Read Iyojwa'ja Chorote Apocalipsis 6 Bible Online

Apocalipsis 6 - Iyojwa'ja Chorote bible

Apocalipsis 6

¹Sekyi'i a'wenayi jak 'wolepo' jlas ja iyo ti its'isate ape'e jak imp'esinik siojo takapajlatak'i, siojo iniajnat t'etiejek'i ape'e. Sekyi'i'ne ti ape'yaye siojowa ijniujlits'i pini' Sinia' jilisajna' ti jitiete itijwk'i, siojo ijwienjli, 'yina siojo jla'lap iyo ti pesieje 'yiniye ni siunie isiumtijni, ti iyo'ate: —¡Jomet!

²'Yina ti a'yenayi, a'wenayi ja a'lenta lemits'i. Jlampet siojo yi' ape'e jiliusie ni losie a'la'. Sekyi'i tiwenajaja'm siujlie'e tiwenajam'ni siu'nie t'an pijia'm ti tena jletik'i, siuti yama 'yakajayi'i'ni ti jlam ti pajk'i ti t'an pijia'm ti jantatek'i isia'm papo jitiejiejwas.

³Siojo 'wolepo 'woma ti yiyeyi siojo tomik'i ti t'etieje ape'e ja imp'esinik jakayi ti timesie jawa no'we ti its'isate ape'e, sekyi'i ape'yayeyi siojowa pini' Sinia' jilisajna' jitiete 'loj siojo tomik'i pet, ti iyo'ate: —¡Jomet!

⁴Siuti a'yenayi, a'wenayi ja jikiecha a'lenta, 'yina jla'm isiatk'i. 'Yina siojo yi' pet ape'e jijweye tekiajlaja pet ka jikamankiye ijnale 'ni ajnat, 'nakayi ti siunapo i'nio' janitej'we ti janapits'i jlam wita'm ti janilajne'n. 'Yina tiwenaja'm 'neje ja jitisajnat tiok siojo ti jwajla iyo'ni.

⁵'Yina siojo 'wolepo 'woma ti yiyeyi siojo tomik'i pet ti timesieyiji, jakayi'ne ti najapeja jawa no'we ti its'isate ape'e siojowa t'etiejek'i ape'e ja imp'esinik. Sekyi'i ape'yayeyi pit siojo ijwienjli jawaka 'neje siojowa pini' Sinia' jilisajna' jitiete itijwk'i, jlam pa yiyeyi pet siojo ti najapeja jawa no'we ti pesieje, ti iyo'ate: —¡Jomet! 'Yina siuti a'yenayi, a'wenayi ja a'lenta isiojwats'i. Jlampet siojo yi' ape'e itiunin'ni pet jikiojyi jla'a ijliak'ajlimpe.

⁶'Yina jikiowe'e jawak ijniujlits'i pini' Sinia' jilisajna' jitiete itijwk'i ape'yayeyi pa jla'lap pa ti iyo'ate: —Ijwienjlik'i wek pi jikiojieti ijniujli siunie ipiatatiok t'ejes 'wanjle'e, ni'ne ka najapejak'i wek pi jikiojieti ijniujli siunie jlesiki' jimak, jikaja ni i'nio' inkijmayewo ti jloma ijwienjli. 'Esiji ka je akajyi'n ni impe' siu'neje ni at'es.

⁷'Yina jlampet ti yiyeyi ti its'isatik'i ape'e ti ijniujliejets'i jawa no'we jawak t'etiejek'i ape'e ja imp'esinik, jak 'wolepo 'woma, sekyi'i ape'yayeyi pit jawak pini' Sinia' jilisajna' ti jitiete 'lo'weje'n siojo ijwienjli jlampa kia'iyoyeyi pit ijniujlits'i jawa no'we, ti iyo'ate: —¡Jomet!

⁸Siuti a'yenayi, a'wena ja a'lenta majats'i'ni ape'e. Siojo yi' ape'e jle' iyo'ate 'Najlati. 'Wanjliyejap pet isia'm siunie jika anechijiayas ni Inlaye, sekyi'i tekiajlajats'i ni jijweye ape'e jawak jijwa'al ijniujlits'i 'ni ajnat ka iwo jiwet'iaye, ka intejwk'i'ni napo i'nio' ti isiene ni inwak, ka nel'lia inlankini, siu'neje ka inlaye inlankiniji'n, siu'neje ka inkiene niwa pini' yi' ape'e 'ni ajnat ka inlajne'n.

