Read Jamaican Patois Matyu 1 Bible Online

Matyu 1 - Jamaican Patois bible

Matyu 1

¹ Dis a di lis a Krais Jiizas faada faada dem go bak. Jiizas did kom fram Dievid an Iebriyam fambili.

² Iebriyam did a Aizak faada, an Aizak did a Jiekob faada, Jiekob pikni dem a did Juuda an Juuda breda dem.

³ Juuda a did Perez an Ziira faada (Tamaar did a dem mada), Perez pikni a did Ezran an Ezran pikni a did Ram.

⁴ Aminadab a did Ram pikni, an fi Aminadab pikni a did Nieshan, an Saman a did fi Nieshan pikni.

⁵ Saman a did Buowaz faada (im mada a did Rieyab), Buowaz a did Uobed faada (Ruut a did im mada). Jesi a did Uobed pikni,

⁶ an Jesi did a king Dievid faada. Dievid did a Salaman faada (a Yuuraiya waif did a fi im mada),

⁷ Salaman pikni a did Reyobuom, Reyobuom a did Abija faada, an Abija a did Asa faada.

⁸ Asa pikni a did Jeyoshafat, Jeyoshafat a did fi Juoram faada, Juoram pikni did a Uziya.

⁹ Uziya pikni a did Juotam, Juotam a did fi Ayaz faada, an Ayaz did a Ezikaiya faada.

¹⁰ Ezikaiya a did fi Manase faada an Manase a did Ieman faada. Ieman pikni did a Josaiya,

¹¹ an Josaiya a did fi Jekonaiya faada plos im did av som ada bwai pikni. Dis a roun di taim wen di Babiluoniyan dem did tek we di Izrel piipl dem an fuos dem fi go wok a Babilan.

¹² Afta da taim de: Jekonaiya did av Shiyaltiyel, an Shiyaltiyel did get Zeruubabel.

¹³ Zeruubabel pikni did a Abiyud, Abiyud a did Elaiyakim faada, an Elaiyakim did a fi Azuor faada.

¹⁴ Azuor pikni did a Zadak, Zadak pikni did a Akim, an Akim did a Eliyud faada.

¹⁵ Eliyud did a Elieza faada, Elieza pikni did a Matan, Matan a did fi Jiekob faada,

¹⁶ an Jiekob did a Juozif faada, dat a Mieri ozban — Mieri we did av Jiizas — dat a Krais Jiizas.

¹⁷ So fram Iebriyam go chriet baka Dievid, a fuotiin jinarieshan Jiizas did av. An fram Dievid taim op tu wen dem did tek we di Izrel piipl dem an fuos dem fi go wok a Babilan a fuotiin jinarieshan Jiizas did av de-so tu, an fram da taim de tu wen Krais Jiizas baan, a fuotiin jinarieshan dat tu.

¹⁸ Dis a ou Jiizas Krais did baan. Im mada Mieri did jos ingiej fi marid Juozif, dem neehn kom liv tugeda yet laik ozban an waif, bot dem fain se shi did av biebi iina beli, an a di Uoli Spirit did put di biebi de.

¹⁹ Nou Juozif, di man we shi did ingiej fi marid, im a did wan gud man we aalwiez du wa rait. Im neehn waahn shiem ar infronta evribadi, so im mek op im main fi lef ar anda di kwaiyat.

²⁰ Jos wen Juozif did a tingk fi du dat, wach ya nou — wan a di Laad ienjel dem no jriim im. Di ienjel se, “Juozif, Dievid pikni, no fried fi tek Mieri an marid ar, kaa di pikni we iina ar beli, a di Uoli Spirit put im de.

²¹ Shi a-go av wan bwai pikni an yu fi kaal im Jiizas, kaa im a-go siev im piipl dem fram dem sin.”

²² Nou aal a dem sitn ya apm fi mek wa di Laad did tel di prafit fi se kom chuu.

²³ Di prafit did se, “Lisn op! Di uman we neehn sliip wid no man a-go get biebi — a wan bwai shi a-go av, an dem a-go kaal im Imanyuwel.” Da niem de miin, “Gad de ya wid wi.”

²⁴ Den wen Juozif wiek op, im du jos wa di ienjel tel im fi du. Im tek Mieri an go marid ar.

²⁵ Bot im neehn go a bed wid ar til shi av ar pikni — wan bwai biebi; an im niem im Jiizas.