Read Jamaican Patois Matyu 11 Bible Online

Matyu 11 - Jamaican Patois bible

Matyu 11

¹ Wen Jiizas don tel im twelv falara dem wa fi du, im lef de-so an staat tiich an priich iina dem toun.

² Nou wen Jan de iina prizn an ier bout di sitn dem we Krais Jiizas did a du. Jan sen som a im falara dem

³ fi aks Jiizas, “A yu a di wan wi shudaana luk fa? Ar wi fi luk fi sumadi els?”

⁴ Jiizas ansa dem se, “Go tel Jan wa unu ier an wa unu si:

⁵ Di blain kyan si nou; kripl piipl a waak; piipl we av siknis we mek dem skin fasi-fasi, dem skin kom bak gud gud, def piipl a ier nou, ded a kom bak alaiv, an di gud nyuuz a priich tu puo piipl.

⁶ Gad bles di piipl dem we no tap chos iina mi jos kaa mi no gwaan ou dem tingk di wan we dem a wiet pan fi gwaan.”

⁷ Az Jan falara dem a lef so, Jiizas staat taak tu di kroud bout Jan. Im se, “Wa kain-a sumadi unu did go out iina di dezot fi si? Sumadi we kyaahn mek op im main laik taal graas we di briiz a bluo dis ya wie an dat de wie?

⁸ Ef a no dat, den a wa unu go out de fi si? Wan man we jres op jres op iina fansi kluoz? Luk ya no, piipl we at out iina fansi kluoz liv iina palis.

⁹ So a wa unu go out de fi si? Wan prafit? Ye, mi a tel unu, an im a muo dan wan prafit tu.

¹⁰ A Jan it a taak bout wen it rait dong se: “‘Luk, mi wi sen mi mesinja fi gwaan til yu kom, im a-go get piipl redi fi yu.’

¹¹ Mek mi tel unu dis, Jan di Baptis biga dan enibadi we eva baan fram wan uman. Bot iivn di luowis sumadi iina Gad kindom, biga dan im.”

¹² Fram Jan a priich til nou, wikid piipl a chrai fait gens Gad kindom an powaful piipl chrai fi fuos an tek it uova.

¹³ Kaaz aal a di prafit dem, an Muoziz Laa tu, did taak bout wa a-go apm rait op tu Jan taim.

¹⁴ An ef unu redi fi tek we mi a se, den ier we mi a se, Jan a Ilaija, di prafit unu a wiet fa.

¹⁵ Enibadi we av iez — beta lisn gud!

¹⁶ “Di piipl we a liv iina dem taim ya, a we dem komiin laik? Dem komiin laik pikni we a sidong iina di maakit an a ala tu dem wan aneda,

¹⁷ “‘Wi plie di fluut fu’unu, an unu no daans: wi sing wan finaral sang, an unu no baal.’

¹⁸ Kaaz Jan di Baptis neva kom a nyam an a jringk, bot dem se, ‘Diiman iina im.’

¹⁹ Di Man we Gad Pik kom a nyam an a jringk, an dem se, ‘Luk ya, da man ya krievn an im a jongkad. Fi im fren dem a taks kalekta an sina!’ Di piipl we fala di rait wie pruuv se Gad waiz an im wie rait.”

²⁰ Den Jiizas staat kos out di siti dem wich paat im did du muos a im mirikl dem, kaa dem neehn ton we fram dem sin an beg Gad paadn.

²¹ Im se, “Chobl fi yu, Korazin! Chobl fi yu Betsieda! Ef di piipl dem we liv iina Taiya an Saidan did si di mirikl dem we unu si mi du mongks unu, dem wuda sari fi dem rang an chienj dem wiez lang taim. Dem wuda put ashiz pan demself an wier krokos bag fi shuo se dem miin it.

²² Bot ier we mi a se, mi naa lai: it a-go iiziya fi Taiya an Saidan pan jojment die dan fi unu.

²³ Aal laka yu Kyaporniyom, yu tingk se Gad a-go lif yu op go a evn an ana yu? Nuo, im a-go fling yu dong a el. Kaaz di mirikl we unu si mi du, ef a Sadam mi did go du dem mirikl de, it wuda stil de bout tide die ya.

²⁴ Bot ier we mi a se, it a-go iiziya fi Sadam pan jojment die dan fi yu!”

²⁵ Da taim de, Jiizas se, “Faada, a yu ron evriting iina evn an pan ort, mi priez yu. Mi priez yu kaa yu aid dem sitn ya fram piipl we tingk se dem brait an av nof sens, bot yu shuo lili pikni dem.

²⁶ Yes Faada, a dat yu did api fi du.

²⁷ “Mi Faada gi mi evriting. A onggl di Faada wan riili nuo di Bwai Pikni. An nobadi no riili nuo di Faada, onggl di Bwai Pikni wan an enibadi els we di pikni waahn fi mek nuo di Faada.

²⁸ “Aal a unu we taiyad an bordn dong unu kom tu mi an mi wi mek unu get fi res.

²⁹ Jos laka ou di kou tek di wudn yuok pan dem shuolda, a so unu fi tek op di sitn dem we mi tel unu fi du, an tek iin wa mi a tiich, kaa mi wi tek taim wid unu, an mi riili ombl, an unu wi get fi res unu suol.

³⁰ Kaaz di sitn dem we mi a tel unu fi du, dem iizi an di luod we mi de gi unu — lait.”