⁹'Yina jlampet ti yiyeyi siojo 'wolepo 'woma ti its'isate ape'e siojowa t'etiejek'i ape'e ja imp'esinik ti ijwienjli sikio' itijwa'a jawa no'we, sekyi'i a'wena siojopo japo tilianat'ijyimpe jisiak'alis jitieyi'i siujlie'e altar, ti nak tenaja ape'e Sinia' jlamtis ti iyoyi jlamtikie'.

¹⁰Jla'lap ijiok'i'ni ti iyoyits'i 'ate: —Ika'niona ti lajk'ipa ka ijnojliji, a'm ti i'notataje, siu'neje ti je tiliakiki'a'm. ¿Tepat'iyi pet ka'ye'en napo i'nio' yi' ni ajnat siunie iyoyi, ka awo pet sajaye siunie tiwonats'e ti kaslajne'n?

¹¹Sekyi'i ti tijwankitajamk'i'ni jawa ji'wuye ti lemi ti t'ojienak'iji'n. Sekyi'i tiwonajayi 'ate: —'Esiji ka k'iuyejiap, ka ijnojlia'm ni janojwaja'm siunapo as'lejwas yiji ni jikijmaye ni Sijwajieti ti ja tiwonaja 'ate iyo ni siunie tiwona'ase ti inlanajajyin'nijpe.

¹²Jlampet ti yiyeyi ti its'isate ape'e siojo ijwienjli sikio' itij'we times tom'niji t'etieje ape'e ja imp'esinik siojo 'wolepo 'woma, siuti a'yenayi, sekyi'i ti poye siojo ti ijiat ti pansak'i ti ajnat ti'wesi. Isiojwayeyiji ni kilie' ti 'yo'me, iyoye'ate siunie ji'wu' jla'a ask'ilieki ti isiojwa'. 'Yina siunie we'la kia'iyojliyi ti isiataje, 'ate iyo ni 'woyis.

¹³'Yina siuniwa katese'l namak'i isia'm ti iniuk'iji'n ape'e 'ni ajnat, 'ate iyo niwa higok jla' ti yi' ajnat'e ti jlajwu siunie wujwi ti i'wiati'ni, ijios ajnat'e ti je wakalta'aja.

¹⁴Jlampet siunie poli a'yejnap pet siunie imp'esinik ti takapajlatak'i ti je tiliatak'i siuti yapilietaja'm jla'am, ti netia'n. 'Yina siuniwa tikijnaki siu'neje niwa ajnatis ti i'niat tijwajiape'n wikie'eyi ti titiajlina, je yiye'ek'i siuniwa ji'wetis pet.

¹⁵Jlampet siunapo anechiyasas yi' ape'e 'ni ajnat, siu'neje napo anechiyasas wus, siu'neje napo tokis jika anechiyasas, siu'neje napo i'nio' jwajla'a i'wi'in, siu'neje napo jwajla'a iyots'i'ni ti jleyis po'; wikie'eyi napo i'nio', siunapo inkipijnas, siu'neje napo je yi kiajwe ka ne'yi paka anechiyasa' - wikie'eyi napoka ti ijioyi niwa tikijnakiyis ti inijwekk'iji'n ti jitiej 'yutiejesi niwa wase'l ti 'yuyisk'iji'n, siu'neje ti 'yuyisk'i kiajwe niwa sisajas wus.

¹⁶Sekyi'i ti takajlunieyis'ni lajap ti iyonisi 'ate niwa tikijnakiyis, siu'neje niwa sisajas wus: —¡Kiaye sitipe'e, nip'onayi sitipe'e, 'nakayi ti ja kaslajk'i jitieyi'i siunie yi'iji'n jana ji'wet ni anechiyas, siu'neje ni 'wolepo 'woma ti ja jwesieja!

¹⁷Lapakawo ti yiyi siojona jika jloma pet nak insajkinaye ti wuj, 'yina ka kia'iwonie'e ka poye pa ka into'm ilia'm naka.