'yiniye pet 'ni k'iwajla, jlampet siojo jikiecha 'nak 'yiniye pet siu'nie tolo, jlampet siojo jikiecha 'neje 'nak 'yiniye pet 'ni i'nio' ja k'iejliyi. Siojo 'wanjli isia'm 'nak 'yiniye pet siu'nie ajwejnas jikie' wuj ti ijwi'ya.

⁸Siojowa ijniujlits'i pini' Sinia' jilisajna', kiajatak'i ti kia'iyo ti ijwienjli sikio' itij'we ijwienjli tom'niji 'niwa jijwesis, 'yina siojowa jitiete'l itijwk'i, po' jawa ti yi' kisie'e, po'neje jawa ti yi' jitiowaja'm. Jlomas itijwe ajnaj kia'iyojliyi ti je mamiyisie ti takelisiejne'n, ti iyoyis'ni 'ate: “¡'Es, 'es, ijiate ti jlam 'es, 'ni Saka'niona, ti lajk'ipa ka ijnojli, siunie ti po' ta'a ti 'nelanjie'e, siu'neje na ti jla'am siunie 'naka, siu'neje na ti ja 'nejts'eje!”

⁹Jak je iyoyiji siuti iyo jawak pini' Sinia' jilisajna' ti ijniujlits'i, ti iyunitietajas jak siojo ti yi'iji'n jlajak anechiyas ji'wet, siu'neje ti kia'iyo jinikanitieyi iwinatajasi siu'nie ti jajnok'i'ni ti 'wasa'n, sekyi'i siojopo veinticuatro ti jwajla iyoyisits'i'ni i'nio' t'akosjlete'l itiyeyisiji'n kiajwe, sekyi'i ti iliena'ak'i siojowa yinis jleti'le ti yinis jitieyi'i jlajak anechiyas ji'wet, sekyi'i iyoyisie 'ate:

¹¹“Saka'niona ti Sinia', je inlakiki'i wek, 'yina ti 'yu'wa'm siunie tiwona'a ti inwunitie, siu'neje ti tiwok ajaye, siu'neje ti ijnonitie ni at'oni iyo. Lapakawo ti a'm ti alesajna' wikie'eyi siuniwa wask'i'nelaja. Tepa jawo ka je poye niwaka 'yina ti jitienkiunie ka kiak awoyi.”